ކުރީގެ ޔޫތު މިނިސްޓަރު އަހްމަދު މަހްލޫފްގެ އަނބިކަނބަލުން ނަޒްރާ ނަސީމް, ބައްޕަ ގޮވައިގެން އިންޑިއާގެ ކޮޗިންއަށް ދިޔައީ ބައްޕަގެ ވަރަށް މުހިންމު އޮޕަރޭޝަނަކަށެވެ. މިހާރު އިންޑިއާގައި ތިބޭތާ ދުވަސްކޮޅެއް ވެއްޖެ އެވެ. އެއީ ކަންދިމާކުރި ގޮތުން އޮޕަރޭޝަން ނުކުރެވި ދިގުލައިގެން ދިއުމުންނެވެ.

އިންޑިއާއަށް ފުރުމުގެ ކުރީން ބައްޕަގެ ކަންކަމުގައި އާއިލާއަށް އެހީތެރިވުމަށް ގޭގައި ގެންގުޅެން ނޭޕާލްގެ މީހަކު ގެނައެވެ. އޭނާ ގެނައީ ވަޒީފާާއަކަށް އެދި ތަކުރާރުކޮށް އާދޭސް ކުރުމުންނެވެ. އޭނާގެ ނިކަމެތި ހާލަތު ކިޔައިދިނުމުން އެކަމަށް ހަމްދަރުދީ ވުމުގެ ގޮތުންވެސް މެ އެވެ. އެހެން ކަމުން އެ މީހާ ރާއްޖެ ގެނެސް އޭނާއަށް ބޭނުންވާ ހުރިހާ އެއްޗެއް ނަޒޫ ހޯދައިދިނެވެ. އަދި ދެ މަހުގެ މުސާރަ އެޑްވާސްކޮށް ދިނެވެ. އެއީ އެ މީހާ ކިޔައިދިން ވާހަކަތަކުން އޭނާގެ ހާލަތަށް ހަމްދަރުދީވެ އެހީތެރިވުމުގެ ގޮތުންނެވެ.

"ވޮއިސް" އާ ވާހަކަ ދައްކަމުން ނަޒޫ ބުނި ގޮތުގައި މި ފަހަރު އިންޑިއާއަށް ދިޔައީވެސް ނޭޕާލްގެ އެ ފިރިހެން މީހާ ގޮވައިގެންނެވެ. އޭނާ ގެންދިޔަ ނަމަވެސް ބައްޕަގެ ކައިރީ ހޮސްޕިޓަލްގައި ކޮންމެ ރެއަކު ޑިއުޓީ ކުރަނީ ނަޒޫއާ އޭނާގެ ދައްތަ އަންޖު އެވެ. ނަޒޫއާ ބައްޕައާ އޮންނަނީ ވަރަށް ޚާއްސަ ގާތް ގުޅުމެކެވެ. ބައްޕައަކާ ދަރިއަކާ ދޭތެރޭ އޮންނަން ޖެހޭ އެންމެ މަތިވެރި ގުޅުން އެދެބަފައިންގެ ކިބައިން ފެނެ އެވެ.

ނަޒޫ ބުނި ގޮތުގައި ބިދޭސީ މެއިޑް މީހާ ފެންވަރާއި ރީތިވެ ހެދުމަށް އަދި އަރާމް ކުރުމަށް އެ މީހުން ހިފާފައި ހުންނަ އެޕާޓްމަންޓަށް ފޮނުވަ އެވެ. ނަމަވެސް ފަހު ރޭ ފޮނުވި ފަހުން ދެން ހަބަރެއް ނުވި އެވެ. ތަކުރާރުކޮށް ގުޅުމުން ފޯނަށް ޖަވާބެއް ވެސް ނުދެ އެވެ. އެހެން ކަމުން އިމާރާތުގެ ސީސީޓީވީ ފްޓޭޖް ބެލި އެވެ. 

"ސީސީޓީވީ ފްޓޭޖް ބެލުމުން މި ފެންނަނީ ހަމަޖެހިލައިގެން ފިލާތަން. އަޅުގަނޑުމެން މިކޮޅަށް ގެނައި ވަރަށް ގިނަ އަދަދެއްގެ ފައިސާވެސް ވަގަާށް ގެންދިޔަ. ފަހުން ބެލިއިރު ޔަގީން ކުރެވުނު 2000 ޑޮލަރު މަދުކަން. އަދި ހަތެއް ނޫނީ ދިހަ ވަރަކަށް ހާސް ރުޕީސްވެސް ގެންދިޔަ,"

ނަޒޫ ބުނީ އެގޮތަށް އެ މީހާ ކަންކުރުމުން އޭނާާއާ މުއާމަލާތް ކުރަން ވަަރަށް މަސައްކަތް ކުރި ކަމަށެވެ. އެއީ އެ މީހާ ކުރީން ދެއްކި ވާހަކަތަކުން އޭނާއާ މެދު ހަމްދަރުދީ އޮތުމުންނެވެ.

ނަމަވެސް އޭނާގެ ފަރާތުން އެއްވެސް އެދެވޭ ޖަވާބެއް ނުލިބުނު ކަމަށެވެ. އޭގެ ބަދަލުގައި އޭނާގެ ފަރާތުން ދެން ވެސް ފެނުނީ ގަބޫލު ކުރަން ދަތި ކަަންތައްތަކެކެވެ. އެންމެ ފަހުން ނަޒޫއަށް އެ މީހާ މަރުގެ އިންޒާރުވެސް ދިނެވެ. ބިރު ދައްކާ ހެދި އެވެ.

އެހެން ކަމުން އެ މައްސަލަ އިންޑިއާގެ ފުލުހުންގެ ސަމާލު ކަަމަށް ގެނަ އެވެ.

މައްސަލަ ފުލުހަށް ހުށައެޅުމާއެކު ނޭޕާލް މީހާ ހޯދުމަށް ފުލުހުން ޚާއްސަ މަސައްކަތްތަކެއް ފެށި އެވެ. އެ މީހާގެ ފޯނުގެ ލޮކޭޝަން ބަލައިގެން ހޯދާ ހައްޔަރު ކުރި އެވެ.

އޭރު އޭނާާ ހުރީ ކުރީން ވެސް އޭނާ ވަޒީފާ އަދާކުރި ހޮޓަލެއްގަ އެވެ. 

ނަޒޫ ވަނީ މި މައްސަލާގައި އިންޑިއާ ފުލުހުންގެ ފަރާތުން ފެނުނު ޕްރޮފެޝަނަލް ކަމާއި ފުލުުހުންގެ އެހީތެރިކަމަށް ޝުކުރު އަދާކޮށްފަ އެވެ. 

އެ މީހާ މިވަގުތު ހުރީ ފުލުހުންގެ ބެލުމުގެ ދަށުގައި ކަސްޓޯޑިއަލް ޖަލެއްގަ އެވެ. އޭނާ މިހާރު ވަނީ ކުށަށް އިއުތިރާފުވެސް ވެފަ އެވެ. ވަގަށް ނެގި ފައިސާ އިން ބައެއް ބޭނުންކުރި ކަމާއި އަނެއް ބައި ފައިސާ ނޭޕާލަށް ފޮނުވާާފައިވާ ކަމަށް ވެސް އެއްބަސްވެފައިވެ އެވެ.