ނިމިދިޔަ ސަރުކާރުން ފަހި ދިރިއުޅުން ކޯޕަރޭޝަން (އެފްޑީސީ)އާއި ހަވަާލުކޮށްގެން އިމާރާތްކޮށްފައިވާ 4000 ފުލެޓް ހަވާލުކުރުން ލަސްވަމުންދާތީ، ގަލޮޅު އުތުރު ދާއިރާގެ މެމްބަރު މުޙައްމަދު އިބްރާހީމް ހުށަހެޅުއްވި ކުއްލި މައްސަލަ ބަލައިނުގަނެ މަޖިލީހުން ބޭރުކޮށްލައިފިއެވެ.
ނިމިދިޔަ ސަރުކާރުން ގެދޮރުވެރިޔާ ސްކީމްގެ ދަށުން އިމާރާތް ކޮށްފައިވާ 4000 ފުލެޓް ލިބޭ ފަރާތްތަކާއިއެކު، މި ފެށޭ ޖުލައި މަހުގައި އެއްބަސްވުމުގައި ސޮއި ކޮށް ފުލެޓް ހަވާލު ކުރާނެކަމަށް ގެދޮރުވެރިކަމާ ބެހޭ ވަޒީރު، ޑރ. އަބްދުالله މުއްތަލިބު ވިދާޅުވެފައިވީ ނަމަވެސް، ފްލެޓު ލިބިފައިވާ ފަރާތްތަކާއިއެކު އެއްބަސްވުމުގައި ސޮއިކޮށްފައިނުވާތީ އާއި، ފްލެޓު ހަވާލުކުރުން ލަސްވާ މައްސަލައިގައި ގަލޮޅު އުތުރު ދާއިރާގެ މެމްބަރު މުޙައްމަދު އިބްރާހީމް މިއަދުގެ މަޖިލީހުގެ ޖަލްސާގައި ކުއްލި މައްސަލައެއް ވަނީ ހުށަހަޅުއްވާފައެވެ.
ކުއްލި މައްސަލައަކީ ވޭތުވެދިޔަ ހަތް ދުވަހުގެ ތެރޭގައި ހިނގާފައިވާ ކަމަކާ ގުޅޭ މައްސަލައެއްނޫންކަމަށާއި ކުއްލި މައްސަލައިގައި ބަޔާންކުރާ ކަމަކީ ކުއްލިއަކަށް ދިމާވި ކަމަކަށް ވާންޖެހޭ ކަމަށް މަޖިލީހުގެ ގަވާއިދުގައި ބަޔާންކުރާ ކަމަށް މަޖިލީހުގެ ރައީސް އަބްދުއްރަހީމް އަބްދުالله ވަނީ ވިދާޅުވެފައެވެ.
މެމްބަރު މުޙައްމަދު އިބްރާހީމް އިތުރަށް ވިދާޅުވެފައިވަނީ ނިމިދިޔަ ސަރުކާރުގެ ލިސްޓުގައިވާ ގޮތަށް ފްލެޓް ލިބިފައިވާ ފަރާތްތަކަށް ފްލެޓް ހަވާލުކުރާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ރިޔާސީ ކެމްޕޭނުގައި ވިދާޅުވެފައިވީ ނަމަވެސް ވެރިކަމާ ހަވާލުވެވަޑައިގަތުމަށްފަހުގައި އެކި އުޒުރުތަށް ދައްކަވައި ފްލެޓްތަކުގެ ހައްގުވެރިންނަށް ފްލެޓް ހަވާލުކޮށްފައިނުވާ ކަމަށެވެ.
2023 ވަނަ އަހަރުގެ ނޮވެމްބަރު މަހުގެ 15 ވަނަ ދުވަހު ނިމިދިޔަ ސަރުކާރުން އާންމުކުރި ފްލެޓް ލިސްޓުގައި އެއްވެސްކަހަލަ މައްސަލައެއް ނެތްކަން ހުސްވި މެއި މަހުގެ 25 ވަނަ ދުވަހު އަދުގެ ސަރުކާރުން ނިންމުމުން ހާމަވެފައިވާކަމަށް މެމްބަރު މުޙައްމަދު އިބްރާހީމް ހުށަހެޅުއްވި ކުއްލި މައްސަލައިގައި ވަނީ ފާހަގަކޮށްފައެވެ.
މި މައްސަލައަކީ ރައްޔިތުންގެ މަސްލަހަތާއި ގުޅިފައިވާ މައްސަލައެއްކަމުން މި މައްސަލައާ ގުޅޭގޮތުން މަޖިލީހުގައި ބަހުސްކުރުމަށް މެމްބަރު މުޙައްމަދު އިބްރާހީމް ވަނީ ހުށަހަޅުއްވާފައެވެ.
Advertisement
This content is created and paid for by advertisers and does not involve Voice Journalists
