އަހަރުގެ މިހާތަނަށް ދައުލަތަށް އާމްދަނީގެ ގޮތުގައި ބޭރުފައިސާގެ ގޮތުގައި 880 މިލިއަނަށްވުރެ ގިނަ ޑޮލަރު ލިބިފައިވާކަމަށް މޯލްޑިވްސް އިންލަންޑް ރެވެނިއު އޮތޯރިޓީގެ ތަފާސްހިސާބުތަކުން ދައްކައިފިއެވެ.

މީރާއިން އާއްމުކޮށްފައިވާ ޖުލައިމަހު ދައުލަތަށް އާމްދަނީގެ ގޮތުގައި ލިބުނު އަދަދުތައް ދައްކުވައިދޭ ތަފާސްހިސާބަށް ބަލާއިރު، އެމަހުގެ ނިޔަލަށް ޑޮލަރުން ލިބުނު އާމްދަނީ އުޅެނީ 880.5 މިލިއަން ޑޮލަރުގައެވެ. މިއީ އޭގެ ކުރީ އަހަރުގެ މި މުއްދަތާ އަޅާބަލާއިރު، 242.6 މިލިއަން ޑޮލަރުގެ އިތުރުވުމެކެވެ.

މިއަހަރުގެ މިހާތަނަށް ޑޮލަރުން އެންމެގިނައިން އާމްދަނީ ލިބުނީ ޓޫރިޒަމް ދާއިރާގެ ޖީއެސްޓީންނެވެ. ފުރަތަމަ ހަ މަސްދުވަހުގެ ތެރޭގައި ޓީޖީއެސްޓީގެ ގޮތުގައި 440 މިލިއަނަށްވުރެ ގިނަ ޑޮލަރު ލިބުނުއިރު، މިދިޔަ އަހަރު އެ އަދަދު އުޅެނީ 427 މިލިއަން ޑޮލަރުގައެވެ. ޓީޖީއެސްޓީ ފިޔަވައި ދެން އެންމެގިނައިން ބޭރުފައިސާގެ ގޮތުގައި އާމްދަނީ ލިބިފައިވަނީ، އިންކަމް ޓެކްސް، ގްރީންޓެކްސް، އެއާޕޯޓް ޑިވެލޮޕްމަންޓްފީ އަދި ޓޫރިޒަމް ލޭންޑް ރެންޓުނެވެ. 

މިއަހަރުގެ ފުރަތަމަ ހަމަސްދުވަހު ޓެކްސް އާމްދަނީގެ ގޮތުގައި ޑޮލަރުން 700.2 މިލިއަން ޑޮލަރު ލިބުނުއިރު ޓެކްސް ނޫން އާމްދަނީގެ ގޮތުގައި ލިބުނީ 180.2 މިލިއަން ޑޮލަރެވެ. 

އަހަރުެގ މިހާތަނަށް ޑޮލަރުން 880.5 މިލިއަން ޑޮލަރު ލިބުނުއިރު، ދިވެހި ރުފިޔާއިން ލިބުނު ޖުމްލަ އާމްދަނީ އުޅެނީ 6.6 ބިލިއަން ރުފިޔާގައެވެ. އަހަރުގެ މިހާތަނަށް މީރާއަށް ޓެކްސް އާއި އެހެނިގެން ގޮތްގޮތުން 20.1 ބިލިއަން ރުފިޔާ ވަނީ ބަލައިގަނެފައެވެ. މިދިޔަ އަހަރުގެ މި މުއްދަތުގެ ތެރޭގައި މިއަދަދު އުޅެނީ، 17.6 ބިލިއަން ރުފިޔާގައެވެ.