މުޅި ރާއްޖެއަށް ފުލުހުންގެ ހިދުމަތް ފުޅާކުރުމަށް ކުރިއަށްގެންދާ މަސައްކަތުގެ ދަށުން 6 ރަށެއްގައި ފުލުހުންގެ މަރުކަޒުތައް އެޅުމަށް ބަޔަކު ހޯދުމަށް ހުޅުވާލައިފިއެވެ.
ފިނޭންސުން ކޮށްފައިވާ އިއުލާނެއްގައިވާގޮތުން ފުލުހުންގެ މަރުކަޒުތައް އެޅުމަށް މިފަހަރު ނިންމާފައިވަނީ، ށ. ފީވަށް، ރ. މަޑުއްވަރި، މ. މުލި، ތ. ތިމަރަފުށި، ތ. ވޭމަންޑޫގެ އިތުރުން ލ. މާވަށެވެ.
ފުލުހުންގެ މަރުކަޒުތަކުގެ އިތުރުން ދެ ރަށެއްގައި ފުލުހުންގެ އެކޮމޮޑޭޝަން ބްލޮކް އިމާރާތްކުރުމަށް ބަޔަކު ހޯދަންވެސް ވަނީ އިއުލާނުކޮށްފައެވެ. ފުލުހުންގެ އެކޮމޮޑޭޝަން ބްލޮކް އިމާރާތްކުރުމަށް ހަމަޖެހިފައިވާ ރަށްރަށަކީ ހއ. ދިއްދޫ އާއި ހދ. ކުޅުދުއްފުއްޓެވެ. ފިނޭސް މިނިސްޓްރީން ބުނީ މި މަސައްކަތްތަކަށް ޝަރުޠުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދެވޭނީ ނޭޝަނަލް ކޮމްޕެޓިޓިވް ބިޑިންގ އުސޫލުގެ ތެރެއިންކަމަށެވެ.
ބީލަމުގައި ބައިވެރިވުމުގެ ފުރުސަތު މިމަހުގެ 22 ވަނަ ދުވަހާ ހަމަޔަށް ހުޅުވާލާފައިވާއިރު، ޝައުގުވެރިވާ ފަރާތްތަކުން މިމަހުގެ 29 ވަނަ ދުވަހުގެ 11 ގެ ކުރިން މަޝްރޫޢުތަކަށް ބިޑް ހުށަހަޅަންޖެހެއެވެ.
ފުލުހުންގެ މަރުކަޒުތައް އަތޮޅުތެރޭގެ ރަށްތަކުގައި ގާއިމްކުރުމަށް ކުރިއަށްގެންދާ މަސައްކަތްތަކުގެ ދަށުން މިއަހަރުގެ މާޗްމަހުގެ ތެރޭގައިވެސް ވަނީ ފުލުހުންގެ 75 މަރުކަޒު އެޅުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)، ފެނަކަ ކޯޕަރޭޝަން އަދި ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ) އާ ހަވާލުކޮށްފައެވެ.
Advertisement
This content is created and paid for by advertisers and does not involve Voice Journalists
