ޑޮލަރުގެ ތާށިކަން ބޮޑުވެފައިވަނިކޮށް ވިޔަފާރި ބޭންކުތަކުން މަރުކަޒީ ބޭންކު މޯލްޑިވްސް މަނިޓަރީ އޮތޯރިޓީގައި ބޭރު ފައިސާއިން ބަހައްޓަންޖެހޭ ރިޒާވްގެ ނިސްބަތް ދަށްކުރުމަށް އެ އޮތޯރިޓީން ނިންމައިފިއެވެ. 

މިނިމަމް ރިޒާވް ރިކުއަމެންޓް ނުވަތަ ވިޔަފާރި ބޭންކުތަކަށް ޑިޕޮސިޓުކުރާ ފައިސާގެ ތެރެއިން މަރުކަޒީ ބޭންކުގެ ރިޒާވްގައި ބެހެއްޓުން ލާޒިމުކުރާަ އެންމެ ކުޑަ މިންވަރު ނުވަތަ މިނިމަމް ރިޒަރވް ރިކުއަރމަންޓް (އެމްއާރްއާރް) 7.5 އިންސައްތައިން 5.0 އިންސައްތައަށް ދަށްކުރުމަށް މަރުކަޒީ ބޭންކުން ނިންމާފައިވާކަން މިއަދު އެ އޮތޯރިޓީން އިއުލާނުކޮށްފައިވެއެވެ. މިއަދުން ފެށިގެން އެ ނިންމުމަށް އަމަލުކުރަން ފަށާނެއެވެ. 

މާލީ ނިޒާމުގައި ދައުރުވާ ބޭރު ފައިސާއާއި ދިވެހި ރުފިޔާ މެނޭޖުކުރުމަށް މަރުކަޒީ ބޭންކުން ބޭނުންކުރާ މި ޓޫލަކީ ވިޔަފާރި ބޭންކުތަކުގެ ޖުމްލަ ޑިޕޮސިޓުގެ ތެރެއިން މަރުކަޒީ ބޭންކުގެ ރިޒާވްގައި ބަހައްޓަންޖެހޭ ވަކި މިންވަރެއް ކަނޑައަޅައި އެ މިންވަރު ބެހެއްޓުން ލާޒިމުކުރުމުގެ ތެރެއިން މާލީ ނިޒާމުގައި ފައިސާ ދައުރުކުރާ މިންވަރު ކޮޏްޓުރޯލުކުރާ ޓޫލެކެވެ. 

އިގުތިސާދުގައި ފައިސާ ދައުރުވާ ގޮތާ ގުޅިގެން ފައިސާގެ އަގަށް އަންނަ ބަދަލުތަކާއެކު މަރުކަޒީ ބޭންކުން ރިޒާވްގައި ބޭންކުތަކުން ފައިސާ ބަހައްޓަންޖެހޭ ނިސްބަތަށް ބަދަލުތައް ގެނެއެވެ. އެގޮތުން އެ ގައުމެއްގެ ފައިސާއިން ބަހައްޓަންޖެހޭ އެމްއާރްއާރް މަތިކޮށް ބޭރު ފައިސާގެ އެމްއާރްއާރް ދަށްކުރުމަކީ މާލީ ނިޒާމުގައި ދައުރުވާ ބޭރު ފައިސާ އިތުރުކޮށް، އެ ގައުމެއްގެ ފައިސާގެ އަގު ހިފަހެއްޓުމަށް ތަންފީޒުކުރާ ފިޔަވަޅެކެވެ. 

މިވަގުތަކީ ރާއްޖޭގެ މާލީ ނިޒާމުގައި އަދި ކަޅު ބާޒާރުގައިވެސް ޑޮލަރު ލިބުން ދަތިވެ، ބޭރު ފައިސާ ދައުރުވާ މިންވަރު މަދުވުމުގެ ސަބަބުން ދިވެހި ރުފިޔާގެ އަގު ދަށްވެ ޑޮލަރުގެ އަގު މައްޗަށް އަރަމުންދާ ދުވަސްވަރެކެވެ. މަރުކަޒީ ބޭންކުން ބުނި ގޮތުގައި އެމްއާރްއާރް ދަށްކުރުމަށް ނިންމީ ބޭރު ފައިސާގެ ލިކުއިޑިޓީ އަށް ލުޔެއް ހޯދައިދިނުމުގެ ގޮތުންނެވެ. މި ފިޔަވަޅުގެ ސަބަބުން ބޭރު ފައިސާ ދައުރުވާ މިންވަރު އިތުރުވެ، ބޭންކުތަކުން ބޭރު ފައިސާއިން ލޯނުތައް ދޫކުރުމަށް މަގުފަހިވާނެ ކަމުގައި މަރުކަޒީ ބޭންކުން ބުނެއެވެ. 

އިތުރަށް މަރުކަޒީ ބޭންކުން ބުނެފައިވަނީ މި ފިޔަވަޅުގެ ސަބަބުން އިގުތިސާދީ ހަރަކާތްތައް އިތުރުވާނެ ކަމަށާއި، ބޭންކުތަކަށް ލޯނު ދޫކުރުމަށް 45 މިލިއަން ޑޮލަރު ވަގުތުން ލިބިގެންދާނެ ކަމަށެވެ. 

އެމްއެމްއޭއިން ފާހަގަކުރި ގޮތުގައި އަގުތައް ކޮންޓުރޯލުކޮށް، ފައިސާ ދައުރުވާ މިންވަރު މެނޭޖުކުރުމަށް އެ އިދާރާއިން އެހެނިހެން ވަސީލަތްތައްވެސް ބޭނުންކުރާނެއެވެ. އޯޕަން މާކެޓް އޮޕަރޭޝަންތައް، ޕޮލިސީ ރޭޓަށް ގެންނަ ބަދަލުތައް، އަދި ވަކި އަމާޒުތަކަކަށް ބިނާކޮށް ބޭރު ފައިސާގެ މާރުކޭޓަށް އަސަރުކުރުވުން ހިމެނޭކަމަށާއި، މި ވަސީލަތްތަކަށް ގެންނަ ކުދިކުދި ބަދަލުތަކުން އިގުތިސާދީ ތަރައްގީއަށް އެހީތެރިވުމާއެކު ބޭންކިން ނިޒާމަށް އޮންނަ އިތުބާރު ދެމެހެއްޓުމަށް އެ އިދާރާއިން މަސައްކަތްކުރަމުންދާކަމަށްވެސް މަރުކަޒީ ބޭންކުން ބުނެއެވެ. 

ބޭރު ފައިސާ ދައުރުވާ މިންވަރު އިތުރުކުރުމަށް ޑޮލަރުގެ އެމްއާރްއާރް ދަށްކުރި ނަމަވެސް ދިވެހި ރުފިޔާގެ އެމްއާރްއާރް ކުރިންވެސް ހުރި މިންވަރުކަމަށްވާ 10 އިންސައްތައިގަ ހިފަހެއްޓުމަށް ނިންމާފައިވާކަން މަރުކަޒީ ބޭންކުން ހާމަކުރިއެވެ. އެހެންކަމުން މާލީ ނިޒާމުގައި ބޭރު ފައިސާ ދައުރުވާ މިންވަރު އިތުރުވި ނަމަވެސް ދިވެހި ރުފިޔާ ދައުރުވާ މިންވަރު އިތުރުނުވާނެއެވެ. 

ރާއްޖެއަށް ކުރިމަތިވެފައިވާ ބޭރު ފައިސާގެ ދަތިކަމަށް ހައްލު ހޯދުމަށް އެމްއެމްއޭއިންވަނީ ބޭރު ފައިސާގެ ގާނޫނެއް އަލުން ފަރުމާކޮށް ރައްޔިތުން މަޖިލީހަށް ފޮނުވައި މަޖިލިސް މެދުވެރިކޮށް ފާސްކޮށްފައެވެ. އެއާއެކު ބޭރު ފައިސާއިން އާމްދަނީ ލިބޭ ވިޔަފާރިތަކުގެ އާމްދަނީ ރާއްޖޭގެ ބޭންކުތަކަށް ޖަމާކުރުން ލާޒިމުކޮށް އެ އާމްދަނީން ވަކި މިންވަރެއް ބޭންކުތަކަށް މާރުކުރުން ލާޒިމުކޮށްފައިވެއެވެ. 

އެ ނިންމުމަށްފަހު ބޭންކުތައް މެދުވެރިކޮށް އެމްއެމްއޭއަށް ޑޮލަރު ލިބޭ މިންވަރު އިތުރުވުމާއެކު، ވިޔަފާރިތަކަށް ޑޮލަރު ވިއްކުމަށް އެމްއެމްއޭއިން ބޭންކުތަކަށް ދޫކުރާ ޑޮލަރުގެ ނިސްބަތް 10 އިންސައްތަ އިތުރުކޮށްފައިވެއެވެ. އަދި ބޭންކުތަކަށް މާރުކުރާ ޑޮލަރުގެ 90 އިންސައްތަ މަރުކަޒީ ބޭންކަށް ނެގުމަށްފަހު އެއިން ބޮޑު ބައެއް ބޭންކުތަކަށް މަރުކަޒީ ބޭންކުން އަންނަނީ ފޯރުކޮށްދެމުންނެވެ.