ސަލާމަތީ މަޖިލީހުގެ ގޮނޑިއަށް ފިޖީގެ ތާއީދު އިންޑިއާއަށް
ކުރިއަށްއޮތް 2028 ވަނަ އަހަރު އދގެ ސަލާމަތީ މަޖިލީހަށް އިންޑިއާ އިންތިޚާބުކުރުމަށް ފިޖީގެ ތާއީދު ލިބޭނެކަމަށް ފިޖީއިން ހާމަކޮށްފިއެވެ.
އދގެ ސަލާމަތީ މަޖިލީހުގެ 2028-2029 ގެ ދައުރުގައި އެ ކައުންސިލްގެ ދާއިމީ ނޫން މެމްބަރު ޤައުމުތަކުގެ ތެރެއިން އިންތިޚާބު ކުރާ، އޭޝިއާ ގްރޫޕްގެ އެއް ޤައުމުގެ ސީޓަށް އިންޑިއާއިން ވާދަކުރެއެވެ. ފިޖީ އިން އިންޑިއާގެ ކެންޑިޑޭޗަރއަށް ތާއީދުކުރާކަން އެގައުމުން ހާމަކުރީ ފިޖީގެ ބޮޑުވަޒީރު މިހަފްތާގައި އިންޑިއާއަށް ކުރެއްވި ރަސްމީ ދަތުރުފުޅަށްފަހު، ދެގައުމުން ނެރުނު ގުޅިފައިވާ ބަޔާނުގައެވެ.
ދެގައުމުންވެސް ވަނީ އދ އާއި ޚާއްސަކޮށް ސަލާމަތީ މަޖިލީހުގެ މަސައްކަތްތައް ވަރުގަދަކޮށް، އދގެ އިސްލާހީ މަސައްކަތްތައް ފުޅާކުރުމާއި ބެހޭގޮތުން މަޝްވަރާކޮށްފައެވެ. އަދި ސަލާމަތީ މަޖިލީހުގެ ދާއިމީ މެމްބަރުންނާއި ދާއިމީ ނޫން މެމްބަރުންގެ އަދަދު އިތުރުކުރުމަކީވެސް މުހިއްމު ކަމެއްކަމަށް ދެ ގައުމުގެ ބޮޑުވަޒީރުންވެސް އެއްބަސްވެލައްވައެވެ.
އދގެ ސަލާމަތީ މަޖިލީހުގެ ދާއިމީ ގޮނޑިއެއް އިންޑިއާއަށް ދިނުމަށާއި، އެފްރިކާ ސަރަހައްދަށްވެސް ދާއިމީ ގޮނޑިއެއް ދިނުމަށް ގިނަ ބަޔަކު ވަކާލާތުކުރެއެވެ. 2028 ވަނަ އަހަރު ފެށޭ ދައުރަށް އިންޑިއާ އިންތިޚާބު ވެއްޖެނަމަ މިއީ އެގައުމު ސަލާމަތީ މަޖިލީހުގެ ގޮނޑިއަކަށް އިންތިޚާބުވާ 9 ވަނަ ދައުރަށް ވާނެއެވެ. މި އިންތިޚާބުގައި އިންޑިއާއަށް ދިވެހިރާއްޖޭގެ ތާއީދު ލިބޭނެކަން 2023 ވަނަ އަހަރު ކުރީގެ ރައީސް އިބްރާހިމް މުހައްމަދު ސޯލިޙްގެ ސަރުކާރުގައި ވަނީ އިންޑިއާއަށް އަންގާފައެވެ.
މި އިންތިޚާބު އޮންނާނީ 2027 ވަނަ އަހަރުގެ ޖޫން މަހު، އދގެ އާއްމު މަޖިލީހުގައި، އެމަޖިލީހުގެ 81 ވަނަ ދައުރުގައެވެ.
Advertisement
This content is created and paid for by advertisers and does not involve Voice Journalists