ޖަޕާނުގެ ބޮޑުވަޒީރު ޝިގެރު އިޝިބާ އާއި އިންޑިއާގެ ބޮޑުވަޒީރު ނަރެންދްރަ މޯދީ، ދެގައުމުގެ މެދުގައި އިޤްތިޞާދީ އަދި ސަލާމަތީ ދާއިރާއިން ގުޅުން ބަދަހިކުރުމާ ބެހޭގޮތުން މަޝްވަރާކުރައްވައިފިއެވެ.

އިއްޔެ މި މަޝްވަރާތައް ކުރިއަށް ދިޔައީ ޖަޕާނުގެ ވެރިރަށް ޓޯކިޔޯގައެވެ. ޝަންހާއީ ކޯޕަރޭޝަން ކައުންސިލްގެ ބައްދަލުވުމަށް ޗައިނާއަށް ވަޑައިގެންނެވި މަގުމަތީ، މޯދީ ވަނީ ޖަޕާނަށް ރަސްމީ ދަތުރުފުޅެއް ކުރައްވާފައެވެ. މި ދަތުރުފުޅާއި މަޝްވަރާތައް ދިމާވެފައި މިވަނީ ނިއުދިއްލީ އިން އެމެރިކާގެ އައު ޓެރިފްތަކާ ކުރިމަތިލަމުންދާ، އަދި ޓޯކިޔޯ އިން އިރުމަތީ އޭޝިއާ ސަރަހައްދުގައި ޗައިނާގެ އިތުރުވަމުންދާ ނުފޫޒު ހުއްޓުވުމަށް މަސައްކަތް ކުރަމުންދާ ދަނޑިވަޅަކާއެވެ.

"ޖަޕާނާއި އިންޑިއާ އިން އެއްބަޔަކު އަނެއްބައެއްގެ ބާރުތަކުން ފައިދާ ހޯދައި، އެއްބަޔަކު އަނެއްބައެއްގެ ގޮންޖެހުންތައް ހައްލުކުރުމަށް އެހީތެރިވެ، އަދި ކުރިމަގުގެ ޖީލުތަކަށް ކުރިމަތިވާނެ މައްސަލަތައް ވެސް އެކުގައި ހައްލުކުރަން މަސައްކަތް ކުރަންވާނެ،" ދެ ބޮޑުވަޒީރުންގެ ބައްދަލުވުމަށްފަހު އޮތް ނޫސްވެރިންގެ ބައްދަލުވުމުގައި ބޮޑުވަޒީރު އިޝިބާ ވިދާޅުވިއެވެ. މި ދެ ލީޑަރުން ވަނީ އިންޑޯ-ޕެސިފިކް ސަރަޙައްދުގައި ކުރިއަށް އޮތް ދިހަ އަހަރު ދިފާޢީ އެއްބާރުލުން އިތުރުކުރުމަށާއި، ސަޕްލައި ޗެއިންތަކާއި އިންވެސްޓްމަންޓްތައް ވަރުގަދަކުރުމަށާއި، އާޓިފިޝަލް އިންޓެލިޖެންސް، ޖައްވު، ހައިސްޕީޑް ރޭލް އަދި އެހެނިހެން ޓެކްނޮލޮޖީތަކުގެ ދާއިރާއިން އެއްބާރުލުން ފުޅާކުރުމަށް އެއްބަސްވެފައެވެ. އަދި ހުނަރުވެރި މަސައްކަތްތެރިން އެއްގައުމުން އަނެއް ގައުމަށްގޮސް މަސައްކަތްކުރުމުގެ މަގު މިހާރަށްވުރެ ބޮޑަށް ހުޅުވާލުމަށްވެސް ދެބޭފުޅުން އެއްބަސްވެވަޑައިގަތެވެ.