ޝަންހާއީ ކޯޕަރޭޝަން އޯގަނައިޒޭޝަން (އެސް.ސީ.އޯ)ގެ ބައްދަލުވުމަށް ޗައިނާއަށް މިހާރު ވަޑައިގެން އުޅުއްވާ އިންޑިއާގެ ޚާރިޖީ ވަޒީރު ޑރ. ސުބްރަމާނިއަމް ޖައިޝަންކަރު، ޗައިނާގެ ޚާރިޖީ ވަޒީރު ވާންގް ޔީ އާއި އިއްޔެ ބައްދަލުކުރައްވައިފިއެވެ.

ޗައިނާގެ ވެރިރަށް ބެއިޖިންގައި އޮތް މި ބައްދަލުކުރެއްވުމުގައި ދެގައުމުގެ މެދުގައި ގޯސްވެފައި އޮތް ގުޅުން އަނެއްކާވެސް ރަނގަޅުވަމުން އަންނައުމުގެ މައްޗަށް ދެބޭފުޅުން ވާހަކަ ދެއްކެވިއެވެ. ޚާއްސަކޮށް ދެގައުމުގެ ސަރަހައްދީ ރޮނގުގައި ސުލްހަ ގާއިމްވެފައި އޮތުމަކީ ދެގައުމުގެ މެދުގައި އިތުބާރު ދެމެހެއްޓުމަށް އެންމެ މުހިއްމު ކަންތައްކަމަށް ޑރ. ޖައިޝަންކަރު ފާހަގަކުރެއްވިއެވެ. ހަމަ އެއާއެކު، ދެގައުމުގެ ގުޅުން އިތުރަށް ބަދަހިކުރުމަށް، ދެގައުމުގެ މެދުގައި އޮތް ވިޔަފާރީގެ ހުރަސްތައް ނައްތާލުމުގެ މުހިއްމުކަމުގެ މައްޗަށް ޑރ. ޖައިޝަންކަރު އަލިއަޅުއްވާލެއްވިކަމަށް އިންޑިއާގެ މިނިސްޓްރީ އޮފް އެކްސްޓަރނަލް އެފެއަރޒްއިން ބުންޏެވެ.

މީގެ އިތުރުން ދެގައުމުގެ މެދުގައި ސީދާ ފްލައިޓްތައް ބޭއްވުމާއި، ފްލައިޓްތައް އިތުރުކޮށް، ގުޅުވާލެވޭ ސިޓީތައް އިތުރުކުރުމާއި ބެހޭ ގޮތުންވެސް ދެބޭފުޅުން މަޝްވަރާކުރެއްވި ކަމަށްވެއެވެ.

ވާންގް ޔީގެ އިތުރުން، ޑރ. ޖައިޝަންކަރު އިއްޔެ ވަނީ ޗައިނާގެ ނައިބު ރައީސް ހާން ޝެންގް، ކޮމިއުނިސްޓް ޕާޓީގެ އިންޓަނޭޝަނަލް ޑިޕާޓްމަންޓްގެ ވަޒީރު ލިއު ޖިއަންޗާއޯއާއި ބެއިޖިންގައި ބައްދަލުކުރައްވާފައެވެ. މި ބައްދަލުވުންތައް އޮތީ އެސް.ސީ.އޯގެ ޚާރިޖީ ވަޒީރުންގެ ބައްދަލުވުމުގެ ހަވާސާ ބައްދަލުވުންތަކެއްގެ ގޮތުގައެވެ.