އެސްޓީއޯއިން ގެނައި ފިޔާ ޝިޕްމަންޓް ބާޒާރަށްނެރެ ވިއްކަން ފަށައިފި
ބާޒާރުގައި ފިޔާލިބުން ދަތިވެ، އަގުބޮޑުވުމާ ގުޅިގެން އެސްޓީއިން ގެނައުމަށް ނިންމި ފިޔާ ޝިޕްމަންޓް ރާއްޖެ ގެނެސް ވިއްކުމުގެ މަސައްކަތް ފަށައިފިއެވެ.
މިދިޔަ ހަފްތާގައި ބާޒާރުން ފިޔާ ލިބުންދަތިވެ، ފިޔާކިލޯއެއްގެ އަގު ވަނީ 75 ރުފިޔާއަށް އަރާފައެވެ. އެއާއެކު އެސްޓީއޯއިން ވަނީ ޖުލައިމަހުގެ 29 ވަނަ ދުވަހު ފިޔާ ޝިޕްމަންޓެއް ގެންނާނޭކަމަށް ބުނެފައެވެ. އެސްޓީއޯއިން މިއަދު ބުނީ އެކުންފުނިން ގެނައި ޝިޕްމަންޓް ބާޒާރަށްނެރެ ވިއްކަން ފަށާފައިވާކަމަށެވެ. އެގޮތުން އެސްޓީއޯ ޕީޕަލްސް ޗޮއިސް އަދި އެސްޓީއޯ ހޯލްސޭލްސެންޓަރުން މިވަގުތު ފިޔާ ލިބެން ހުންނާނޭކަމަށް އެކުންފުނިން ވަނީ ބުނެފައެވެ.
މި ޝިޕްމަންޓަކީ މޫސުމީ ލޮޅުންތަކުގެ ސަބަބުން ރާއްޖޭގެ ފިޔާ ސަޕްލައިއަށް ދިމާވި ދަތިތަކަކާއި ގުޅިގެން ރާއްޖޭގެ ބާޒާރުގައި ފިޔާ ލިބުމަށް ދަތިވުމުގެ ސަބަބުން މާކެޓް ސްޓޭބަލައިޒް ކުރުމަށް ގެނައި ޝިޕްމަންޓެކެވެ.
އެސްޓީއޯއިން ޕީޕަލްސް ޗޮއިސުން ފިޔާ ކިލޯއެއް މިވަގުތު ލިބެން ހުންނާނީ 15 ރުފިޔާއަށެވެ. އަދި އެސްޓީއޯ ހޯލްސޭލް ސެންޓަރުން ހޯލްސޭލްކޮށްވެސް މިވަގުތު ފިޔާ ލިބެން ހުންނާނޭކަމަށް އެކުންފުނިން ބުނެއެވެ.
Advertisement
This content is created and paid for by advertisers and does not involve Voice Journalists
