ފަހި ދިރިއުޅުން ކޯޕަރޭޝަން (އެފްޑީސީ) އިން ހުޅުމާލޭގައި ތަރައްގީ ކޮށްފައިވާ 4000 ހައުސިން ޔުނިޓަށް މަހުގެ 10ގެ ކުރީން ކުލި ދައްކާނަމަ 100 އިންސައްތަ ސަބްސިޑީ މަންފާ ލިބޭނެ ކަމަށް އެ ކޯޕަރޭޝަނުން ބުނެފި އެވެ.

އެ ކޯޕަރޭޝަނުން ވަނީ ހައުސިން ޔުނިޓްތަކުގެ ކުއްޔާއި ސެކިއުރިޓީ ޑިޕޮސިޓާ ގުޅޭގޮތުން އުފެދިފައިވާ ކަންބޮޑުވުންތައް ސާފުކޮށްދީ ބަޔާނެެއް ނެރެފަ އެވެ.

މި ޔުނިޓްތަކުގެ ކުލީގެ ގޮތުގައި ސަރުކާރުން ހަމަޖައްސާފައި ވަނީ ދެ ކޮޓަރީގެ އެޕާޓްމަންޓަކަށް 9,000 ރުފިޔާ އަދި ތިން ކޮޓަރީގެ އެޕާޓްމަންޓަކަށް 13,000 ރުފިޔާ އެވެ. ނަމަވެސް ސަބްސިޑީ ކަނޑައަޅާ ކުލި ވަނީ ކުޑަކޮށްފަ އެވެ. ސަރުކާރުން ދޭ ސަބްސިޑީއާ އެކު ދެ ކޮޓަރީގެ އެޕާޓްމަންޓަކަށް 7,000 ރުފިޔާ އަދި ތިން ކޮޓަރީގެ އެޕާޓްމަންޓަކަށް 9,000 ރުފިޔާ އަށް ވަނީ ކުޑަވެފަ އެވެ.

ސަބްސިޑީގެ މަންފާ ލިބޭނެ ގޮތް އެފްޑީސީން މި ބަޔާނުގައި ވަނީ ސާފުކޮށްދީފަ އެވެ. އެފްޑީސީ އިން ބުނީ މި ޔުނިޓްތައް ލިބޭ މީހުންނާއެކު ހަދާ އެއްބަސްވުންތަކަކީ ޝަރީއާގެ ހަމަތަކާއި އެއްގޮތްވާ ގޮތުގެ މަތީން އެކުލަވާލެވޭ އެއްބަސްވުމެއް ކަމަށެވެ.

މި އެއްބަސްވުމުގެ ދަށުން ދައްކަން ޖެހޭ މަހު ކުއްޔާއި މެއިންޓެނަންސް ފީ އެ މަހެއްގެ 10 ވަނަ ދުވަހުގެ ކުރީން ދައްކައިފިނަމަ އެ މީހަކަށް 100 އިންސައްތަ ސަބްސިޑީ މަންފާ ލިބޭނެ ކަމަށް އެފްޑީސީން ބުންޏެވެ. އަދި މަހުގެ 16 ގެ ކުރީން ކުލި ދައްކައިފިނަމަ 75 އިންސައްތަ ސަބްސިޑީ މަންފާ ލިބޭނެ އެވެ. މަހުގެ 21 ގެ ކުރީން ކުލި ދައްކައިފިނަމަ 50 އިންސައްތަ ސަބްސިޑީ މަންފާ ލިބޭނެ ކަމަށާ މަހުގެ 26 ގެ ކުރީން ކުލި ދައްކައިފިނަމަ 25 އިންސައްތަ ސަބްސިޑީ މަންފާ ލިބޭނެ ކަމަށް ވެސް ބުންޏެވެ.

ނަމަވެސް މަހުގެ 26 ގެ ފަހުން ކުލި ދައްކާނަމަ ސަބްސިޑީ މަންފާ ނުލިބޭނެ އެވެ.

މި ޔުނިޓްގެ ސެކިއުރިޓީ ޑިޕޮސިޓްގެ ގޮތުގައި ދައްކަން ޖެހޭނީ ދެ ކޮޓަރިއަށް 15,000 އަދި ތިން ކޮޓަރިއަށް 25,000 ރުފިޔާ ކަމަށެވެ. މެއިންޓެނަންސް ފީގެ ގޮތުގައި ދެ ކޮޓަރިއަށް 1,000 އަދި ތިން ކޮޓަރިއަށް 1,500 އެވެ.