މާލެ، ވިލިމާލެ، ގުޅިފަޅު އަދި ތިލަފުށި ގުޅާލާ "ތިލަމާލެ" ބްރިޖުގެ ހުރިހާ ތަނބުތަކެއް ޖަހައި މުޅި މަސައްކަތުގެ %60 މަސައްކަތް ނިމިފައިވާ ކަމަށް ގެދޮރުވެރިކަމާއި ބިނާރާ ބެހޭ ވަޒީރު ޑރ. އަބްދުالله މުއްތަލިބް ވިދާޅުވެއްޖެއެވެ.

ވަޒީރު މުއްތަލިބް މިއަދު އެކްސް ގައި ކުރެއްވި ޕޯސްޓެއްގައި ވިދާޅުވީ ތިލަމާލެ ބްރިޖުގެ ތަނބުތައް ޖެހުމުގެ މަސައްކަތް ކާމިޔާބުކަމާއެކު ނިންމާލެވިފައިވާ ކަމަށާ، އެއީ މުޅި މަޝްރޫއުގައި ވެސް ހިމެނޭ އެންމެ ގޮންޖެހުން ބޮޑު މަސައްކަތް ކަމަށެވެ. 

”އެއްގަމާއި ކަނޑުގެ 68 ސަރަހައްދެއްގައި 263 ތަނބު ވަނީ ޖަހާފައި. މިހާތަނަށް ތިލަމާލެ ބްރިޖު މަޝްރޫއުގެ، %60.84 މަސައްކަތް މިވަނީ ނިމިފައި.“ ވަޒީރު މުއްޠަލިބު ވިދާޅުވިއެވެ. 

އިންޑިއާގެ އެފްކޮންސް އިންފްރާސްޓްރަކްޗާ އިން ކުރިއަށް ގެންދާ މި މަޝްރޫޢަކީ 7 ބިލިއަން ރުފިޔާގެ ބޮޑު މަޝްރޫޢެކެވެ. މި މަޝްރޫއުގެ ދަށުން 6.7 ކިލޯމީޓަރުގެ ދިގު ބްރިޖަކާއި ކޯސްވޭ ލިންކެއް އަޅާނެއެވެ.

ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި ފެށި މި މަޝްރޫއުއިން، އެ ސަރުކާރުގައި ނިމުނީ 29 އިންސައްތަ މަަސައްކަތެވެ.

މި ސަރުކާރު އުފެދި މިވީ މުއްދަތުގެ ތެރޭގައި ބްރިޖްގެ މަސައްކަތް ހަލުވިކޮށް ކަނޑައަޅާފައިވާ ތާރީހުތަކަށް މަސައްކަތްތައް ނިންމުމާއި ގުޅޭގޮތުން އިންޑިއާގެ އެކި ފެންވަރުގެ ބޭފުޅުންނާއެކު ވަނީ މަޝްވަރާތައް ކުރައްވާފަ އެވެ. އެ މަޝްވަރާތަކަށް ފަހު ކަނޑައަޅާފައިވާ ތާރީހުތަކަށް މަސައްކަތް ނިމޭނެ ކަމުގެ ޔާގީންކަން ރައީސް މުއިއްޒުއާ ސަރުކާރުގެ ވެރީން ވަނީ ދެއްވާފަ އެވެ.

ރައީސް ވިދާޅުވީ އެމަނިކުފާނު ވެރިކަމާއި ހަވާލުވެޑައިގެން ހިސާބުން ފެށިގެން ބްރިޖުގެ މަސައްކަތް ވަރަށް ގާތުން ބައްލަވަމުންދާ ކަމަށެވެ. އަދި ވިދާޅުވީ މި އަހަރުގެ ނިޔަލަށް މާލެ-ވިލިމާލެ ގުޅާލެވި އަންނަ އަހަރުގެ ނިޔަލަށް ވިލިމާލެއާ ގުޅިފަޅު ބްރިޖުން ގުޅާލެވޭނެ ކަމަށެވެ.

މާލެ-ވިލިމާލެ ގުޅުވާލާ ތިލަމާލެ ބްރިޖުގައި ދުނިޔޭގެ އެންމެ އުސް ޕްރީކާސްޓް ސެގްމަންޓް މިހާރު ވަނީ ބަހައްޓާފަ އެވެ. އިންޑިއާ ހައިކޮމިޝަނުން ބުނި ގޮތުގަައި މި ޕްރީކާސްޓްގެ އުސްމިނަކީ 8.2 މީޓަރު އަދި ފުޅާމިނަކީ 25.3 މީޓަރެވެ. އަދި މިއީ 216.04 މެޓްރިކް ޓަނުގެ ބަރުދަން ހުރި ޕްރީކާސްޓެކެވެ.