އދ.އަތޮޅު ފަރަކަށް އުރުނު ރާއްޖެއިން ބޭރުގެ "އެމް.ވައި ބިގް ފިޝް" ނަމަކަށް ކިޔާ ޔޮޓެއް 4.8 މިލިއަން ރުފިޔާއިން ޖޫރިމަނާކޮށްފިއެވެ.
މިކަމާ ގުޅޭގޮތުން އެންވަޔަރަންމަންޓަލް ޕްރޮޓެކްޝަން އޭޖެންސީ، އީޕީއޭއިން ބުނީ، އެ ޔޮޓް ފަރަށް އުރިފައިވަނީ މިއަހަރުގެ އޭޕްރިލްމަހުގެ 28 ވަނަ ދުވަހުކަމަށެވެ. މި ޔޮޓް ރާއްޖެ އައިސްފައިވަނީ، ސީލް މޯލްޑިވްސް ޔޮޓް ސަޕޯޓް ޕވޓ ލޓޑ ގެ ލޯކަލް އޭޖެންޓް ކަމުގެ ދަށުންނެވެ. މި ޔޮޓްގެ ވެރިފަރާތަކީ ޓެމްޕަލް މެރިން އެލް.ޓީ.ޑީއެވެ.
އީޕީއޭއިން ބުނީ މި ޔޮޓް އޭގެ އެއްދުވަސްފަހުން ފަރުމަތިންވަނީ ނަގާފައިވާތީ، ފަރަށް ލިބުނު ގެއްލުންތައް ބެލުމުގެ ގޮތުން ޖޫންމަހުގެ 4ވަނަ ދުވަހު، އެ އުޅަނދުގެ ވެރިފަރާތުން އައްޔަންކުރި ސަރވެޔަރުންނާއެކު އެ ޔޮޓް ފަރަށް އެރި ސަރަޙައްދުގައި ޖޮއިންޓް ސަރވޭއެއް ވަނީ ކޮށްފައިވާކަމަށެވެ. އެގޮތުން އުޅަނދު ފަރަށް އެރި ސަރަޙައްދު ބެލި ބެލުމުން އެ ފަރުގެ 187 އަކަމީޓަރުގެ ސަރަޙައްދަކަށް ބޮޑެތި ގެއްލުންތަކެއް ލިބި، ހަލާކުވެފައިވާކަން ފާހަގަކުރެވިފައިވާކަމަށް އީޕީއޭއިން ބުންޏެވެ.
ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ޤާނޫނުގެ ދަށުން އީޕީއޭއިން ޔޮޓް ހިންގާ ކުންފުނި ޖޫރިމަނާކޮށްފައިވަނީ، މިހިނގާ އޮގަސްޓްމަހުގެ 4 ވަނަ ދުވަހެވެ. އީޕީއޭއިން ވަނީ ޓެމްޕަލް މެރިން އެލްޓީޑީ ޖޫރިމަނާ ކުރިކަން އަންގައި، 30 ދުވަހުގެ ތެރޭގައި ޖޫރިމަނާ ފައިސާ ދައްކައި ނިންމުމަށް އަންގާފައެވެ.
ބޯޓުތައް ފަރަށް އެރުމުން ބޭރުގެ އުޅަނދުތައް ޖޫރިމަނާ ކުރިނަމަވެސް އެ ފައިސާ ލިބެމުން ނުދާ މައްސަލަ ބޮޑުކަމަށް އީޕީއޭއިން ފާހަގަކުރެއވެެ.
Advertisement
This content is created and paid for by advertisers and does not involve Voice Journalists
