ތިނަދޫ ސިޓީގެ ފެރީ ޓާމިނަލް ޖެޓީއަށް ކައިރި ކުރަން އުޅުނު ލޯންޗެއް ކޮންޓްރޯލް ނުވެ ޖެޓީގައި ޖެހި ހިނގި ނުރައްކާތެރި އެކްސިޑެންޓެއްގައި ހަތަރު މީހަކަށް އަނިޔާވެއްޖެއެވެ.

ފުލުހުން ބުނީ، މި އެކްސިޑެންޓް ހިނގާފައިވާ ކަމަށް ރިޕޯޓް ކޮށްފައިވަނީ މިއަދު  މެންދުރު 13:50 ހާއިރު ކަމަށެވެ. 

މި ލޯންޗުގައި ތިން އަންހެނުންނާއި، އެއް އަހަރުގެ ތުއްތު ކުއްޖަކާއި ލޯންޗުގެ ކެޕްޓަނާއި ފަޅުވެރިޔާއާ ހިމެނޭހެން ޖުމްލަ ހަ މީހަކު ދަތުރުކޮށްފައިވާ ކަމަށް ފުލުހުން މައުލޫމާތު ދެއެވެ.

ފުލުހުން އިތުރަށް ބުނީ، މި އެކްސިޑެންޓުގައި ލޯންޗުގައި ތިބި ދެ ފަސިންޖަރަކަށާއި، ލޯންޗުގެ ކެޕްޓަނަށާއި، ފަޅުވެރިޔާއަށް އަނިޔާވެފައިވާ ކަމަށެވެ.

އަނިޔާވި މީހުންގެ ތެރޭގައި 50 އަހަރުގެ ދިވެހި ފިރިހެނެއް (ކެޕްޓަން)، 29 އަހަރުގެ ދިވެހި ފިރިހެނެއް (ފަޅުވެރިޔާ)، އަދި 25 އަހަރާއި 28 އަހަރުގެ ދެ އަންހެނުން ހިމެނެއެވެ.

ފުލުހުން ބުނީ އަނިޔާވި ފަރާތްތަކަށް މިހާރު ޑރ. އަބްދުއްސަމަދު މެމޯރިއަލް ހޮސްޕިޓަލުގައި ފަރުވާ ދެމުންދާ ކަމަށެވެ.

މި މައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.