ވެލާނާ އިންޓަރނޭޝަނަލް އެއާޕޯޓްގެ އާ ޓާމިނަލުން ހިދުމަތްދިން ފުރަތަމަ ބޭރުގެ އެއާލައިނަކަށް އެއަރ އަރަބިއާ ވެއްޖެއެވެ.
ވެލާނާ އިންޓަރނޭޝަނަލް އެއާޕޯޓްގެ އާ ޓާމިނަލްގެ ހިދުމަތް ރަސްމީކޮށް ފަށާފައިވަނީ ޖުލައިމަހުގެ 26 ވަނަ ދުވަހުއެވެ. އާ ޓާމިނަލްގެ ހިދުމަތް ފަށައި އެންމެފުރަތަމަ ހިދުމަތް ދިން އެއާލައިނަކީ ރާއްޖޭގެ ޤައުމީ އެއާލއިން މޯލްޑިވިއަންއެވެ. އެމްއޭސީއެލުން އޭރު ބުނެފައިވަނީ ވަނީ އޮގަސްޓްމަހުން ފެށިގެން އިތުރު އެއާލައިންތަކަށް އާ ޓާމިނަލުން ހިދުމަތް ދޭން ފަށާނޭކަމަށެވެ.
އެއަރ އަރަބިއާއިން ފުރަން އައި ފަތުރުވެރިންނަށް މިއަދު ފުރުމުގެ ކަންކަން ކުރިއަށްގެންގޮސްފައިވަނީ އާ ޓާމިނަލުންނެވެ. މިކަމަށްޓަކައި އާ ޓާމިނަލުގައި ރަސްމިއްޔާތެއް ކުރިއަށްގެންގޮސްފައިވާއިރު، މިކަން ފަށާފައިވަނީ ރެބަން ކެނޑުމުންނެވެ.
އެއާ އަރަބިއާ އިން މިހާރު ރާއްޖެއަށް ހަފްތާއަކު އެއް ފްލައިޓް ބާއްވައެވެ. އެ އެއާލައިނުގެ ދަތުރުތައް ފަށާފައިވަނީ މިދިޔަ އަހަރުގެ އޮކްޓޯބަރުމަހުގެ 27 ވަނަ ދުވަހުއެވެ. މި ދަތުރުތައް ކުރަނީ ޝާރްޖާ އިންޓަރނޭޝަނަލް އެއަރޕޯޓުން ވެލާނާ އިންޓަރނޭޝަނަލް އެއާޕޯޓަށެވެ.
އެއާ އަރަބިއާއިން ރާއްޖެއަށް ކުރާ އުދުހުންތަކުގައި ބޭނުންކުރަނީ، އެއަރބަސް ކުންފުނީގެ އޭ-320 މަރުކާގެ ބޯޓުތަކެވެ.
އެއާ އަރަބިއާއިން ވަނީ ކުރިއަށްއޮތް ޓޫރިޒަމް ސީޒަނުގައި ރާއްޖެއަށް ކުރާ ދަތުރުތައް އިތުރުކުރާނޭކަމަށް ބުނެފައެވެ. އެގޮތުން
މިއަހަރުގެ އޮކްޓޫބަރުމަހުގެ 27 ވަނަ ދުވަހުން ފެށިގެން ހަފްތާއަކު 2 ދަތުރު އިތުރުކުރާނޭކަމަށް އެ އެއާލައިނުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
