ބުރުޕާކް ކައިރީ ހުންނަ ކުރީގެ އީޑީސީ އިމާރާތުގެ ބައިތަކެއް ވެއްޓި ގެއްލުންތަކެއް ލިބިއްޖެ
ބުރުޕާކް ކައިރީ ހުންނަ ކުރިން އެޑިއުކޭޝަން ޑިވެލޮޕްމަންޓް ސެންޓަރު ހިންގި އިމާރާތުގެ ބައިތަކެއް ވެއްޓި ގެއްލުންތަކެއް ލިބިއްޖެއެވެ.
މި ހާދިސާ ހިނގާފައިވަނީ މިއަދު 12:45 ހާއިރުއެވެ. މިކަމާ ގުޅޭގޮތުން ފުލުހުން ބުނެފައިވަނީ، އިމާރާތުގެ ބައެއް ވެއްޓިގެން އުޅޭކަމުގެ މައުލޫމާތު ފުލުހުންނަށް ލިބުނީ 13:00 ހާއިރުކަމަށެވެ.
ފުލުހުން ބުނީ އިމާރާތުގެ ވެއްޓުނު ބައިތައް ޖެހިގެންހުރި އިމާރާތުގެ އިތުރުން އެ ސަރަހައްދުގައި ޕާކްކޮށްފައި ހުރި ވެހިކަލްތަކުގެ މައްޗަށް ވެއްޓިފައިވާކަމަށެވެ. އަދި އެއްވެސް މީހަކަށް އަނިޔާވިކަމެއް އެނގިފައެއް ނުވެއެވެ.
އިމާރާތުގެ ބައިތައް ވެއްޓިފައި
އެގޮތުން ދެ ސައިކަލާއި 2 ކާރަށް އިމާރާތުގެ ބައިތައް ވެއްޓިފައިވާކަން ފުލުހުން ބުންޏެވެ. ފުލުހުން ބުނީ މި ހާދިސާގެ މައުލޫމާތު ކަމާބެހޭ އިދާރާތަކާ ހިއްސާކޮށް އެހާދިސާ އާ ގުޅިގެން ބަލަންޖެހޭ ކަންކަން ބަލަމުން އަންނަކަމަށެވެ.
އިމާރާތުގެ ބައިތައް ވެއްޓުނު މި އިމާރާތަކީ ކުރިން ޤައުމީ ޔުނިވަރސިޓީން ބޭނުންކުރަމުންދިޔަ އިމާރާތެކެވެ. ނަމަވެސް އިމާރާތް ވަރަށްބޮޑަށް ހަލާކުވެ ބާވުމުގެ ސަބަބުން ފަހުން އެއްވެސް ބަޔަކު އެތަން ބޭނުންކޮށްފައެއް ނުވެއެވެ.
މާލޭގައި ގިނަދުވަސްވީ ސަރުކާރުގެ ގިނަ އިމާރާތްތަކެއް ހުރިއިރު، ބައެއް އިމާރާތްތައް މިހާރު ތަޅާލުމުގެ މަސައްކަތް ވަނީ ފަށާފައެވެ. އެގޮތުން އޯކިޑް ޕަލާޒާ ތަޅާލުމުގެ އަމަލީ މަސައްކަތް ސަރުކާރުގެ މުއައްސަސާތަކުން ވަނީ ފަށާފައެވެ.
Advertisement
This content is created and paid for by advertisers and does not involve Voice Journalists
