މިނިވަންކަމަކީ ކޮންމެ ބަޔަކު ވެސް ބޮޑެތި ޤުރުބާނީތަކެއް ވެގެން އަމިއްލައަށް ހޯދާ އެއްޗެއްކަމަށް ދިވެހި ބަހާއި ތަރިކައާއި ސަގާފަތާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެ އެވެ.
ވަޒީރު އާދަމް ނަޞީރު މި ބީދައިން ވިދާޅުވެފައިވަނީ މިއަދު ބޭއްވި މިނިވަން ދުވަހުގެ ރަސްމީ ޖަލްސާގައި ވާހަކަ ދައްކަވަމުންނެވެ.
މިނިވަންކަމަކީ އެއްވެސް ބަޔަކު އަނެއް ބަޔަކަށް ދޭ އެއްޗެއް ނޫން ކަން ފާހަގަކުރައްވާ ވަޒީރު ވިދާޅުވީ، މިނިވަން ކަމަކީ ކޮންމެ ބަޔަކު ވެސް އެ ބަޔަކު އަމިއްލައަށް ޤުރުބާނީތަކެއް ވެގެން، މިންނެތް ތަކެއް ކޮށްގެން، ވިސްނުންތަކެއް ވިސްނައިގެން އަދި ވިސްނުންތައް ހަގީގަތަކަށް ހެދުމަށް ދުރު ރާސްތާ މަސައްކަތްތަކެއް ކޮށްގެން އަމިއްލަ އަށް ހޯދާ އެއްޗެއް ކަމަށެވެ.
އަދި ހަމައެހެންމެ، ރާއްޖޭގެ މިނިވަންކަން ދެމެހެއްޓުމަށްޓަކައި ދިވެހި ރައްޔިތުން އެއްބައިވަންތަ ބައެއްގެ ގޮތުގައި ދެމި ތިބުމުގެ މުހިއްމުކަމަށް ވަޒީރު ވަނީ ވިދާޅުވެފައެވެ. އެގޮތުން އެއްބައިވަންތަކަމަކީ މިނިވަންކަން ދިފާއުކޮށް ދެމެހެއްޓުމުގެ އެންމެ މުހިންމު އެއް އަސާސްކަމަށް މިނިސްޓަރު ވިދާޅުވިއެވެ.
1887 އިން ފެށިގެން 1965 އަށް އިނގިރޭސީންގެ ހިމާޔަތުގެ ދަށުގައި ދިވެހީން ތަޖުރިބާ ކުރި ދުވަސްތަކަކީ ދިވެހި ޤައުމުގެ މިނިވަންކަމަށް ހިޔަނި އެޅުނު ދުވަސްތަކެއްކަން ފާހަގަކުރައްވާ، އޭރުގެ ދިވެހި ސަރުކާރުން އިނގިރޭސިންގެ ހިމާޔަތުގެ ދަށުން ޤައުމު މިނިވަންކުރުމަށް ކުރި މަސައްކަތްތައް ވަޒީރު ވަނީ ފާހަގަކުރައްވާފައެވެ.
އަޅުގަނޑުމެން ހަނދާނުގަ ބަހައްޓަންޖެހޭ 60 އަހަރަކީ ވަރަށް ކުރު މުއްދަތެއް. ހަގީގަތުގަ ދިވެހި ދަޢުލަތަކީ އުފެދުނީއްސުރެ އެ ދަޢުލަތުގެ މިނިވަންކަން ދިވެހިން ކަށަވަރު ކުރަމުން އައި ދަޢުލަތެއް.
ވަޒީރު އާދަމް ނަޞީރު ވިދާޅުވި އެވެ.
އިނގިރޭސިންގެ ހިމާޔަތުގެ ދަށުން ރާއްޖެއަށް ފުރިހަމަ ސިޔާސީ މިނިވަންކަން ލިބިގެން ދިޔައީ 1965 ވަނަ އަހަރުގެ ޖުލައި މަހުގެ 26 ވަނަ ދުވަހު އެވެ. އެގޮތުން މިނިވަން ކަމުގެ އެއްބަސްވުމުގައި ރާއްޖޭގެ ފަރާތުން ސޮއި ކުރެއްވީ އޭރުގެ ބޮޑުވަޒީރު، އަދި ކުރީގެ ރައީސުލްޖުމްހޫރިއްޔާ މަރްޙޫމް އިބްރާހީމް ނާޞިރު އެވެ.
Advertisement
This content is created and paid for by advertisers and does not involve Voice Journalists
