މަންޓާ އެއާލައިނުގެ މުއައްޒަފުންގެ މުސާރައިގެ އެއްބައި ރުފިޔާއިން ދޭ މައްސަލާގައި އެންމެފަހުން އެކުންފުނީގެ މުއައްޒަފުންވެސް ހަޅުތާލަކާ ދިމާލަށް ދިއުމުގެ ބިރުބޮޑުވެއްޖެއެވެ.
ރުފިޔާއިން މުސާރަދޭން ނިންމުމާ ގުޅިގެން މަންޓާގެ ބައެއް މުއައްޒަފުން ވަނީ ބައްދަލުވުމެއް ބާއްވާވައި އެކަމުގެ ކަންބޮޑުވުން ފާޅުކޮށްފައެވެ. އެގޮތުން މިއީ ދިރިއުޅުމުގެ ހަރަދުތައް ބޮޑުވެގެންދާ މި ދަނޑިވަޅުގައި މުސާރައިން ބައެއް އުނިކުރުންކަމަށް ބައްދަލުވުމުގައި ބައިވެރިވި ބައެއް މުއައްޒަފުން ވަނީ ފާހަގަކޮށްފައެވެ. މަންޓާގެ މުއައްޒަފުން ވަނީ އެމީހުންގެ ކަންބޮޑުވުން މެނޭޖްމަންޓާ ހިސާބަށް ގެންގޮސްފައެވެ.
މަންޓާއިން މުއައްޒަފުންގެ މުސާރައިގެ ބައެއް ރުފިޔާއިން ދޭގޮތަށް ނިންމީ، ޓޫރިޒަމް ސިނާއަތުގެ ކުންފުނިތަކުން ބޭންކަށް ޑޮލަރު މާރުކުރުމަށް ހަމަޖެއްސި އައު އުސޫލާ ގުޅިގެން ކުންފުންޏަށް އުނދަގޫތަކެއް ހުރިކަމަށް ބުނެއެވެ.
މަންޓާ އެއާލައިނުގެ މުއައްޒަފުން މުސާރައިގެ ކަންތަކުގައި ބައްދަލުވުމެއް ބާއްވާފައިވާއިރު، ޓީއެމްއޭގައި މަސައްކަތްކުރާ ބައެއް މުއައްޒަފުްނވެސް ވަނީ މުސާރަ ރުފިޔާއިން ދޭ މައްސަލާގައި ބައްދަލުވުމެއް ބާއްވައި އިހުތިޖާޖުކުރުމަށް ނިންމާފައެވެ. އެގޮތުން ޓީއެމްއޭގެ އެ މުއައްޒަފުން ނިންމީ ޖުލައި 26 ގައި މަސައްކަތަށް ނުނިކުންނަ ގޮތަށެވެ. އެކަމާ ގުޅިގެން ޓީއެމްއޭއިން ވަނީ މުސާރައިގެ މައްސަލާގައި ކުރިން ނިންމި ނިންމުން އަނބުރާގެންގޮސް ޑޮލަރުން މުސާރަދޭގޮތަށް ނިންމާފައެވެ.
ޓީއެމްއޭގެ މުއައްޒަފުން ހަޅުތާލަށް ނިކުތުމަށް ނިންމުމާ ގުޅިގެން ދިވެހި ޓްރެވަލް އޭޖެންޓުންގެ ޖަމިއްޔާ މަޓާޓޯއިން ވަނީ އެއީ ގަބޫލުކުރެވޭނޭ ކަމެއް ނޫންކަމަށް ބުނެފައެވެ. މިކަމާ ގުޅިގެން މަޓާޓޯއިން ނެރުނު ބަޔާނުގައި ބުނެފައިވަނީ ޓްރާންސް މޯލްޑިވްސް އެއަރވޭސްގެ މުވައްޒަފުން އިހުތިޖާޖަށް ނުކުތުމަކީ ރާއްޖޭގެ ފަތުރުވެރިކަމުގެ ސިނާއަތަށް އަގު ނުކުރެވޭ ވަރުގެ ގެއްލުމެއް ލިބިދާނެ ކަމެއްކަމަށެވެ. މަޓާޓޯއިން ބުނެފައިވަނީ ރާއްޖެ އަށް ޒިޔާރަތްކުރާ ފަތުރުވެރިންގެ ބޮޑު އިންސައްތައެއް އުފުލަމުން ދަނީ ޓީއެމްއޭގެ ސީޕްލޭންތަކުގައި ކަމަށާއި، ޕައިލެޓުން ދަތުރުކުރުން ހުއްޓާލާ އިހުތިޖާޖަށް ނިކުމެއްޖެ ނަމަ އެކަމުގެ ނޭދެވޭ އަސަރު ފަތުރުވެރިކަމުގެ ދާއިރާއަށް ކުރާނެ ކަމަށެވެ.
Advertisement
This content is created and paid for by advertisers and does not involve Voice Journalists
