ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ސިންގަޕޫރުގެ ރައީސް ތަރްމަން ޝަންމުގަރަނަމްގެ އަރިހަށް ރަސްމީ އިޙްތިރާމުގެ ޒިޔާރަތެއް ކުރައްވައިފިއެވެ.
މިއަދު ސިންގަޕޫރުގައި ބޭއްވުނު މި ބައްދަލުވުމުގައި، ރައީސް ޝަންމުގަރަނަމް ވަނީ، ދެ ޤައުމުގެ ދެމެދުގައި ސިޔާސީ ގުޅުން ޤާއިމުވުމުގެ ރަންޔޫބީލާ ދިމާކޮށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ސިންގަޕޫރަށް ކުރައްވާ ތާރީޚީ ދަތުރުފުޅާމެދު އުފާވެވަޑައިގަންނަވާ ކަމަށް ވިދާޅުވެ، ރައީސުލްޖުމްހޫރިއްޔާއަށް ޝުކުރު ދަންނަވާފައެވެ.
އަދިހަމައެހެންމެ، މި ބައްދަލުވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، ސިންގަޕޫރުން، އަދި ޚާއްޞަކޮށް ރައީސް ޝަންމުގަރަނަމްގެ ފަރާތްޕުޅުން އެމަނިކުފާނަށް ދެއްވި ހޫނު މަރުޙަބާއަށާއި މެހެމާންދާރީއަށް ޝުކުރު އަދާކުރައްވާފައެވެ.
މި ބައްދަލުވުމުގައި ދެ ޤައުމުގެ ރައީސުން ވަނީ، ދިވެހިރާއްޖެއާއި ސިންގަޕޫރުގެ 50 އަހަރުވީ ސިޔާސީ ގުޅުމަށް ނަޒަރު ހިންގަވައި، މި ގުޅުން އިތުރަށް ހަރުދަނާކުރުމާ ގުޅޭގޮތުން މަޝްވަރާ ކުރައްވާފައިވެއެވެ. އަދިހަމައެހެންމެ، ތަމްރީނާއި ތަޢުލީމު، އިއާދަކުރަނިވި ހަކަތަ އަދި ޢުމްރާނީ ތަރައްޤީ ފަދަ ދާއިރާތަކުން ދެ ޤައުމަށް މަންފާކުރާނެ މަޝްރޫޢުތައް ކުރިއަށް ގެންދިއުމާ ބެހޭގޮތުން ވެސް 2 ބޭފުޅުން މަޝްވަރާކުރައްވާފައިވާ އެވެ.
ރާއްޖޭގެ މަސްވެރިކަމުގެ ސިނާއަތް ތަރައްޤީކުރުމާއި، ފަތުރުވެރިކަމުގެ އިތުރުން އެހެނިހެން ދާއިރާތަކުން އިޤްތިޞާދު ފުޅާކުރުމުގެ މަސައްކަތްތަކާ ބެހޭގޮތުންވެސް ފުޅާ ދާއިރާއެއްގައި 2 ބޭފުޅުން ވަނީ މަޝްވަރާކުރައްވާފައެވެ.
ބައްދަލުވުމަށްފަހު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، ދިވެހިރާއްޖެއާއި ސިންގަޕޫރާ ދެމެދު 1975 ވަނަ އަހަރުގެ ފެބްރުއަރީ މަހުގެ 20 ވަނަ ދުވަހު ސިޔާސީ ގުޅުން ޤާއިމުވި ފަހުން، ވޭތުވެދިޔަ 50 އަހަރުގެ ތެރޭގައި ދެ ޤައުމުގެ ދެމެދުގައި ހިނގާފައިވާ އެންމެ ފާހަގަކޮށްލެވޭ ކަންކަމާއި، ޙާޞިލުކުރެވުނު މުހިންމު ކުރިއެރުންތައް ހިމެނޭ ހާއްސަ ހަނދާނީ ފޮތެއް ސިންގަޕޫރުގެ ރައީސް ޝަންމުގަރަނަމްއަށް ހަދިޔާކުރައްވާފައެވެ.
މި ފޮތަކީ، ދެ ޤައުމުގެ ދެމެދުގައި އޮތް އެކުވެރިކަން ދައްކުވައިދޭ، އަދި ކުރިމަގުގައި މި ގުޅުން އިތުރަށް ހަރުދަނާކުރުމަށް މަގުފަހިކޮށްދޭނެ މުހިންމު ފޮތަކަށް ވާނެއެވެ.
Advertisement
This content is created and paid for by advertisers and does not involve Voice Journalists
