ކ. ހިންމަފުށީގައި ހުންނަ ޑްރަގް ރިހެބިލިޓޭޝަން ސެންޓަރުގައި ފުލުހުންގެ ޚާއްސަ އޮޕަރޭޝަނެއް ފަށައިފިއެވެ.
ފުލުހުން ވަނީ މިކަން މީޑިއާތަކަށް ޔަގީންކޮށްދީފައެވެ. ނަމަވެސް އެތަނުގައި ފުލުހުން ކުރިއަށްގެންދާ އޮޕަރޭޝަނާ ގުޅުންހުރި އެއްވެސް ވާހަކައެއް ހިއްސާއެއް ނުކުރެއެވެ.
ނަމަވެސް މިކަމާ ގުޅޭގޮތުން އެންޑީއޭގެ ޗެއާޕާސަން ލުބްނާ ޒާހިރު ވަނީ އެ އޮޕަރޭޝަނަކީ ފުލުހުންގެ އިންޓަލިޖަންސް ޔުނިޓަށް ލިބުނު މައުލޫމާތަކާ ގުޅިގެން ހިންގަމުންގެންދާ އޮޕަރޭޝަނެއްކަމަށް މީޑިއާއަށް ކަށަވަރުކޮށްދީފައެވެ. އެގޮތުން ވަކި އެއްޗެއް ހޯދުމަށް ފުލުހުންގެ ޓީމުން އެތަނުގެ ތަންތަން ބަލާފާސްކުރާކަމަށް ލުބްނާ ވިދާޅުވިއެވެ.
އާއްމު އުސޫލުން ދޭތެރެއަކުން ފުލުހުން ރިހެބްގައި އޮޕަރޭޝަންތައް ހިންގާއިރު، މީގެ ކުރިންވެސް މިފަދަ އޮޕަރޭޝަންތައް ވަނީ ކުރިއަށްގެންގޮސްފައެވެ.
ހިންމަފުށީގައި ހިންގަމުން އަންނަ ރިހެބަކީ މަސްތުވާތަކެތިން ސަލާމަތްވުމަށް ޑުރަގް ރިހެބިލިޓޭޝަން ފަރުވާދިނުމަށް އަތޮޅޫގެ ރަށެއްގައި ގާއިމްކުރި ފުރަތަމަ މަރުކަޒެވެ. ރިހެބިލިޓޭޝަން ފަރުވާ ދިނުމަށް އެ ސެންޓަރުގެ ވެއިޓިންގެ ލިސްޓުގައި ގިނަ ބަޔަކު ތިބެއެވެ.
މަސްތުވާތަކެތީގެ މައްސަލައަކީ ރާއްޖޭގައި މިހާރު އެންމެ ކަންބޮޑުވާ އެއް މައްސަލައެވެ. މަސްތުވާތަކެތި ބޭނުންކުރާ މީހުންގެ އަދަދު އިތުރުވަމުންދާއިރު، ސަރުކާރުން ވަރަށް ފަހުން ވަނީ މަސްތުވާތަކެތި ބޭނުންކުރާ މީހުންށް ފަރުވާދިނުމަށް ބޭނުންވާ ސެންޓަރުތައް ހިންގުމަށް އަމިއްލަ ފަރާތްތަކަށް ހުޅުވާލާފައެވެ
Advertisement
This content is created and paid for by advertisers and does not involve Voice Journalists
