ކުރީގެ ސަރުކާރުން 2019 ވަނަ އަހަރު ބަޖެޓް ސަޕޯޓުގެ ގޮތުގައި ސްޓޭޓް ބޭންކް އޮފް އިންޑިއާ (އެސްބީއައި) މެދުވެރިކޮށް ނަގާފައިވާ 150 މިލިއަން އެމެރިކާ ޑޮލަރުގެ ފެސިލިޓީ ދިވެހި ސަރުކާރުން އެއްކޮށް ދައްކައި ޚަލާޞްކޮށްފިއެވެ.

މިކަން ހާމަކޮށްފައިވަނީ މިނިސްޓްރީ އޮފް ފިނޭންސުން މިއަދު ނެރުނު ނޫސްބަޔާނެއްގައެވެ.

ފިނޭންސް މިނިސްޓްރީން ބުނީ، އެސްބީއައި މެދުވެރިކޮށް ނަގާފައިވާ މި ފެސިލިޓީގެ ތެރެއިން ބާކީ ދައްކަން އޮތް 50 މިލިއަން ޑޮލަރު މިއަދު  ދައްކައި ނިންމާފައިވާ ކަމަށެވެ. މިއީ މިއަދަށް މުއްދަތު ހަމަވާން އޮތް ބައެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މީގެ ކުރިން ވަނީ މި ފެސިލިޓީގެ ފުރަތަމަ 50 މިލިއަން ޑޮލަރު މިއަހަރުގެ ޖަނަވަރީ މަހު އަދި ދެވަނަ 50 މިލިއަން ޑޮލަރު މެއި މަހުގެ 11 ވަނަ ދުވަހު ދައްކާފައެވެ. އެހެންކަމުން މިއަދު ދެއްކި ފައިސާއާއެކު ޖުމްލަ 150 މިލިއަން ޑޮލަރުގެ ދަރަނި މިހާރު ވަނީ އެއްކޮށް އަދާކޮށް ނިމިފައެވެ.

މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކާ ހަވާލާދީ ފިނޭންސް މިނިސްޓްރީން ބަޔާންކުރި ގޮތުގައި، 2024 ވަނަ އަހަރުގެ އޯގަސްޓް މަހުގެ ނިޔަލަށް ރާއްޖޭގެ ރަސްމީ ރިޒާވްގައި ގާތްގަނޑަކަށް 644 މިލިއަން އެމެރިކާ ޑޮލަރު އެބަހުއްޓެވެ. މީގެ އިތުރުން ތެލާއި، ކާބޯތަކެއްޗާއި އަދި ބޭސްފަރުވާއަށް ބޭނުންވާ ސާމާނު ފަދަ ޒަރޫރީ އަދި އަސާސީ ތަކެތި އިމްޕޯޓްކުރުމަށް ބޭނުންވާ ބޭރު ފައިސާ މެދުނުކެނޑި ލިބޭނެ އިންތިޒާމުތައް ސަރުކާރުން ވަނީ ފުރިހަމަކޮށްފައެވެ.

ދަރަނި އަދާކުރުމުގެ ސަބަބުން އަސާސީ މުދާ އެތެރެކުރުމަށް ދަތިތަކެއް ކުރިމަތިވެދާނެ ކަމަށް ބުނެ ފަތުރަމުންދާ ވާހަކަތައް ދޮގުކުރަމުން ފިނޭންސުން ބުނީ، އެއީ އެއްވެސް އަސާސެއް ނެތް ވާހަކަތަކެއް ކަމަށެވެ. އަދި ސަރުކާރުން އަބަދުވެސް މަސައްކަތް ކުރަމުންދަނީ ދައުލަތުގެ ދަރަނިތައް ޒިންމާދާރުކަމާއެކު ދެއްކުމަށްޓަކައި ސޮވްރިންގ ޑިވެލޮޕްމަންޓް ފަންޑަށް ފައިސާ ޖަމާކޮށް، ދުރާލާ ތައްޔާރުވެގެން ކަނޑައެޅިފައިވާ ވަގުތަށް ދަރަނި އަދާކުރުމަށް ކަމަށްވެސް އެ މިނިސްޓްރީން ފާހަގަކުރިއެވެ.

އެ މިނިސްޓްރީން ބުނީ ސަރުކާރުގެ މައިގަނޑު އަމާޒަކީ ރާއްޖޭގެ އިޤްތިޞާދީ ކުރިއެރުން ދަމަހައްޓައި، ރިޒާވް ވަރުގަދަކޮށް، ރައްޔިތުންގެ އަސާސީ ބޭނުންތައް ފުރިހަމައަށް ރައްކާތެރިކުރުން ކަމަށެވެ.

މިގޮތުން ބައިނަލްއަޤްވާމީ މާލީ އިދާރާތަކާއި އެކުވެރި ޤައުމުތަކާއެކު ސަރުކާރުން ކުރިއަށްގެންދާ މަޝްވަރާތައް ވަރަށް ކާމިޔާބުކަމާއެކު ކުރިއަށްދާ ކަމަށާއި، އޭގެ ސަބަބުން ރާއްޖޭގެ ބޭރު ފައިސާގެ ރިޒާވް އިތުރަށް ހަރުދަނާވެގެންދާނެ ކަމަށްވެސް ފިނޭންސް މިނިސްޓްރީން ވަނީ ބުނެފައެވެ.