ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީއަށް މިދިޔަ ޖުލައިމަހު އާމްދަނީގެ ގޮތުގައި 3.39 ބިލިއަން ރުފިޔާ ބަލައިގަނެފިއެވެ.

މީރާއިން ނެރެ އާއްމުކޮށްފައިވާ ހުސްވި ޖުލައިމަހު ދައުލަތަށް އާމްދަނީގެ ގޮތުގައި ލިބުނު ފައިސާގެ ތަފާސްހިސާބަށް ބަލާއިރު ހުސްވިމަހުގެ ތެރޭގައި ލިބުނު އާމްދަނީ 3.39 ބިލިއަން ރުފިޔާ ލިބުނުއިރު މިއީ އަންދާޒާ ކުރި އަދަދަށްވުރެ 12.8 އިންސައްތަ އަދި މިދިޔަ އަހަރުގެ އެ މުއްދަތާ އަޅާބަލާއިރު، 15.4 އިންސައްތައިގެ އިތުރުވުމެކެވެ. 

ޖުލައިމަހު މީރާއަށް ލިބުނު އާމްދަނީގެ 49 އިންސައްތައަކީ އިންކަމް ޓެކްސްގެ ގޮތުގައި ލިބުނު ފައިސާއެވެ.

ޖުލައިމަހު އެންމެގިނައިން އާމްދަނީ ލިބިފައިވަނީ، އިންކަމްޓެކްސް، ޖީއެސްޓީ، ގްރީންޓެކްސް، އެއާޕޯޓް ޑިވެލޮޕްމަންޓް ފީގެ އިތުރުން ޑިޕާޗާ ޓެކްސްގެ ގޮތުގައެވެ. އެގޮތުން ޖުލައިމަހު އިންކަމް ޓެކްސްގެ ގޮތުގައި 1.6 ބިލިއަން ރުފިޔާ ލިބުނުއިރު، ޖީއެސްޓީގެ ގޮތުގައި ވަނީ 1.07 ބިލިއަން ރުފިޔާ ލިބިފައެވެ. މީގެ އިތުރުން ގްރީން ޓެކްސްގެ ގޮތުގައި 159 މިލިއަން ރުފިޔާ އަދި އެއަޕޯޓް ޑިވެލޮޕްމަންޓް ޗާޖްގެ ގޮތުގައި ވަނީ 149 މިލިއަން ރުފިޔާ ވަނީ ލިބިފައެވެ.

މީރާގެ ޖުލައިމަހު އާމްދަނީ ރިޕޯޓަށް ބަލާއިރު އެމަހުގެ ތެރޭގައި ލިބުނު 3.39 ބިލިއަން ރުފިޔާގެ ތެރެއިން 3.03 ބިލިއަން ރުފިޔާ އަކީ ޓެކްސްގެ ގޮތުގައި ލިބުނު އާމްދަނީއެވެ. އަދި 355 މިލިއަން ރުފިޔާ އަކީ އެކިއެކި ފީގެ ގޮތުގައި ބަލައިގަތް ފައިސާއެވެ.