އިސްރާއީލުގެ މަޝްހޫރު ދެ ސިޔާސީ ލީޑަރުން ކަމަށްވާ ޔައިރް ލަޕިޑް އާއި އެހޫދު އޮލްމަރޓް، އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އަށާއި އޭނާގެ ސަރުކާރަށް ވަރަށް ބޮޑަށް ފާޑުކިޔައިފި އެވެ.

ޔައިރް ލަޕިޑް އާއި އެހޫދު އޮލްމަރޓް އިސްރާއީލުގެ ސަރުކާރަށް ފާޑުކިޔާފައި މިވަނީ ޣައްޒާގެ ދެކުނުގައި "އިންސާނީ ސިޓީ" އެއް ބިނާކުރަން ނިންމާފައިވާކަމަށް އިސްރާއީލުގެ ސަރުކާރުން ހާމަކޮށްފައިވާ ދަނޑިވަޅެއްގަ އެވެ. ޔައިރް ލަޕިޑް އާއި އެހޫދު އޮލްމަރޓް  މިކަމާއި ގުޅިގެން ބުނެފައިވާ ގޮތުގައި ޣައްޒާގެ ދެކުނުގައި "އިންސާނީ ސިޓީއެއް" ގާއިމް ކުރުމަށް ހުށަހަޅާފައިވާ ހުށަހެޅުމަކީ ފަލަސްތީނުގެ ރައްޔިތުން "ކޮންސެންޓްރޭޝަން ކޭމްޕެއްގައި" ދާއިމީ ގޮތުން ބޭތިއްބުމުގެ ނިޔަތުގައި ކުރާކަމެއް ކަމަށް ވަނީ ބުނެފަ އެވެ. 

އިސްރާއީލުގެ ކުރީގެ ބޮޑުވަޒީރު ޔައިރް ލަޕިޑް އާއި އެހޫދު އޮލްމަރޓް މިހެން ބުނެފައި މިވަނީ އާދީއްތަ ދުވަހު އިސްރާއީލުގެ ސިފައިން ޣައްޒާއަށް ބޮން އެޅުމުގެ ސަބަބުން ފަލަސްޠީނުގެ 95 މީހުން ޝަހީދުވުމާއި ގުޅިގެންނެވެ. އިސްރާއީލުގެ އެންމެ ބޮޑު އިދިކޮޅު ޕާޓީގެ ލީޑަރު ލަޕިޑް ބުނެފައިވާ ގޮތުގައި ރަފާޙް ސިޓީގައި "އިންސާނީ ސިޓީ" ގާއިމް ކުރުމަށް ރާވާފައިވާ ޕްލޭނުން ރަނގަޅު ނަތީޖާއެއް ނުނިކުންނާނެ ކަމަށެވެ.

އިސްރާއީލު ސަރުކާރުން ބުނާ ގޮތުގައި "އިންސާނީ ސިޓީ" ގައި ފުރަތަމަ ދިރިއުޅެން ހަމަޖެހިފައިވަނީ ޣައްޒާގެ ދެކުނު އައްސޭރީގައި އޮންނަ އަލް މަވާސީގެ ތޮއްޖެހިފައިވާ ސަރަހައްދުގެ ޓެންޓްތަކުގައި ދިރިއުޅޭ 600،000 ފަލަސްތީނުގެ މީހުންނެވެ.

ސެޓެލައިޓް ފޮޓޯތަކުން ދައްކާ ގޮތުގައި ފާއިތުވި މަސްތަކުގައި އިސްރާއީލުގެ ސިފައިން ވަނީ މުޅި ރަފާޙް ސިޓީ ބިމާހަމަކޮށްލުމުގެ އޮޕަރޭޝަންތައް ވަރުގަދަކޮށްފަ އެވެ. ނިމިދިޔަ އޭޕްރީލް މަހު އެކަނިވެސް ރަފާޙް ސިޓީއިން ސުންނާފަތިވި އިމާރާތްތަކުގެ އަދަދު ގާތްގަނޑަކަށް 15،800 އަށް އަރާފައިވާކަމަށެވެ. އަދި މި ހިނގާ ޖުލައި މަހުގެ ހަތަރު ވަނަ ދުވަހުގެ ނިޔަލަށް އެ އަދަދު ވަނީ 28،600 އަށް އިތުރުވެފައިވާ ކަމަށް ކަމާގުޅުން ހުރި އިދާރާތަކުން ވަނީ ބުނެފަ އެވެ.

މީގެ އިތުރުން އިސްރާއީލުގެ ކުރީގެ ބޮޑުވަޒީރު އޮލްމަރޓް ބުނެފައިވާ ގޮތުގައި "އިންސާނީ ސިޓީ"ގެ ނަމުގައި އިސްރާއީލުގެ މިހާރުގެ ސަރުކާރުން ހިންގަން އެ އުޅޭ ޖަރީމާ ބަލައި ނުގަނެވޭ ކަމަށާއި، މިކަމަކީ މިހާރަށް ވުރެ ބޮޑަށް ފަލަސްޠީނުގެ ރައްޔިތުންގެ ނަސްލު ހޭދަކުރުމަށްޓަކައި ހިންގަން ނިންމާފައިވާ ޖަރީމާއެއް ކަމަށެވެ. 

ފާހަގަކޮށްލަންޖެހޭ ގޮތުގައި ލަޕިޑް ވަނީ 2022 ވަނަ އަހަރު އިސްރާއީލުގެ ބޮޑުވަޒީރުކަން ހަ މަސް ދުވަހު ކޮށްފަ އެވެ. އަދި އޮލްމަރޓް ވަނީ 2006 ވަނަ އަހަރުން ފެށިގެން 2009 އަށް އިސްރާއީލުގެ ބޮޑުވަޒީރުކަން ކޮށްފަ އެވެ.