މިދިޔަ އެޕްރީލް މަހު ކަޝްމީރުގެ އިންޑިއާ ފަޅީގައި ހިންދޫ ފަތުރުވެރިންނަށް އަމާޒުކޮށްގެން ދިން ހަމަލާގެ ފަހަތުގައިވާ މާސްޓަރމައިންޑް މަރާލައިފިކަމަށް އިންޑިއާ ސަރުކާރުން ބުނެފިއެވެ.
އޮޕަރޭޝަން މަހާދޭވްގެ ނަމުގައި ހިންގި މި އޮޕަރޭޝަންގައި ހަނގުރާމަވެރިންގެ 3 މީހުން މަރާލެވިފައިވާ ކަމަށާއި، އޭގެ ތެރޭގައި ޕަހަލްގަމްގައި ދިން ހަމަލާ ރޭވުމުގައި އިސްކޮށް އުޅުނު މީހާ ހިމެނޭކަމަށް އިންޑިއާގެ ނޫސްތަކުން ބުނެއެވެ. ހާޝިމް މޫސާ ކިޔާ މިމީހާއަކީ ލަޝްކަރޭ ތައިބާގެ ކޮމާންޑަރެކެވެ.
ޖާސޫސީ މައުލޫމާތަށް ބިނާކޮށް މި އޮޕަރޭޝަން ހިންގީ އިންޑިއާ އާމީއާއި، ޖައްމު ކަޝްމީރުގެ ފުލުހުންނާއި ސެންޓްރަލް ރިޒަރވް ޕޮލިސް ފޯސް ގުޅިގެންނެވެ. އަދި އޮޕަރޭޝަނުގެ ތައްޔާރީތަކަށް ދެ ހަފްތާއެއްހާ ދުވަސް ނެގިކަމަށްވެއެވެ. އެމީޙުން ޓްރެކްކުރަން ފެށީ ސެޓެލައިޓް ފޯނެއްގެ ސިގްނަލް އެސަރަހައްދުން ލިބިގެން، އެއަށް ފާރަލަމުން ގޮހެވެ. ހަނގުރާމަވެރިން ގެންގުޅުނު މިފޯނަކީ ޗައިނާގެ އުފެއްދުމެއްކަމަށް އިންޑިއާގެ ސަލާމަތީ މަސްދަރުތަކާއި ހަވާލާދީ އިންޑިއާ ޓުޑޭއިން ބުންޏެވެ.
ހަނގުރާމަވެރިންގެ 3 މީހުންވެސް މަރާލާފައިވަނީ ޖަންގަލި ތެރޭގައި ހުރި ގަހެއްގެ ދަށުގައި ޓެންޓް ޖަހައިގެން ނިދާފައި ތިއްބާ ހަމަލާ ދީގެންނެވެ.
Advertisement
This content is created and paid for by advertisers and does not involve Voice Journalists
