ނުނިމި ދިގިލަމުންދާ ބ.މާޅޮހުގެ ބަނދަރުގެ މަސައްކަތް ދެން ލަސްނުވެ ކުރިއަށްދާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ބ.އަތޮޅަށް މިހާރު ކުރައްވަމުން ގެންދަވާ ދަތުރުގެ ތެރެއިން މިއަދު މާޅޮހަށް ވަޑައިގެން އެރަށުގެ ރައްޔިތުންނާ ވާހަކަދައްކަވަމުން ރައީސް ޑރ.މުއިއްޒު ވިދާޅުވީ، މާޅޮހު ބަނދަރުގެ މައްސަލައަކީ އެންމެ މުހިއްމުކަމެއް ދީގެން ހައްލުކުރައްވާނެކަމަށް ދެންނެވި އެއް މައްސަލަ ކަމަށާއި މި ސަރުކާރުން ބަނދަރުގެ މަސައްކަތް ނިންމާނޭކަމަށެވެ. މީގެ ކުރިން ބަނދަރު މަރާމާތުކުރުން ލަސްވެގެން ދިޔަނަމަވެސް ބަނދަރުގެ މަސައްކަތް ލަސްނުވާނޭކަމަށް ރައިސް ޑރ.މުއިއްޒު ވިދާޅުވިއެވެ.
ރައީސް ވިދާޅުވީ މިހާރު ބަނދަރުގެ މަސައްކަތް ކުރިއަށްދާ ސްޕީޑް ކުރިއަށްއޮތްތަނުގައި އިތުރުކުރެވޭނޭކަމަށާއި، ބޮޑުހިލަ ހޯދުމުގެ ކަންކަމުގައި ކުރަންހުރި ކަންކަން އަދިވެސް އެބަހުރިކަމަށެވެ. ބޮޑުހިލައާ ގުޅޭކަންކަން ލަސްވީ ފައިސާ ހޯދުމުގައި ހުރި ލަސްތަކެއް ހުރުމުން ނަމަވެސް މިހާރު އެކަން ހައްލުވެ ނިމިފައިވާކަން ރައީސް ފާހަަގަކުރެއްވިއެވެ.
ރައީސް ވިދާޅުވީ ބަނދަރުގެ މަޝްރޫޢުއާ ގުޅިގެން މާޅޮހުގައި އިތުރު ކަންކަންވެސް ކުރަން އެބަހުރިކަމަށާއި އެގޮތުން ރަށް ގިރުމުގެ މައްސަލަ ހައްލުކުރުމަށްވެސް ސަރުކާރުން ތައްޔާރުވަމުން އަންނަކަމަށެވެ. މީގެ އިތުރުން ބަނދަރު ބޮޑުކުރެވޭއިރު، ރަށުގެ އިންޖީނުގެ އެހެން ދިމާލަކަށް ބަދަލުކުރުމުގެ ކަންކަންވެސް ކުރެވޭނޭކަމަށް ރައީސް ވިދާޅުވިއެވެ.
މާޅޮހު ބަނދަރު... ފޮޓޯ: ޢަބްދުﷲ ހުސައިން
މާޅޮހު ބަނދަރުގެ މައްސަލައަކީ ހައްލުނުވެ ވަރަށް ދިގުލައިގެން ގޮސްފައިވާ ކަމެއްކަމަށް މާޅޮހު ރައްޔިތުން ފާހަގަކުރެއެވެ. މާޅޮހުގެ ބަނދަރު ހަލާކުވެފައި އޮންނަތާ 14 އަހަރު ވެގެންގޮސްފައިވާއިރު، މިދިޔަ ސަރުކާރުތަކުގައިވެސް އެރަށު ބަނދަރު މަރާމާތުކޮށްދިނުމަށް އެދުނެވެ. ނަމަވެސް އެކިއެކި ސަބަބުތަކާހެދި އެމަސައްކަތް ކުރިއަށްްގެންގޮސް ނިންމާލެވިފައެއް ނުވެއެވެ.
މާޅޮހު ބަނދަރު މަރާމާތުގެ މަސައްކަތް އެރަށު ރައްޔިތުން ކުރަނީ... ފޮޓޯ: މާޅޮހު ކައުންސިލް
މާޅޮހު ބަނދަރު ހަލާކުވީ 2004 ވަނަ އަހަރުގެ ޑިސެމްބަރުމަހު ރާއްޖެއަށް އެރި ސުނާމީ ކާރިސާގައެވެ. މާޅޮހު ބަނދަރަކީ އަމިއްލަ ފަރާތެއްގެ ދީލަތި އެހީއާއެކު 1999 ވަނަ އަހަރު ހެދި ބަނދަރެކެވެ. މާޅޮހު ބަނދަރު މަރާމާތުކުރުމުގެ މަސައްކަތް މިހާތަނަށްވެސް ކުރަމުން އައީ އެރަށުގެ ރައްޔިތުން އަމިއްލަ މަސައްކަތުންކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
