ދިވެހި އަސްކަރިއްޔާގެ ގާބިލްކަން އިތުރުކުރުމުގެ ގޮތުން ތުރުކީ ސަރުކާރުން ހަދިޔާކުރި މަނަވަރު ރާއްޖެ އަތުވެއްޖެއެވެ.

ވޮއިސްއަށް މައުލޫމާތު ލިބުނު ގޮތުގައި ތުރުކީގެ ޓީސީޖީ ވޮލްކަން ޕީ-343 ނަމަކަށް ކިޔާ މަނަވަރު ރާއްޖެ އައިސްފައިވާއިރު، މި މަނަވަރު މިހާރު އޮތީ ހުޅުމާލެ ބޭރުގައެވެ. ތުރުކީގެ އަސްކަރީއްޔާއިން ކުރިން ބޭނުކުރި މި މަނަވަރު ރާއްޖެއަށް ހަދިޔާކުރަން އުޅޭ ވާހަކަ އެންމެ ފުރަތަމަ އާއްމުވެގެންދިޔައީ އެޤައުމުގެ ނޫސްތަކުންނެވެ. ނަމަވެސް ފަހުން އެމްއެންޑީއެފުން އާއްމުކުރި ބަޔާނެއްގައި ވަނީ އެ ވާހަކަ ޔަގީންކޮށްދީފައެވެ. އެމްއެންޑީއެފުން ބުނީ، ތުރުކީން ރާއްޖެއަށް މަނަވަރެއް ހަދިޔާކުރުމަށް ނިންމީ ދެޤައުމުގެ ދެމެދު އަސްކަރީ ގާބިލުކަން އިތުރުކުރުމުގެ އެއްބަސްވުމުގެ ދަށުންކަމަށެވެ.

ތުރުކީގެ މީޑިއާތަކުން އޭރު ބުނެފައިވަނީ އެއީ އެޤައުމުގެ އަސްކަރިއްޔާގައި މީގެ 40 އަހަރުކުރިންވެސް ބޭނުންކުރަމުން ގެންދިޔަ މަނަވަރެއްކަމަށެވެ. މި މަނަވަރު ކޮމިޝަން ކުރިތާ 45 އަހަރުވެފައިވާކަމަށް ތުރުކީގެ ނޭވަލްއިން ލިބޭ މައުލޫމާތުތަކުން އެނގެއެވެ.

ތުރުކީން ރާއްޖެއަށް ހަދިޔާކުރި މަނަވަރަކީ 58 މީޓަރު ދިގު އަދި 7.62 މީތަރު ފުޅާ މަނަވަރެކެވެ. މިއީ ގަޑިއަކު 70 ކިލޯ މީޓަރުގެ ރާސްތާއެއް ކަޑައްތުކުރުމުގެ ގާބިލުކަން ލިބިގެންވާ އުޅަނދެކެވެ. ތުރުކީން މި މަނަވަރު ފަރުމާކޮށްފައިވަނީ، މަނަވަރުގައި މިސެއިލް، ޑިފެންސް ސިސްޓަމް ހިމެނޭގޮތަށެވެ.

ރައީސް ޑރ.މުހައްމަދު މުއިއްޒު ވެރިކަމުގެ ހުވާކުރެއްވުމަށްފަހު އެންމެ ފުރަތަމަ ރަސްމީ ދަތުރުފުޅެއް ކުރެއްވީ ތުރުކީއަށެވެ. އެ ދަތުރުފުޅަށްފަހު ދެ ޤައުމުގެ ދެމެދުގައި ވިޔަފާރިއާއި، ޑިފެންސްގެ ދާއިރާއިން ގުޅުން ބަދަހިކުރުމަށް ވަނީ އެއްބަސްވުންތައް އެކުލަވާލާފައެވެ. މި އެއްބަސްވުމުެގ ދަށުން ތުރުކީވިލާތުން އަސްކަރީ ޑްރޯންތަކެއްވެސް ވަނީ ގެނެސްފައެވެ.