ދޮންފަނަށް ޚާއްސަ ދުވަހެއް: ބިން ހިއްކުމާއި ނެރު ބަދަލުކުރުމާއި ގޮނޑުދޮށް ހިމާޔަތް ކުރަން ހަވާލުކޮށްފި
ބ. ދޮންފަނު ބިން ހިއްކުމާއި ނެރު ބަދަލު ކުރުމާއި ގޮނޑުދޮށް ހިމާޔަތް ކުރުމުގެ މަސައްކަތް ސަރުކާރުގެ ކޮންސްޓްރަކްޝަން ކުންފުނި -- އެމްޓީސީސީއާ މިއަދު ހަވާލުކޮށް އެއްބަސްވުމުގައި ސޮއިކޮށްފި އެވެ.
މި އެއްބަސްވުމުގައި ސޮއިކޮށްފައި ވަނީ މިއަދު ދޮންފަނުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ރަށުގެ ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގަ އެވެ. ޖަލްސާގައި އެ މަޝްރޫއުގެ އެއްބަސްވުމުގައި ސޮއިކުރެއްވީ މިނިސްޓަރު މުއްތަލިބާއި އެމްޓީސީސީގެ ސީއީއޯ ސައުދީ އެވެ.
މި ތިން މަސައްކަތް ހިންގާނީ އެއް މަޝްރޫއުއެއްގެ ގޮތުގަ އެވެ.
މި މަޝްރޫއުގެ ދަށުން 13 ހެކްޓަރުގެ ބިން ހިއްކުމަށް ހަމަޖެހިފައިވެ އެވެ. ދޮންފަނަކީ ބިމުގެ ދަތިކަން ވަރަށް ބޮޑަށް ކުރިމަތިވެފައި އޮތް ރަށެކެވެ. މި މަޝްރޫއު ނިމުމުން އެ ރަށަށް ދިމާވެފައިވާ ބިމުގެ މައްސަލައަށް ބޮޑު ހައްލެއް ލިބިގެންދާނެ އެވެ.
ރައީސް ވިދާޅުވި ގޮތުގައި ދޮންފަނު ފަޅުން ހިއްކެން އޮތް އެންމެ ބޮޑަކަށް ހިއްކަވާނެ އެވެ. އަދި ނެރު ބަދަލު ކުރުމުން ބަނދަރު ބޭނުން ކުރުމުގައި މިހާރު އޮތް މައްސަލަތަކަށް ހައްލު ލިބިގެންދާނެ އެވެ. މީގެ އިތުރުން އެ މަޝްރޫއުއާއެކު ގޮނޑުދޮށް ހިމާޔަތް ކުރުމުގެ މަސައްކަތް ވެސް ކުރިއަށް ގެންދާނެ އެވެ.
މީގެ އިތުރުން ވެސް ގިނަ މަސައްކަތްތަކެއް އެ ރަށުގައި ކުރިއަށް ގެންދަވާނެ ކަން ރައީސް ވަނީ އިއުލާނު ކުރައްވާފަ އެވެ. އެގޮތުން ފުޓްސަލް ދަނޑު އަލުން ތަރައްގީ ކުރާނެ ކަމަށް ވިދާޅުވި އެވެ. އެ ދަނޑު ތަރައްގީ ކުރާނީ ހޭންޑްބޯލް ވެސް ކުޅެވޭ ގޮތަށް ކަމަށް ރައީސް ވިދާޅުވި އެވެ.
އަދި ވޮލީ ކޯޓެއް ހެދުމާއި ފިޓްނެސް ރިކްރިއޭޝަން ސެންޓަރެއް އިމާރާތް ކުރުމުގެ އިތުރުން އައުޓް ޑޯ ޖިމެއް ގާއިމުކުރުން ވެސް ހިމެނެ އެވެ.
މީގެ އިތުރުން އެ ރަށުގައި ހުއްޓިފައިވާ ފެނާއި ނަރުދަމާގެ މަޝްރޫއު އަލުން ފައްޓަވާނެ ކަމަށް ވެސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
