ފުރަމާނަ ދަތުރުފުޅެއްގައި ފިލިޕީންސްގެ ރައީސް އިންޑިއާއަށް ވަޑައިގެންފިއެވެ.
މިއީ ފިލިޕީންސްގެ ރައީސް ފާޑިނަންޑް މާކޯސް ޖޫނިއަރ ވެރިކަމާއި ހަވާލުވެވަޑައިގަތްފަހުން އިންޑިއާއަށް ކުރައްވާ ފުރަތަމަ ދަތުރުފުޅެވެ. މި ދަތުރުފުޅުގައި ބޮޑު ވަޒީރު ނަރެންދްރަ މޯދީއާއިއެކު ބާއްވަވާ ރަސްމީ މަޝްވަރާތަކުގެ އިތުރުން، މާކޯސް އިންޑިއާގެ ރައީސް ޑްރޮޕަޑީ މުރްމޫ އާއިއެކު ރަޝްތްރަޕަތީ ބަވަންގައި ބައްދަލު ކުރައްވާނެއެވެ.
މާކޯސްގެ އަރިހުގައި އަނބިކަނބަލުން ލުއީސް އަރަނޭތާ މާކޯސްއާއި ފިލިޕީންސްގެ ބައެއް ވަޒީރުންނާއި ވިޔަފާރިވެރިން ބައިވެރިވެވަޑައިގަންނަވައެވެ. ދިއްލީގެ އިތުރުން މާކޯސް ބެންގަލޫރަށްވެސް ޒިޔާރަތްކުރައްވާ ގޮތަށް ވަނީ ހަމަޖެހިފައެވެ. އަދި ދަތުރުފުޅު ނިންމަވާލެއްވުމަށްފަހު އިންޑިއާއިން ފުރާވަޑައިގަންނަވާނީ މިމަހުގެ 8 ވަނަ ދުވަހުކަމަށް އިންޑިއާގެ ޚާރިޖިއްޔާއިން މައުލޫމާތުދެއެވެ.
އިންޑިއާ އާއި ފިލިޕީންސްގެ ޑިޕްލޮމެޓިކް ގުޅުމަށް 75 އަހަރު ފުރޭ މުނާސަބަތާއި ދިމާކޮށް، ފިލިޕީންސްގެ ރައީސް މާކޯސް އިންޑިއާއަށް ފުރަމާނަ ދަތުރުފުޅެއް ކުރައްވާއިރު، މި ދެޤައުމުން ގެންދަނީ ވަކިވަކިން އެކި ދާއިރާތަކުން ޗައިނާއާއި ވާދަ ކުރަމުންނެވެ. ދެކުނު ޗައިނާ ކަނޑުގައި ފިލިޕީންސްއާއި ޗައިނާ ކޮންމެ ދުވަހަކުހެން އެއްބަޔަކު އަނެއްބަޔަކާއި ކުރިމަތިލަމުންދާއިރު، ސަރަހައްދީ ބާރުވެރިކަން ހޯދުމަށާއި، އިންޑިއާ ކަނޑަށް އަތް ގަދަކުރުމަށް އިންޑިއާއާއި ޗައިނާއިންވެސް ދަނީ މަސައްކަތްކުރަމުންނެވެ.
Advertisement
This content is created and paid for by advertisers and does not involve Voice Journalists
