މާލީ ގާބިލްކަން ނެތް ދައުލަތުގެ ކުންފުނިތަކަށް ތަރައްގީގެ މަޝްރޫއުތައް ދިނުން ހުއްޓާލައި، އަމިއްލަ ކުންފުނިތަކަށް ޕްރޮޖެކްޓްތައް ލިބޭގޮތް ހަދައިދިނުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ރައީސް އަބްދުﷲ ޝާހިދު ސަރުކާރަށް ގޮވާލައްވައިފި އެވެ.
ސޯޝަލް މީޑިއާގައި މިއަދު ކުރެއްވި ޕޯސްޓެއްގައި ޝާހިދު ވިދާޅުވީ ރަށްރަށުގައި ސަރުކާރުން ކުރިޔަށް ގެންދާ މަޝްރޫއުތައް އަމިއްލަ ކުންފުނިތަކާއި ހަވާލު ނުކޮށް ދައުލަތުގެ ކުންފުނިތަކަށް އެކަނި މަޝްރޫއުތައް ހަވާލު ކުރަމުންދާ ދިއުމުގެ ނަތީޖާއެއްގެ ގޮތުން ކުދި އަދި މެދުފަންތީގެ ކުންފުނިތަކަށް އާމްދަނީ ލިބޭނެ މަގުތައް ބަންދު ވެފައިވާ ކަމަށެވެ.
އަދި އެކަމުގެ ސަބަބުން އިގްތިސާދުގައި ދައުރުވާ ފައިސާ މަދުވެ، އާންމު ރައްޔިތުންގެ ދިރިއުޅުމަށް އެކަމުގެ ސަބަބުން ބޮޑެތި ދަތިތައް ކުރިމަތިވަމުންދާކަމަށް ޝާހިދު ވިދާޅުވިއެވެ.
އެހެންކަމުން، ކުދި އަދި މެދުފަންތީގެ ކުންފުނިތަކުގެ ދަރަނިވެ، މިދަނީ ބަގުރޫޓުވާ ހިސާބަށްގޮސްފައިވާ މި ނާޒުކު ވަގުތުގައި، މާލީ ޤާބިލްކަން ނެތް ދައުލަތުގެ ކުންފުނިތަކަށް ތަރައްގީގެ މަޝްރޫއުތައް ދިނުން ހުއްޓާލައި، އަމިއްލަ ކުންފުނިތަކަށް ޕްރޮޖެކްޓްތައް ލިބޭގޮތް ހަދާ، އާންމު ރައްޔިތުން މި ދަތި ހާލުން ސަލާމަތްކުރުމަށް ދިވެހި ސަރުކާރަށް ގޮވާލައްވާ ކަމަށް ވެސް ޝާހިދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
