ސީދާ އައްޑޫސިޓީން މަހުގެ ބާވަތްތައް ރާއްޖެއިން ބޭރަށް އެކްސްޕޯޓްކުރުމުގެ މަސައްކަތް ފެށުމަށް ތައްޔާރުވަމުން އަންނަކަމަށް ސަރުކާރުގެ މަސްކުންފުނި، މިފްކޯއިން ބުނެފިއެވެ.

މިފްކޯއިން ރޭ ނެރުނު ބަޔާނުގައި ވަނީ އެކުންފުނީގެ މިހާރުގެ ހާލަތާ ވިޔަފާރިއާ ގުޅޭގޮތުން މުހިއްމު މައުލޫމާތުތަކެއް ހިއްސާކޮށްފައެވެ. މިފްކޯގެ ބަޔާނުގައި ބުނެފައިވަނީ، މަސްވެރިކަމުގެ ސިނާައަތަށް މިފްކޯގެ ހިދުމަތްތައް ފޯރުކޮށްދިނުމުގައި ގޮންޖެހުންތައް ހުރިނަމަވެސް އުފެއްދުންތެރިކަން އިތުރުކުރުމަށް ގިނަ މަސައްކަތްތަކެއް ފަށާފައިވާކަމަށެވެ.

މިފްކޯއަށް މިވަގުތު ދިމާވެފައިވާ އެންމެބޮޑު ގޮންޖެހުމަކީ މަސްގަތުމަށް ބޭނުންކުރާ އުޅަނދުފަހަރާއި، ހިންގުމަށް ބޭނުންކުރާ އިންފްރާސްޓަކްޗަރގެ އިތުރުން މެޝިނަރީ އާއި އެނޫންވެސް އާލާތްތައް މަރާމާތުކުރުމަށް ލަސްވުމުގެ ސަބަބުން ކުރިމަތިވެފައިވާ ހުރަސްތައްކަމަށް މިފްކޯއިން ވަނީ ފާހަގަކޮށްފައެވެ.

މިފްކޯގެ ބަޔާނުގައި ބުނެފައިވަނީ، އައްޑޫސިޓީން ގަންނަ މަސް ހުވަދުއަތޮޅަށް ގެންދިއުމުގެ ބަދަލުގައި ސީދާ އައްޑޫސިޓީން މަހުގެ ބާވަތްތައް ބޭރުކުރުމުގެ މަސައްކަތް ކުރިއަށްއޮތް މަސްދުވަހުގެ ތެރޭގައި ފެށުމަށް މަސައްކަތްކުރަމުންދާކަމަށެވެ. މީގެ އިތުރުން އައްޑޫގައި މަހަށް ވެލިއުއެޑް ކުރުމުގެ މަސައްކަތް މި އަހަރުގެ ތެރޭގއި ފެށުމަށް މަސައްކަތް ކުރަމުންދާކަމަށް ވަނީ ބުނެފައެވެ. 

އަދި ފަހުގެ މެޝިނަރީއާއި އާލާތްތަކާއެކު އިންވެސްޓްކުރުމަށްފަހު ހުއްޓިފައިއޮތް އެންސިސްގެ ކޭނަރީ ފެކްޓްރީ މިފްކޯގެ ބެލުމުގެ ދަށަށް ގެނައުމަށް އެކުންފުންޏާއެކު މަޝްވަރާކުރަމުން އަންނަކަމަށްވެސް މިފްކޯއިން ވަނީ ބުނެފައެވެ.

މިފްކޯއިން އެކުންފުނީގެ ހާލަތާ ބެހޭގޮތުން ބަޔާނެއް ނެރެފައިިވަނީ އޮޑިޓް އޮފީހުން މިފްކޯގެ މިދިޔަ އަހަރުގެ މާލީބަޔާނާ ގުޅޭ އޮޑިޓް ރިޕޯޓެއް ނެރެފައިވަނިކޮށެވެ. މި ރިޕޯޓްގައިވާގޮތުން މިދިޔަ އަހަރު ނިމުނުއިރު، ދިވެހިންގެ މަސްކުންފުނި މިފްކޯގެ ދަރަނި އުޅެނީ އެއް ބިލިއަން ރުފިޔާއަށް ވުރެ މަތީގައެވެ. މިފްކޯއަކީ 1977 ވުޖޫދަށް އައި ކުންފުންޏެކެވެ. މިފްކޯގައި 1،692 އަށްވުރެ ގިނަ މުއައްޒަފުން މަސައްކަތްކުރާއިރު، 4 ކާރުހާނާގެ އިތުރުން މަސްކިރާ 14 އުޅަނދާއި 20 އައިސްޕްލާންޓް ހުރެއެވެ.