ޗައިނާގެ ހާރިޖީ ވަޒީރު، ވާންގް ޔީ މާދަމާ އިންޑިއާއަށް ވަޑައިގަންނަވަނީ
ޗައިނާގެ ޚާރިޖީ ވަޒީރު ވާންގް ޔީ، މާދަމާގެ ވަގުތެއްގައި އިންޑިއާއަށް ވަޑައިގަންނަވާނެ ގޮތަށް ހަމަޖެހިއްޖެއެވެ.
ދެބަސްވުން އުފެދިފައިވާ ބޯޑަރުގެ މައްސަލައިގައި ދެގައުމުގެ މެދުގައި އޮތް ނުތަނަވަސްކަން ކުޑަވެ، މަޝްވަރާގެ މޭޒު ދޮށަށްދާން ދެގައުމުންވެސް އެއްބަސްވެފައިވަނިކޮށް، ވާންގް ޔީ އިންޑިއާއަށް ކުރައްވާ 3 ދުވަހުގެ ދަތުރުފުޅަކީވެސް އެމަޝްވަރާތަކާއި ގުޅޭ ދަތުރުފުޅެއްކަމަށް ނިމުނު ހަފްތާ ބަންދުގައި ޗައިނާގެ ޚާރިޖިއްޔާއިން ނެރުނު ބަޔާނެއްގައި ބުނެފައިވެއެވެ.
ވާންގް ޔީގެ މި ދަތުރުފުޅުގައި ދެގައުމުގެ ސަރަހައްދީ އިމުގެ މައްސަލައިގައި އިންޑިއާގެ ޤައުމީ ސަލާމަތާއި ބެހޭ މުޝީރު އަޖިތު ދޯވާލްއާއެކު މަޝްވަރާކުރައްވާނެއެވެ. މި މަޝްވަރާތަކަކީ މިމަހުގެ ފަހުކޮޅު އިންޑިއާގެ ބޮޑުވަޒީރު ނަރެންދްރަ މޯދީ ޗައިނާއަށް ކުރައްވާ ރަސްމީ ދަތުރުފުޅުގެ ކުރިން ދެގައުމުންވެސް ބާއްވަން ބޭނުންވި މަޝްވަރާތަކެކެވެ.
ވާދަވެރިކަން ބޮޑު މި ދެގައުމުގެ މެދުގައި މިދިޔަ އޮކްޓޯބަރު މަހުން ފެށިގެން މަޝްވަރާތައްކުރެވި، ދެގައުމުގެ މެދުގައި އުފެދިފައިވާ ނުތަނަވަސްކަމަށް ކޮންމެވެސް ވަރެއްގެ ހައްލުތަކެއް ވަނީ ލިބިފައެވެ. އިންޑިއާއާއި ޗައިނާ އާ ދެމެދު އޮންނަ ނުތަނަވަސްކަން އިތުރަށް ގޯސްވީ 2020 ވަނަ އަހަރު ސަރަހައްދީ އިމުގައި ދެގައުމުގެ ސިފައިންގެ މެދުގައި ހިނގި ކުރިމަތިލުންތަކަށްފަހުއެވެ. މި ކުރިމަތިލުންތަކުގައި ދެގައުމުގެ ސިފައިންވެސް މަރުވެ، ގިނަ ބަޔަކަށް އަނިޔާތަކެއްވެސް ލިބުނެވެ. އެއަށްފަހު މިދިޔަ ދުވަސްތަކުގައި ބޯޑަރު ބަންދުކޮށް، ދެގައުމުގެ މެދުގައި ވައިގެ ދަތުރުފަތުރުވެސް މެދުކަނޑާލިއެވެ.
މިހަފްތާގައި ބާއްވާ މަޝްވަރާތަކަށްފަހު އަނެއްކާވެސް ދެގައުމުގެ ގުޅުން ކޮންމެވެސް ވަރަކަށް ރަނގަޅުވާނެކަމަށް ދެގައުމުގެ ނޫސްވެރިންވެސް އަންދާޒާކުރެއެވެ.
Advertisement
This content is created and paid for by advertisers and does not involve Voice Journalists
