ހަމަނުޖެހުންތަކާއި ގުޅިގެން ވެރިކަން ވެއްްޓުނު ނޭޕާލްގެ ބޮޑުވަޒީރުކަމުގެ މަގާމަށް ސުޝިލާ ކާރްކީ އައްޔަންކުރައްވައިފި އެވެ.

އެކަމަނާ އަކީ އެ ގައުމުގެ ކުރީގެ އުއްތަމަ ފަނޑިޔާރެވެ. މަގާމުން ސަރަފުވެރިކަމާއެކު ވަކިވެވަޑައިގެންފައިވާ ސުޝިލާ އަކީ ނޭޕާލްގެ ފުރަތަމަ އަންހެން ބޮޑުވަޒީރެވެ. 

ނޭޕާލްގެ ބޮޑުވަޒީރުކަމުގެ މަގާމަށް ސުޝިލާ ކާރްކީ އައްޔަންކުރެއްވުމާއި ގުޅިގެން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އެކަމަނާ އަށް މަރުހަބާ ވިދާޅުވެފަ އެވެ.

ރައީސުލްޖުމްހޫރިއްޔާ ފޮނުއްވި ތަހުނިޔާގެ މެސެޖުގައި، އެކަމަނާ އަކީ ނޭޕާލްގެ ތާރީހުގައި، ފުރަތަމަ ފަހަރަށް އައްޔަންކުރެވުނު އަންހެން ބޮޑުވަޒީރުކަން ފާހަގަކުރައްވައި، އެއީ މުހިންމު ކާމިޔާބީއެއްކަން ފާހަގަ ކުރައްވާފައިވެ އެވެ. އަދި އެކަމަނާގެ ވެރިކަމުގައި ހާސިލުކުރައްވަން ބޭނުންފުޅުވާ ލަނޑުދަނޑިތަކަށް ވާސިލުވުމުގައި، ކާމިޔާބީއަށް ރައީސުލްޖުމްހޫރިއްޔާ އެދިވަޑައިގަންނަވާފައިވެއެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ އައު ބޮޑުވަޒީރަށް ކާމިޔާބީ އާއި، ދުޅަހެޔޮ ސިއްހަތަކަށް އެދިވަޑައިގެން، ނޭޕާލްގެ ރައްޔިތުންނަށް އަމަންއަމާންކަމާއި ކުރިއެރުމަށް އެދިވަޑައިގަންނަވަމުންނެވެ.

ނޭޕާލުގެ ވެރިރަށް ކަތަމަންޑޫގައި ޖެންޒީން ކުރިއަށްގެންދިޔަ ވަރުގަދަ މުޒާހަރާތަކަށްފަހު އޭރު އޮތް ސަރުކާރު ވަނީ ވެއްޓިފަ އެވެ.

ބޮޑުވަޒީރު ކޭޕީ ޝަރްމާ އޯލީ މަގާމުން އިސްތިއުފާ ދެއްވީ މުޒާހަރާތައް ވަރަށް ބޮޑަށް ހޫނުވެ ދައުލަތުގެ އިދާރާތަކުގައި ހުޅުޖަހާ ވަޒީރުން ހަވަރަށް ދޭން ފެށުމުންނެވެ. ބޮޑުވަޒީރުގެ ގެކޮޅު ލޫޓުވާ ގާނޫނު ހަދާ މަޖިލީހުގައި ހުޅުޖެހި އެވެ.

ނޭޕާލްގެ ކަންކަމާއި އަސްކަރިއްޔާއިން ހަވާލުވުމާއެކު ހަމަނުޖެހުންތައް ކޮންޓްރޯލް ވި އެވެ. އަދި މުޒަހާރާގެ ބައިވެރީންނާއެކު ވަގުތީ ސަރުކާރެއް އެކުލަވާލުމުގެ މަޝްވަރާތައް ފެށި އެވެ. ގިނަ ބަޔަކަށް އިއްތިފާގުވެވުނީ ބޮޑުވަޒީރުގެ މަގާމަށް ސުޝިލާ ގެނައުމަށެވެ. އެކަމަނާ ވެސް އެކަމަށް އެއްބަަސްވެވަޑައިގަތެވެ.

ހުކުރު ދުވަހު މަގާމާއި ހަވާލުވެވަޑައިގަތުމަށް ފަހު ސުޝިލާ ވިދާޅުވީ އެއީ ބޭނުންވި މަގާމެއް ނޫން ކަމަށެވެ. މަގާމާ ހަވާލުވީ ގައުމު ދޫކޮށްލަން ބޭނުންނުވާތީ ކަމަށެވެ. އަދި ރައްޔިތުންގެ އެދުމަށް އިޖާބަދީ މި ނާޒުކު ހާލަތުން ނޭޕާލް ސަލާމަތް ކުރުމަށެވެ.

ވެރިކަމުގައި ހުންނަވާނީ ހަ މަސް ދުވަހު ކަމަށާ އެ މުއްދަތުގައި އައު ސަރުކާރެއް އެކުލަވާލުމަށް ފުރުސަތު ފަހިކޮށް ދެއްވާނެ ކަމަށްވެސް ވިދާޅުވި އެވެ.