ރާއްޖޭގެ ޤައުމީ އެއާލައިން މޯލްޑިވިއަންގެ ދަތުރުތައް ދެކުނު އެފްރިކާއަށް ފެށުމަށް އައިލެންޑް އޭވިއޭޝަނުން ތައްޔާރުވެއްޖެއެވެ.

އައިލެންޑް އޭވިއޭޝަނުން ވަނީ މޯލްޑިވިއަންގެ ދަތުރުތައް ދެކުނު އެފްރިކާއަށް ފެށުމަށް އޭޖެންޓުން ހޯދުމަށް އިއުލާނުކޮށްފައެވެ. ދެކުނު އެފްރިކާއަށް މޯލްޑިވިއަންގެ އުދުހުންތައް ބޭއްވުމަށް ނިންމާފައިވަނީ އެއާބަސް 330-200 މަރުކާގެ މަތިންދާބޯޓުގައެވެ.

މޯލްޑިވިއަނުން ދެކުނު އެފްރިކާއަށް ފެށުމަށް ތައްޔާރުވަމުންދާ ދަތުރުތަކަށް ޖެނެރަލް ޕެސެންޖަރ ސޭލްސް އޭޖެންޓުން ހޯދުމަށް އިއުލާނުކޮށްފައިވާއިރު، އެކަމަށް ޝައުގުވެރިވާ ފަރާތްތަކުން ހުށަހަޅަންޖެހޭ އެންމެފަހު ތާރީހަކީ އަންނަ ޖުލައިމަހުގެ 4 ވަނަ ދުވަހެވެ.

މޯލްޑިވިއަނުން ދެކުނު އެފްރިކާއަށް ދަތުރުތައް ފެށުމަށް ތައްޔާރުވަމުންދާއިރު، އެކުންފުނިން ވަނީ މޯލްޑިވިއަންގެ އުދުހުންތަކުގައި ބޭނުންކުރުމަށް މިއަހަރުގެ ޖެނުއަރީމަހުގެ ތެރޭގައި އެއާބަސް ވައިޑްބޮޑީ މަތިންދާބޯޓެއްވެސް ގެނެސްފައެވެ. މޯލްޑިވިއަނުން ވަނީ ޗައިނާގެ 3 ސިޓީއަށް ދަތުރުތައް ފަށާފައެވެ. އެއީ ޗެންޑީ، ބެއިޖިންގ އަދި ޝަންހާއީއެވެ.

މޯލްޑިވިއަންގެ ފްލީޓްގައި 25 ހަށްވުރެ ގިނަ ބޯޓު ބޭނުންކުރަމުން އަންނައިރު މީގެ ތެރޭގައި އެއާބަސް މަރުކާގެ ދެ ބޯޓާއި، ޑޭޝް އަދި ޓްވިން އޮޓަރ މަރުކާގެ ބޯޓުތައް ހިމެނެއެވެ.