ރައްޔިތުންގެ މަޖިލީހުގެ މެމްބަރުންނަށް އެކަށީގެންވާ މުސާރައެއް ނުލިބޭކަމަށް ވިދާޅުވެ، މަޖިލީހުގެ އާއްމު ކޮމިޓީގައި މިއަދު އެވާހަކަ ދައްކަވައިފިއެވެ.

މިއަދު ބޭއްވި އާއްމު ކޮމިޓީގައި ބައިވެރިވެ ވަޑައިގެންނެވި ބައެއް މެމްބަރުން ވިދާޅުވީ، އެބޭފުޅުން އަދާކުރައްވަމުންގެންދަވާ މައްސޫލިއްޔަތާ އަޅާބަލާއިރު، އެކަށީގެންވާ އަދަދެއް ލިބިވަޑައިނުގަންނަވާކަމަށާއި، މުސާރަ މުރާޖައާކުރަން ފެންނަަމަށެވެ. 

ބައެއް މެމްބަރުން ވިދާޅުވީ ރައްޔިތުންގެ މަޖިލީހުގެ މެމްބަރުންގެ މުސާރައާއި އިނާޔަތްތަކާ ގުޅޭގޮތުން ރައްޔިތުންނަށް އެންމެ އެކަށީގެންވާގޮތެއްގައި އެކަމުގެ މައުލޫމާތު ލިބިފައިނުވާކަމަށެވެ. އެގޮތުން ރައްޔިތުންނަށް ހީވެފައި އޮންނަނީ މެމްބަރުންގެ މުސާރައަކީ އެއްލައްކަ ރުފިޔާ ނުވަތަ 80 ހާސް ރުފިޔާ ކަމަށާއި، ނަމަވެސް އެއީ ހަގީގަތެއް ނޫންކަމަށް މެމްބަރުން ވަނީ ވިދާޅުވެފައެވެ. މުސާރައިގެ ގޮތުގައި މެމްބަރުންނަށް ލިބެނީ 42،500 ހާސްރުފިޔާ ކަމަށާއި، އެގޮތުން މަސް ނިމިގެންދާއިރު ކުރަންޖެހޭ ހަރަދުތައް ކޮށްފައި އިތުރަށް ހަރަދުކުރާނެ ފައިސާ ނުހުންނަކަމަށް ބެއް މެމްބަރުން ވަނީ ފާހަގަކުރައްވާފައެވެ.

ތިމަރަފުށީ ދާއިރާގެ މެމްބަރު އަހުމަދު ރިޔާޒް ވިދާޅުވީ، މާލޭގައި ދިރިއުޅެން ޖެހޭއިރު، ލިވިން އެލަވަންސްްގެ ގޮތުގައި 20،000 ރުފިޔާ ލިބޭއިރު ދިރިއުޅެން ޖެހެނީ 3 ކިޓަރީގެ އެޕާޓްމަންޓެއްގައި ކަމަށާއި، އެއީވެސް 24،000 ރުފިޔާ ކަމަށާއި، އެހެންކަމުން އަތުން 4،000 ރުފިޔާ ކުއްޔަށް ހަރަދުކުރަންޖެހޭކަމަށެވެ.

މެމްބަރުންގެ ވާހަކަފުޅުގައި ވަނީ މެމްބަރުންގެ މުސާރައާ ގުޅޭގޮތުން ބައެއް މީޑިއާތައް މެދުވެރިކޮށް ރައްޔިތުންނަށް އެންމެރަނގަޅު މައުލޫމާތު ލިބެމުން ނުދާކަން ފާހަގަކުރައްވައި މަޖިލީހުގެ ތެރެއިން ތަފްސީލީގޮތެއްގައި ރައްޔިތުންނަށް އެކަން އެނގެންޖެހޭކަން ފާހަގަކުރައްވާފައެވެ.

މިއަދުގެ ކޮމިޓީގައި އެންމެފަހުން ނިންމާފައިވަނީ އެކަމާ ގުޅޭގޮތުން މަޖިލީހުގެ ރައީސް އަދި މެޖޯރިޓީ ލީޑަރާއި މައިނޯރިޓީ ލީޑަރާ އެވާހަކަތައް ހިއްސާކުރެއްވުމަށްފަހު އެކަމުގައި ގޮތެއް ނިންމުމަށެވެ. 

ރައްޔިތުންގެ މަޖިލީހުގެ ރައީސަށް 90،000 ރުފިޔާގެ މުސާރައެއް ކަނޑައަޅާފައިވާއިރު، ނައިބަށް 88،000 ރުފިޔާގެ މުސާރައެއް ލިބިވަޑައިގަންނަވައެވެ. އަދި މަޖިލީހުގެ މެމްބަރުންނަށް 80،000 ރުފިޔާގެ މުސާރައެއް ލިބިވަޑައިގަންނަވައެވެ. އެންމެފަހުން މަޖިލީހުގެ މުސާރައަށް ބަދަލުގެނެސްފައިވަނީ 2023 ވަނަ އަހަރެވެ. އޭގެ ކުރިން މެމްބަރުންގެ މުސާރައަކީ 62،000 ރުފިޔާއެވެ. އަދި ކޮމިޓީ އެލަވަންސްގެ ގޮތުގައި އޭރު 20،000 ރުފިޔާއެވެ.