ތަނަކަށް ވެއްދައި ތޫނު އެއްޗަކުން ބިރުދެއްކުމަށްފަހު އެކައުންޓްގައި ހުރި ފައިސާ ފޭރުނު މައްސަލައެއް ފެންމަތިވެއްޖެ އެވެ.

މިކަމާއި ގުޅިގެން ފުލުހުން ބުނެފައިވަނީ ތޫނު އެއްޗަކުން ބިރުދައްކައި ފައިސާ ފޭރުމުގެ މައްސަލައެއް ފުލުހުންގެ ސަމާލުކަމަށް ރޭގެ 23:57 ހާއިރު އައިސްފައިވާކަމަށެވެ. މި ހާދިސާ ހިނގާފައިވަނީ ހެންވޭރު ލޮނުޒިޔާރަތްމަގުގަ އެވެ. މި މައްސަލައާއި ގުޅިގެން 2 މީހަކު ހައްޔަރު ކޮށްފައިވާކަމަށް ފުލުހުން ވަނީ ބުނެފަ އެވެ. އެއީ ނ. ވެލިދޫ، ފަރީސާ މަންޒިލް، ލުޖައިން މުޙައްމަދު (23އ)، އާއި ކ. މާލެ، ހ. ކަނޑުފިނިގެ މުޙައްމަދު ޝަފީޢު (55އ) އެވެ.

ފުލުހުން ބުނީ ފޭރުނުކަމަށް ތުހުމަތުކުރެވޭ 2 މީހުން އެ ސަރަހައްދުގައި ހުރި ގެއެއްގައި ތިބިކަމުގެ މައުލޫމާތު ލިބުމާއި ގުޅިގެން ފުލުހުން އެގެޔަށް ވަންނަން އުޅުމުން އެމީހުން ވަނީ ފުލުހުންނާ ކުރިމަތިލާ މާރާމާރީ ހިންގަން މަސައްކަތްކޮށްފައި ކަމަށެވެ. އެ ދެމީހުންގެ އަމަލުތައް ހުރި ގޮތުން ފުލުހުން ވަނީ ބާރުގެ ބޭނުންކޮށް އެމީހުން ހައްޔަރުކޮށްފަ އެވެ.

އެ ދެމީހުން ހައްޔަރުކުރަންް އުޅުމުގެ ތެރޭގައި ފުލުހުންނާ ކުރިމަތިލާ މާރާމާރީ ހިންގުމުގެ ސަބަބުން ފުލުހަކަށްވެސް ވަނީ އަނިޔާވެފައެވެ. 

މި މައްސަލައާއި ގުޅިގެން ހައްޔަރު ކުރެވުނު ދެ މީހުންގެ ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމުން ކޯޓުން ވަނީ 5 ދުވަހުގެ މުއްދަތަކަށް އެމީހުން ބަންދުކުރުމަށް އަމުރުކޮށްފަ އެވެ.

މިކަމާއި ގުޅިގެން ފުލުހުން ބުނެފައިވަނީ ފޭރުނު މައްސަލަ އާއި ފުލުހުނަށް ހަމާލާދީ ވަޖިބު އަދާކުރަމަށް ހުރަސް އެޅި މައްސަލަ ފުލުހުން ތަހުގީގު ކުރަމުން ގެންދާކަމަށެވެ.