ލާމަރުކަޒީ ގާނޫނަށް ގެންނަ އިސްލާހަށް ހިޔާލު ހުށައަޅަން އެންމެ 19 ގަޑިއިރު
އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމުގެ ބިލަށް އާންމުންގެ ހިޔާލު ހުށައަޅަން ފުރުސަތު ހުޅުވާލައިފި އެވެ.
މި ބިލް ސަރުކާރުގެ ފަރާތުގެ ހުށައެޅީ ފުވައްމުލަކު ދެކުނު ދާއިރާގެ މެންބަރު އިބްރާހިމް ހުސައިންނެވެ. މަޖިލީހުގެ އިދާރާ އިން ބުނީ މި ބިލަށް ކޮމެންޓް ނުވަތަ ހިޔާލު ހުށައަޅަން ފުރުސަތު ހުޅުވާލާފައިވާ ކަމަށެވެ. އެ ފުރުސަތު އޮތްކަން މަޖިލީހުން ހާމަކުރީ މިއަދު އިރުއޮއްސި ހައެއް ޖެހިއިރު އެވެ. އެ ފުރުސަތު ހުޅުވާލާފައި އޮތީ މާދަމާ މެންދުރު އެކެއް ޖަަހަން ދެނެވެ.
އެހެން ކަމުން މި ބިލަށް ހިޔާލު ހުށައަޅަން ލިބެނީ އެންމެ 19 ގަޑިއިރެވެ.
ގާނޫނަށް ގެންނަން ނިންމާފައިވާ އެއް ބަދަލަކީ ކައުންސިލްތަކުން އުފައްދާ ކުންފުނިތަކުން ކުރާ ވިޔަފާރީގެ މަސައްކަތްތައް ވަކި ޝަރުތުތަކަކަށް ފެއްްތުމެވެ. އެ ގޮތުން 10 މިލިއަނަށް ވުރެ ބޮޑު އިންވެސްޓްމަންޓެއް ނުކުރެވޭނެ އެވެ. މީގެ އިތުރުން ކައުންސިލުގެ ދައުރުގެ ފަހު އަހަރުގައި ފިނޭންސް މިނިސްޓްރީއާއި އެލްޖީއޭގެ އިރުޝާދުތަކާއި ކަނޑައަޅާ އުސޫލުތަކާ ހިލާފަށް ދާއިމީ ނުވަތަ ކޮންޓްރެކްޓު މުވައްޒަފުން ވަޒީފާއަށް ނުނެގޭނެ އެެވެ.
އަދި އެ މުއްދަތުގައި ކައުންސިލުގެ އިހުތިސާސްގެ ދަށުގައި ހުރި ބިންތައް ކުއްޔަށް ދޫނުކުރެވޭނެ އެވެ. މީގެ އިތުރުން ކުރިން ޕްލޭން ނުކުރާ ތަރައްގީގެ މަޝްރޫއުތައްވެސް އެ މުއްދަތުގައި ނުފެށޭނެ އެވެ.
މިއީ ލާމަރުކަޒީ ނިޒާމު ފުނޑާލާ ރައްޔިތުންގެ އަތުގައި އޮތް ބާރު އަތުލާ މަރުކަޒީ ސަރުކާރަށް ބާރުތައް ނެގުމަށް ހުށައަޅާފައިވާ ބިލެއް ކަމަށް ބައެއް ކައުންސިލްތަކާއި އިދިކޮޅު ޕާޓީތަކުން ދެކެ އެވެ. ނަމަވެސް ސަރުކާރުން ބުނީ މިއީ ލާމަރުކަޒީ ނިޒާމު ހަރުދަނާކުރުމުގެ މުހިންމު ފިޔަވަޅެއް ކަމަށެވެ.
Advertisement
This content is created and paid for by advertisers and does not involve Voice Journalists
