އިންޑިއާގެ ޚާރިޖީ ވަޒީރު ޑރ. ސުބްރަމާނިއަމް ޖައިޝަންކަރު، ރަޝިޔާގެ ޚާރިޖީ ވަޒީރު ސަރްގޭ ލަވްރޯފް އާއި ބުރާސްފަތި ދުވަހު މޮސްކޯގައި ބައްދަލުކުރެއްވުމަށް ނިންމަވައިފިއެވެ.
ރަޝިޔާގެ ޚާރިޖިއްޔާއިން ބުނީ ދެ ޚާރިޖީ ވަޒީރުންގެ ބައްދަލުވުމުގައި ރަޝިޔާއާއި އިންޑިއާގެ ބައިލޭޓަރަލް ގުޅުމާއި ބެހޭ ގޮތުންނާއި، ބައިނަލްއަޤްވާމީ މައިދާނުގައި ދެޤައުމު ގުޅިގެން މަސައްކަތްކުރުމާއި ބެހޭ ގޮތުން މަޝްވަރާކުރައްވާނެ ކަމަށެވެ. މިއީ އިންޑިއާއިން އެމެރިކާއަށް އެތެރެކުރާ މުދަލުން ނަގާ ޓެރިފް ބޮޑުކުރުމުގެ އެއް ހުއްޖަތެއްގެ ގޮތުގައި، އިންޑިއާއިން ރަޝިޔާގެ ތެޔޮ ގަތުން އެމެރިކާއިން މައްސަލައަކަށް ހެދިފަހުން އިންޑިއާއާއި ރަޝިޔާގެ ޚާރިޖީ ވަޒީރުން ބާއްވާ ފުރަތަމަ ބައްދަލުވުމެވެ. އެހެންނަމަވެސް މިދިޔަ ހަފްތާގައި އިންޑިއާގެ ޤައުމީ ސަލާމަތާއި ބެހޭ މުޝީރު އަޖިތު ދޯވާލް ވަނީ ރަޝިޔާގެ ރައީސް ވްލަޑިމިއަރ ޕުޓިން އާއި ބައްދަލުކުރައްވާފައެވެ.
މިދިޔަ ޖުލައި މަހުގެ 15 ވަނަ ދުވަހު ޝަންހާއީ ކޯޕަރޭޝަން ކައުންސިލްގެ ބައްދަލުވުމުގެ ހަވާސާގައިވެސް ޑރ. ޖައިޝަންކަރާއި ލަވްރޯފް ބައްދަލުކުރައްވާފައިވެއެވެ. އިންޑިއާއާއި ރަޝިޔާގެ ބައްދަލުވުންތައް އިތުރުވަމުންދާއިރު، މިދިޔަ ޖޫން މަހު ޗައިނާގެ ގިންދާއޯގައި ކުރިއަށްދިޔަ ޝަންހާއީ ކޯޕަރޭޝަން ކައުންސިލްގެ ދިފާޢީ ވަޒީރުންގެ ބައްދަލުވުމުގެ އިންޑިއާގެ ދިފާޢީ ވަޒީރު ރަޖްނާތު ސިންހާއި ރަޝިޔާގެ ދިފާޢީ ވަޒީރު އަންދްރޭ ބެލަސޯވް ބައްދަލުކުރައްވާފައިވެއެވެ.
އިންޑިއާ-ރަޝިޔާ ގުޅުން ބަދަހިވަމުން އަންނައިރު، މި އަހަރުގެ ފަހުކޮޅު ޕުޓިން އިންޑިއާއަށް ވަޑައިގަންނަވާނެކަމަށް އިންޑިއާގެ ޤައުމީ ސަލާމަތާއި ބެހޭ މުޝީރު ވަނީ ހާމަކުރައްވާފައެވެ. އަޖިތު ދޯވާލް ވިދާޅުވީ މިއަހަރުގެ ފަހުކޮޅު ޕުޓިން އިންޑިއާއަށް ވަޑައިގަންނަވާ ދަތުރުފުޅަށް އިންޑިއާއަށް އިންތިޒާރުކުރަމުންދާކަމަށާއި، ތާރީޚެއް މިހާރު ފައިނަލް ކުރެވިފައިވާނެކަމަށް ބެލެވޭ ކަމަށެވެ.
Advertisement
This content is created and paid for by advertisers and does not involve Voice Journalists
