ވިޔަފާރީގެ ދާއިރާއަށް ނިކުންނަ ފަރާތްތަކަށް ހާއްސަކޮށް ބޭންކް އޮފް މޯލްޑިވްސްއިން ދޫކުރާ ސްޓާޓަޕް ގްރާންޓަށް އެދި ހުށަހެޅުމުގެ ފުރުސަތު މިއަދު ހުޅުވާލައިފިއެވެ.

ސްޓާޓްއަޕް ގްރާންޓްގެ ދަށުން މިދިޔަ ތިން އަހަރުވެސް، ކޮންމެ އަހަރަކު ބީއެމްއެލުން 2 ފަރާތަކަށް ވިޔަފާރި ފެށުމަށް ފައިސާ ދޫކުރިއެވެ. ބީއެމްއެލުން ބުނީ ބީއެމްއެލް އިސްލާމިކްގެ 10 ވަނަ އަހަރީ ދުވަހާ ގުޅުވައިގެން، މި އަހަރުގެ ސްޓާޓަޕް ގްރާންޓުން 3 ވިޔަފާރިއަކަށް ހިލޭ އެހީ ދިނުމަށް ވަނީ ނިންމާފައިވާކަމަށެވެ.

ސްޓާޓަޕް ގްރާންޓް ލިބޭ ކޮންމެ ފަރާތަކަށް 500،000 ރުފިޔާގެ ހިލޭ އެހީގެ އިތުރުން، ވިޔަފާރި ހިންގައި ކުރިއެރުވުމަށް ބޭނުންވާ ލަފާ ބޭންކުން ފޯރުކޮށްދެއެވެ. ބީއެމްއެލުން ބުނީ އާންމު ފަރުދުންނާއި އަލަށް ރަޖިސްޓްރީ ކޮށްފައިވާ ވިޔަފާރިތަކަށްވެސް މި ގްރާންޓަށް އެދި ހުށަހެޅޭނެކަމަށެވެ.

މިކަމާ ގުޅޭގޮތުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، ސްޓާޓަޕް ގްރާންޓަކީ ބޭންކުން ވިޔަފާރިތަކަށް އެހީ ފޯރުކޮށްދިނުމަށާއި ރާއްޖޭގެ ސްޓާޓަޕް ވިޔަފާރިތަކާ އޮތް ގުޅުން އިތުރަށް ހަރުދަނާ ކުރުމަށް ކުރަމުންދާ މުހިންމު މަސައްކަތެއް ކަމަށެވެ. މި ގްރާންޓުން ސްޓާޓަޕް ކޮމިއުނިޓީ މެދުވެރިކޮށް ވަޒީފާ އުފައްދައި، ވިޔަފާރީގެ އިތުރު ފުރުސަތުތައް ލިބުމަށް މަގުފަހިވެ މުޖުތަމައަށާއި އިގްތިސާދީ ވެއްޓަށް ހެޔޮ ބަދަލެއް ގެނެސްދޭނޭކަމަށް ޝަރީފް ވިދާޅުވިއެވެ.

ސްޓާޓްއަޕް ގްރާންޓަށް އެދި ހުށަހެޅުމުގެ އެންމެފަހު ތާރީހަކީ އަންނަ ސެޕްޓެމްބަރުމަހުގެ 7 ވަނަ ދުވަހެވެ. ބީއެމްއެލުން ސްޓާޓްއަޕް ގްރާންޓް ތައާރަފްކުރީ 2022 ވަނަ އަހަރެވެ.