ސަރުކާރާއި ރައްޔިތުން ހިއްސާވާ ވިޔަފާރި ކުންފުނި، އެސްޓީއޯއަށް މިއަހަރުގެ ދެވަނަ ކުއާޓަރުގައި ސާފްފައިދާގެ ގޮތުގައި 163 މިލިއަން ރުފިޔާ ލިބިއްޖެއެވެ.

އެސްޓީއޯއިން އާއްމުކޮށްފައިވާ އެކުންފުނީގެ ދެވަނަ ކުއާޓަރުގެ މާލީބަޔާނަށް ބަލާއިރު، މި ކުއާޓަރުގައި ޖުމްލަ އާމްދަނީގެ ގޮތުގައި ވަނީ 3.6 ބިލިއަން ރުފިޔާ ލިބިފައެވެ. މިއީ މީގެ ކުރީގެ ކުއާޓަރާ އަޅާބަލާއިރު 12 އިންސައްތަ ދަށްވުމެ ނަނަމަވެސް މިދިޔަ އަހަރުގެ ދެވަނަ ކުއާޓަރާ އަޅާބަލާއިރު އިތުރުވުމެކެވެ. މިއަހަރުގެ ފުރަތަމަ ކުއާޓަރާ އަޅާބަލާއިރު ދެވަނަ ކުއާޓަރުގައި އާމްދަނީ ދަށްވުމުގެ މައިގަނޑު ސަބަބަކީ ތެލުގެ އަގުތަކަށް ގެނެވުނު ބަދަލުގެ އިތުރުން ތެލުގެ ޑިމާންޑް ދަށްވުމެވެ.

ދެވަނަ ކުއާޓަރުގައި ޖުމްލަ އާމްދަނީ ދަށްވުމާއިއެކު ޖުމްލަ ފައިދާގެ ގޮތުގައި ލިބިފައިވަނީ 574 މިލިއަން ރުފިޔާއެވެ. މިއީ އޭގެ ކުރީ ކުއާޓަރއާއި އަޅާ ބަލައި 2 އިންސައްތައިގެ ދަށްވުމެކެވެ. އެހެންނަމަވެސް ކުންފުނީގެ އެހެނިހެން ވިޔަފާރި ތަކުން ލިބުނު ޖުމްލަ އާމްދަނީ ވަނީ އިތުރުވެފެއެވެ.

މި ކުއާޓަރުގައި ޖުމްލަ ފައިދާގެ ގޮތުގައި 236 މިލިއަން ރުފިޔާ ލިބިފައިވާއިރު، ފުރަތަމަ ކުއާޓަރާ އަޅާބަލާއިރު، ދަށްވިނަމަވެސް އަހަރުން އަހަރަށް ބަލާއިރު ޖުމްލަ ފައިދާވެސް ވަނީ އިތުރުވެފައެވެ. މީގެ އިތުރުން ދެވަނަ ކުއާޓާރގައި އިންވެސްޓްމަންޓް އިންކަމް އިތުރުވުމާއިއެކު ނެޓް ފައިނޭންސް ކުޑަކުރެވި ޓެކްސްއަށް ކެނޑުމުގެ ކުރިން މިކުއާޓަރގެ ސާފު ފައިދާގެ ގޮތުގައި ވަނީ 198 މިލިއަން ރުފިޔާ ލިބިފައެވެ. ޓެކުހަށް ކެނޑުމަށްފަހު، ދެވަނަ ކުއާޓަރުގެ ސާފުފައިދާގެ ގޮތުގައި ވަނީ 163 މިލިއަން ރުފިޔާ ލިބިފައެވެ. 

އެސްޓީއޯގެ ބެލެންޝީޓަށް ބަލާއިރު ސަރުކާރު ކުންފުނިތަކުގެ ތެރެއިން އެސްޓީއޯއަކީ އެންމެރަނގަޅު ޖެނެރަލް ރިޒާވްއެއްވެސް އޮތް ކުންފުންޏެވެ. ދެވަނަ ކުއާޓަރ ނިމުނުއިރު އެސްޓީއޯގެ ޖެނެރަލް ރިޒާވް ހުރީ 1.4 ބިލިއަން ރުފިޔާގައެވެ.