ލ. މާވަށުގައި މަރާލި އެރަށު ނަލަހިޔާގޭ އުމުރުން 29 އަހަރުގެ މޫސާ އިބްރާހީމްގެ ހަށިގަނޑު އޮޓޮޕްސީ ހެދުމަށް އޭނާގެ ހަށިގަނޑު އިއްޔެގެ ވަގުތެއްގައި ބޭރަށް ފޮނުވައިފިއެވެ.

ފުލުހުން މިއަދު ބުނީ މޫސާ އިބްރާހީމްގެ ހަށިގަނޑު އޮޓޮޕްސީ ހެދުމަށް އޮގަސްޓްމަހުގެ 6 ވަނަ ދުވަހު އިންޑިއާއަށް ފޮނުވާފައިވާކަމަށެވެ. އޭނާގެ ހަށިގަނޑު އޮޓޮޕްސީ ހެދުމަށް ބޭރަށް ފޮނުވުމަށް ނިންމާފައިވާކަން ފުލުހުން ވަނީ ހުސްވި ޖުލައިމަހުގެ 30 ވަނަ ދުވަހު ބުނެފައެވެ. މޫސަގެ ހަށިގަނޑު އޮޓޮޕްސީ ހެދުމަށް ނިންމީ ފުލުހުން ކުރިއަށްގެންދާ ތަހުގީގުގެ ބޭނުމަކަށެވެ.

މޫސާ މުހައްމަދު މަރާލާފައިވަނީ، ކަރަށް ހަމަލާދީގެންނެވެ. އޭނާ މަރާލާފައިވަނީ، ޖުލައިމަހުގފެ 28 ވަނަ ދުވަހުގެ ހެނދުނުގެ ވަގުތެއްގައި މާވަށު ވޮލީކޯޓް ކައިރީގައި ހުއްޓައެވެ. އޭނާ މަރާލުމަށްޓަކައި ވަޅިން ހަމަލާދީފައިވަނީ އެވަގުތު އެރަށަށް ގޮސް އުޅުނު ހދ. ނޮޅިވަރަންފަރު، އަސަރީމަންޒިލް، އުމުރުން 29 އަހަރުގެ މުހައްމަދު އިބްރާހީމެވެ. ފުލުހުން ވަނީ ހަމަލާދިނުމަށް ބޭނުންކުރި ވަޅި ހަމަ އެދުވަހު ހޯދާފައެވެ. ވަޅި ހޯދާފައިވަނީ މޫދުންނެވެ. 

މަރުގެ މި މައްސަލާގައި ގާތިލްކަމަށް ތުހުމަތުކުރެވޭ މުހައްމަދު އިބްރާހީމް މިހާރު ހުރީ ޝަރީއަތް ނިމެންދެން ބަންދުކޮށްފައެވެ. މިހާތަނަށް ލިބުނު މައުލޫމާތަށް ބަލާއިރު ވަޅިހެރުމުގެ ހާދިސާ ހިނގާފައިވަނީ، މަސްތުވާތަކެތީގެ މުއާމަލާތެއްގެ ތެރެއިންނެވެ. އެ ދެ މީހުންނަކީވެސް މަސްތުވާތަކެތި ބޭނުންކޮށް ވިޔަފާރިކުރާ ބައެއްކަމަށް އެރަށުން ވާހަކަދެއްކި ބައެއް މީހުން ވަނީ ބުނެފައެވެ. ފުލުހުން ބުނެފައިވަނީ ގާތިލްކަމަށް ތުހުމަތުކުރެވޭ މުހައްމަދަކީ ކުށުގެ ރެކޯޑް އޮންނަ މީހެއްކަމަށެވެ.