ޣައްޒާގެ ސިއްހީ ޚިދުމަތް ފޯރުކޮށްދޭ ތަންތަނުން ތެޔޮ ހުސްވެ، ތެޔޮ ނުލިބި ތެލުގެ ދަތިކަން އިންތިހާއަށް ކުރިމަތިވެއްޖެއެވެ.

ޣައްޒާގެ އުތުރުގައި ހުންނަ އަލް ޝިފާ ހޮސްޕިޓަލާއި ދެކުނުގައި ހުންނަ ޚާން ޔޫނިސްގެ ނާސިރު ހޮސްޕިޓަލުން ބުދަ ދުވަހު ވަނީ، އެ ހޮސްޕިޓަލުތަކުން ތެޔޮ ހުސްވާން ކައިރިވެފައިވުމުގެ ސަބަބުން އެކި ފަރާތްތަކުގެ އެހީއަށް ވެސް އެދިފަ އެވެ.

މިކަމުގެ ސަބަބުން ދުވަސް ނުފުރާ ވިހާފައިވާ 100 އަށް ވުރެ ގިނަ ތުއްތު ކުދިންނާއި، 350 އެއްހާ ޑައިލިސިސް ފަރުވާ ހޯދަމުންދާ ބަލިމީހުންގެ ފުރާނައަށް ނުރައްކާވެފައިވާ ކަމަށް އަލް ޝިފާ ހޮސްޕިޓަލްގެ ޑިރެކްޓަރ، މުޙައްމަދު އަބޫ ސަލްމިޔާއާ ހަވާލާދީ އަލްޖަޒީރާގައި ރިޕޯޓްކޮށްފައިވެ އެވެ.

ޚާން ޔޫނިސްގައި ހުންނަ ނާސިރު ހޮސްޕިޓަލުން މިކަމާ ގުޅިގެން ނެރެފައިވާ ބަޔާނެއްގައި ބުނެފައިވަނީ އެ ހޮސްޕިޓަލުގެ ފިއުލް ކައުންޓަރު މިހާރު ސުމަކާ ގާތްކޮށްފައިވާ ކަމަށާއި މެޑިކަލް ޓީމުތަކުން ދަނީ "އެންމެ ފަހުގެ ނޭވާލަމުން" ކަމަށެވެ.

ނާސިރު ހޮސްޕިޓަލް ހިންގުމަށް ދުވާލެއްގެ މައްޗައް 4،500 ލީޓަރު (1،189 ގެލޯން)ގެ ތެޔޮ ބޭނުންވެއެވެ. އެހެންނަމަވެސް، މިހާރު ހުރީ އެންމެ 3،000 ލީޓަރު (790 ގެލޯން) ކަމަށް ނާސިރު ހޮސްޕިޓަލުގެ ތަރުޖަމާނު މުޙައްމަދު ސަކްރާއި ހަވާލާދީ ރޮއިޓާސް ނިއުސް އެޖެންސީގައި ރިޕޯޓްކޮށްފައިވެ އެވެ. ސަކްރު ވިދާޅުވި ގޮތުަގައި ކަރަންޓާއި އެއާކޮންޑިޝަން ނެތި ސާޖަރީތައް ހަދަން ޑޮކްޓަރުންނަށް މިހާރު ވަނީ މަޖުބޫރުވެފަ އެވެ.

އިސްރާއީލުން 2023 ވަނަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން މިއަހަރުގެ މެއި މަހުގެ ނިޔަލަށް ޣައްޒާގެ 36 ހޮސްޕިޓަލަކަށް ބޮންއަޅާ ސުންނާފަތިކުރުމުގެ ސަބަބުން މިހާރު ޣައްޒާގައި ހިންގަމުން ދަނީ އެންމެ 19 ހޮސްޕިޓަލެވެ. އަދިހަމައެހެންމެ، އިސްރާއިލުން، ޣައްޒާގައި ސިއްހީ ޚިދުމަތް ފޯރުކޮށްދޭ 1،500 އަށް ވުރެ ގިނަ ސިއްހީ ޚިދުމަތްތެރިން ވެސް ވަނީ ޝަހީދުކޮށްލައިފަ އެވެ.

ކަމާގުޅުންހުރި ފަރާތްތަކުން ބުނާގޮތުގައި ޣައްޒާގެ ހޮސްޕިޓަލުތަަކުން ތެޔޮ ހުސްވުމުގެ ކުރިން، ތެޔޮ ފޯރުކޮށް ނުދެވިއްޖެނަމަ، އެ ހޮސްޕިޓަލުތަކުން ފަރުވާ ހޯދަމުން އަންނަ އެތައް ސަތޭކަ ބައެއްގެ ފުރާނަ ގެއްލުމުގެ ފުރުސަތު ބޮޑުވާނެ އެވެ. އަދިހަމައެހެންމެ، ކުރިއަށް އޮތް ދެ ދުވަހުގެ ތެރޭގައި، ދުވަސް ނުފުރާ ވިހާފައިވާ ދިހަވަރަކަށް ތުއްތު ކުދިންނާއި، ކިޑްނީ ބައްޔަށް ފަރުވާ ހޯދަމުންދާ ބަލިމީހުން ވެސް މީގެތެރޭގައި ހިމެނުމުގެ ފުރުސަތު ބޮޑުކަމަށް އެ ފަރާތްތަކުން ވަނީ ލަފާކޮށްފަ އެވެ.

ފާހަގަކޮށްލަންޖެހޭ ގޮތުގައި އިސްރާއީލުން އެމެރިކާގެ ބައިވެރިވުމާއެކު، ފަލަސްޠީނުގެ ރައްޔިތުންނާ ދެކޮޅަށް ހިންގަމުންދާ ޖަރީމާތަކުގައި އިސްރާއީލުން ދަނީ ތަފާތު އުކުޅުތައް ބޭނުންކޮށްގެން ފަލަސްޠީނުގެ ރައްޔިތުންގެ ނަސްލު ހޭދަކުރަމުންނެވެ. އެގޮތުން ވައިގެ މަގުން ހަމަލާ ދީގެންނާއި، ބަޑީގެ ހަމަލާތަކާއި، ބަނޑުހައި ހޫނުކަމުގައި ބައިތިއްބުމުގެ އިތުރުން އަސާސީ އެހެނިހެން ޚިދުމަތްތަކުން މަހުރޫމްކޮށްގެން އިސްރާއީލުންދަނީ ފަލަސްޠީނުގެ ރައްޔިތުންގެ ނަސްލު ހޭދަކުރަމުންނެވެ.

އިސްރާއީލުގެ މި ނިރުބަވެރި އަމަލުތަކުގެ ސަބަބުން ބައިނަލްއަގުވާމީ ޖަމުއިއްޔާ ޖަމާއަތްތަކުން އިސްރާއީލުގެ މި ޖަރީމާތަށް ކުށްވެރިކޮށް ބަޔާންތައް ނެރެމުންދިޔަ ނަމަވެސް، އިސްރާއީލުން ހުރީ ފަލަސްޠީނުގެ ރައްޔިތުންނާ ދެކޮޅަށް ހިންގަމުންދާ ނިރުބަވެރި ޖަރީމާތަށް ހުއްޓާލާ ގޮތަކަށް ނޫންކަން އެބައިމީހުންގެ ވާހަކަތަކުންނާއި އަމަލުން ދަނީ ފެންނަމުންނެވެ.