މާލޭގެ އެކި ސަރަހައްދުތަކުގައި ޕާކްކުރުމަށް ކުއްޔަށް ދޫކޮށްފައިހުރި ޕާކިން ސްލޮޓްތައް ނަގައި، އެތަންތަން އާންމު ޕާކިންއަށް ދޫކުރުމަށް ޓްރާންސްޕޯޓް މިނިސްޓްރީން މާލެސިޓީ ކައުންސިލަށް އަންގައިފިއެވެ.

މާލެސިޓީގެ މޭޔަރު އާދަން އާޒިމް ވަނީ މީޑިއާއަށް އެކަން ކަށަވަރުކޮށްދެއްވާފައެވެ. މޭޔަރު ވިދާޅުވެފައިވަނީ، މާލޭގެ މަގުތަކުގައި ހަތަރު ފުރޮޅުލީ އުޅަނދު ޕާކްކުރުމަށް ކުއްޔަށްދޫކޮށްފައި ހުރި ހުރިހާތަނެއް ހުރިހާ ރައްޔިތުންނަށް ހަމަހަމަކަމާއެކު ބޭނުންކުރެވޭނެ ގޮތް ހެދުމަށް ސަރުކާރުން ނިންމާފައިވާކަމަށެވެ. އެހެންކަމާއެކު މިމަހުގެ ނިޔަލަށް މުއްދަތު ހަމަވާ އެފަދަ ސްލޮޓްތައް ކުއްޔަށްދޫކޮށްފައިވާ މުއްދަތު އަލުން އިތުރު ނުކުރުމަށާއި، އަދި ޕާކިން ސްލޮޓްތައް އިތުރަށް ނުވިއްކުމަށް ޓްރާންސްޕޯޓުން އަންގާފައިވާކަމަށް މޭޔަރު ވަނީ ފާހަގަކުރައްވާފައެވެ.

މޭޔަރު ވިދާޅުވެފައިވަނީ ސަރުކާރުން އެ ނިންމުން ނިންމުމާ ގުޅިގެން އެކަން ވަރަށް އަވަހަށް އާއްމުކޮށް އިއުލާނުކުރާނޭ ކަމަށެވެ.

މާލޭގެ އެކި ސަރަހައްދުތަކުގައި ކައުންސިލުން ވެހިކަލްތައް ޕާކްކުރުމަށް ދޫކޮށްފައިވާ ޖާގަތަކުގެ އަދަދު 1000 އަރާއިރު، މިދިޔަ އަހަރު ޓްރާންސްޕޯޓުން ވަނީ އިތުރަށް ސްލޮޓްތައް ކުއްޔަށް ނުދިނުމަށް ސިޓީކައުންސިލަށް އަންގާފައެވެ.

މާލޭގައި ކާރުތައް ޕާކްކުރުމަށް ޕާކިން ސްލޮޓްތައް 1500 ރުފިޔާއަސް ކުއްޔަށް ދޫކުރަމުން އައިސްފައިވާއިރު، ޓެކްސީތައް ބޭއްވުމަށް 700 ރުފިޔާއަށް ޕާކިން ސްލޮޓްތައް ދޫކުރިއެވެ.

މާލެ ސަރަހައްދުގައި އެންމެ ބޮޑު މައްސަލައަކީ އެއްގަމު އުޅަނދުފަހަރު ގިނަވުމުގެ މައްސަލައެވެ. އުޅަނދުތައް ގިނަވެ ޕާކްކުރުމުގެ މައްސަލަ މިހާރު ވަނީ އިންތިހާއަށް ބޮޑުވެފައެވެ. މާލެ ސަރަހައްދުގައި ޕާކްކުރާނޭ ޖާގަ ނުލިބުމުން ގިނަ މީހުން އުޅަނދުތައް މިހާރު ޕާކްކުރަނީ ހުޅުމާލޭގެ އެކި ސަރަހައްދުތަކުގައެވެ.