މިދިޔަ އަހަރުގެ ޖޫންމަހާ އަޅާބަލާއިރު، މިއަހަރުގެ އެ މުއްދަތުގެ ނިޔަލަށް ރާއްޖެއަށް ޒުޔާރަތްކުރި ފަތުރުވެރިންގެ ނިސްބަތް 9.1 އިންސައްތަ އިތުރުވެއްޖެއެވެ.

ޓޫރިޒަމް މިނިސްޓްރީގެ ތަފާސްހސާބުތަކަށް ބަލާއިރު، މިއަހަރުގެ ޖޫންމަހުގެ ނިޔަލަށް ރާއްޖެއަށް ވަނީ، 1,108,130 ފަތުރުވެރިން ޒިޔާރަތްކޮށްފައެވެ. ތަފާސްހިސާބުތަކަށް ބަލާއިރު، މިދިޔަ އަހަރުގެ ޖޫންމަހުގެ ނިޔަލަށް ރާއްޖެއަށް ޒިޔާރަތްކޮށްފައިވަނީ 1,015,527 ފަތުރުވެރިންނެވެ.

ހުސްވި ޖޫންމަހު ރާއްޖެއަށް ވަނީ 141,772 ފަތުރުވެރިން ޒިޔާރަތްކޮށްފައެވެ. މިއީ މިދިޔަ އަހަރުގެ ޖޫންމަހާ އަޅާބަލާއިރު، 15 އިންސައްތައިގެ އިތުރުވުމެކެވެ. މިދިޔަ އަހަރުގެ ޖޫންމަހު ޒިޔާރަތްކޮށްފައިވަނީ، 123,284 ފަތުރުވެރިންނެވެ. އަހަރުގެ މިހާތަނަށް ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރި ޤައުމުތަކުގެ ތެރޭގައި ހިމެނެނީ، ޗައިނާ ރަޝިއާ، އިނގިރޭސިވިލާތް، އިޓަލީ އަދި ޖަރުމަނުވިލާތެވެ.

- ޗައިނާ: 141,162

- ރަޝިއާ: 126,780

- އިނގިރޭސިވިލާތް: 108,371

- އިޓަލީ: 86,891

- ޖަރުމަނުވިލާތް: 82,188

މިދިޔަ ޖޫންމަހުގެ ދުވާލެއްގެ މައްޗަށް ރާއްޖެއަށް ޒިޔާރަތްކުރި ފަތުރުވެރިންގެ ނިސްބަތް ހުރީ 6,122 ގައެވެ. މިދިޔަމަހު ރާއްޖެއަށް އެންމެ މަދުން ފަތުރުވެރިން ޒިޔާރަތްކޮށްފައިވަނީ އީރާން/އިޒްރާއީލް މަޝްރަހް ގޯސްވުމާ ގުޅިގެން ޖޫންމަހުގެ 24 ވަނަ ދުވަހުއެވެ. އެދުވަހު ގަތަރުގެ ވައިގެ ސަރަހައްދު ބަންދުކުރުމާ ގުޅިގެން މެދުއިރުމަތީގެ ޤައުމުތަކުން ރާއްޖެއަށް އުދުހުންތައް ތާވަލްކުރި ބައެއް ފްލައިޓްތައް ކެންސަލްކުރުމާ ގުޅިގެން އެދުވަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު އުޅެނީ 3،775 ފަތުރުވެރިންނެވެ.

އަހަރުެގ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ 801,764 މީހުން ޒިޔާރަތްކޮށްފައިވަނީ، ރިސޯޓްތަކަށެވެ. ގެސްޓްއުސްތަކަށް 249,788 މީހުން ޒިޔާރަތްކުރިއިރު، ދެން އެންމެގިނައިން ފަތުރުވެރިން ޒިޔާރަތްކޮށްފައިވަނީ، ހޮޓާތަކަށެވެ. އެގޮތުން ހޮޓާތަކަށް 30,777 ފަތުރުވެރިން ޒިޔާރަތްކުރިއިރު، ސަފާރީތަކަށް 24,975 ފަތުރުވެރިން ޒިޔާރަތްކުރިއެވެ.