ވިހި ސެންޓަރެއްގައި 1434 މީހަކު ދަނީ ޤުރުއާން ހިތުދަސްކުރަމުން ކަމަށް އިސްލާމިކް މިނިސްޓްރީން ބުނެފި އެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު މިއަދު ވަނީ މިވަގުތާއި ހަމައަށް ޤުރުއާން ހިތުދަސްކުރަމުން އަންނަ މީހުންގެ އަދަދާއި އެ މީހުން ޤުރުއާން ކިޔަވަމުންދާ ސެންޓަރުތަކުގެ މައުލޫމާތު ހިއްސާކޮށްފަ އެވެ.

މިނިސްޓަރު އާންމުކުރި ލިސްޓްގައިވާ ގޮތުން މިވަގުތު ޤުރުއާން ހިތުދަސްކުރަމުން އަންނަ 1434 މީހުންގެ ތެރޭގައި ހިމެނެނީ 651 ފިރިހެނުންނާއި / ފިރިހެން ކުދީން އަދި 783 އަންހެނުން / އަންހެން ކުދީންނެވެ.

އެންމެ ގިނަ ބަޔަކު ޤުރުއާން ހިތުން ދަސްކުރަނީ ކީރިތި ޤުރުއާނާބެހޭ ޤައުމީ މަރުކަޒުގެ އެކި ސެންޓަރުތަކުގަ އެވެ. އެ ގޮތުން މާލޭގެ ސެންޓަރުގައި 424 ދަރިވަރުން އަދި ހުޅުމާލެ ސެންޓަރުގައި 155 ދަރިވަރުން ދަނީ ޤުރުއާން ހިތުދަސްކުރަމުންނެވެ. ވިލިމާލެ ސެންޓަރުގައި 45 ދަރިވަރުން އަދި ފުވައްމުލަކު ސެންޓަރުގައި 67 ދަރިވަރުން ދަނީ ޤުރުއާން ހިތުދަސްކުރަމުންނެވެ.

ރ. އަލިފުށީ ސެންޓަރުގައި 34 ދަރިވަރުން, ގއ. ދާންދޫ ސެންޓަރުގައި 42 ދަރިވަރުން, ރ. ކިނޮޅަސް ސެންޓަރުގައި 80 ދަރިވަރުން ދަނީ ޤުރުއާން ހިތުދަސްކުރަމުންނެވެ.