ހުޅުމާލެ ހޮސްޕިޓަލުން ދެމުންއަންނަ ޚިދުމަތްތަށް ރައްޔިތުންނަށް ފޯރުކޮށްދިނުމުގައި ދަތިތަކެއް ހުރި ކަމަށާއި އެ ހޮސްޕިޓަލުން ދެމުން އަންނަ ޚިދުމަތްތައް ހުއްޓުމުގެ ބިރު އެބައޮތް ކަމަށް ބުނެ ހުށަހެޅި ކުއްލި މައްސަލަ ރައްޔިތުންގެ މަޖިލީހުން ބޭރުކޮށްލައިފި އެވެ.

މި ކުއްލި މައްސަލަ ރައްޔިތުންގެ މަޖިލީހަށް ހުށަހަޅުއްވާފައިވަނީ ހުޅުމާލެ ދެކުނު ދާއިރާގެ މެންބަރު ޑރ. އަޙުމަދު ޝަމްހީދު އެވެ.

މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި މި މައްސަލަ ބަލައިގަނެ، މިކަމަށް ބަހުސްކުރަން ފެނޭތޯ ނެގުނު ވޯޓުގައި ކުއްލި މައްސަލަ ބަލައިގަންނަން ވޯޓު ދެއްވާފައިވަނީ އެންމެ 10 މެންބަރުންނެވެ. ބާކީ 37 މެމްބަރަކު ވަނީ ކުއްލި މައްސަލަ މަޖިލީހުން ބޭރުކޮށްލަން ވޯޓް ދީފައިވެއެވެ.

ކުއްލި މައްސަލަ ހުށަހަޅުއްވަމުން ޑރ. ޝަމްހީދު ވިދާޅުވީ ހުޅުމާލޭ ހޮސްޕިޓަލަކީ އެވްރެޖް ގޮތެއްގައި މަހަކު 15،000 އަށްވުރެ ގިނަ މީހުން ޚިދުމަތް ހޯދަމުންދާ ހޮސްޕިޓަލެއްކަމަށާއި އަދި މަހަކު 330 އަށް ވުރެ ގިނަ މީހުންނަށް އެޑްމިޓްކޮށްގެން ހުޅުމާލޭ ހޮސްޕިޓަލުގައި ފަރުވާދެމުން އަންނަކަމަށެވެ.

ޑރ. ޝަމްހީދު ވިދާޅުވެފައިވާ ގޮތުގައި މިހާ ގިނަ އަދަދެއްގެ ބަޔަކު ސަރުކާރުން ހިންގާ ހޮސްޕިޓަލުތަކަށް ފަރުވާ ހޯދަން ދިޔުމަށް މަޖުބޫރުވެފައިމިވަނީ ޕްރައިވެޓް ހޮސްޕިޓަލްތަކާއި ކްލިނިކްތަކުން ހޯދާ ޙިދުމަތްތަކުގެ ހަރަދު އާސަންދައިން އެއްކޮށް ކަވަރުނުކުރާތީ ކަމަށާ، މިހާ ގިނަ ބަޔަކު ޚިދުމަތް ހޯދުމަށް އަންނަ އަންނަ ހޮސްޕިޓަލަކާމެދު އާންމުންގެ ޝަކުވާތަކާއި ކަންބޮޑުވުންތަކެއް އެބަހުރިކަމަށެވެ.

ހުޅުމާލޭ ހޮސްޕިޓަލަކީ ސަރުކާރުން ހިންގާ ހޮސްޕިޓަލަކަށް ވީނަމަވެސް، އެތަނުގެ ޚިދުމަތް ދިނުމަށް ބޭނުންވާ ވަސީލަތްތައް ސަރުކާރުން ގާއިމުކޮށްދީފައި ނުވާކަމަށާއި، އެކަށީގެންވާ މިންވަރަށް ބަޖެޓް ނުދިނުމުގެ ސަބަބުން ޑޮކްޓަރުންނާއި، ސްޕެޝަލިސްޓުންނާއި، ފަންނީ މީހުން ވަޒީފާއަށް ނެގުމުގައި ހުރަސްތަކަކާ ކުރިމަތިވަމުން އަންނަކަމަށް ޑރ. ޝަމްހީދު އިތުރަށް ވިދާޅުވި އެވެ.