އިންޑިއާގެ ސްޓޭޓް ބޭންކު މެދުވެރިކޮށް ނަގާފައި އޮތް 150 މިލިއަން ޑޮލަރުގެ ޓްރެޒަރީ ބިލް ފެސިލިޓީގެ އެންމެ ފަހު 50 މިލިއަން ޑޮލަރު މިއަދު ދައްކައި ޚަލާޞްކޮށް ޒަރޫރީ މުދާ މެދުނުކެނޑި ލިބޭނެކަމުގެ ޔަގީންކަން މާލީ ވުޒާރާއިން ދީފިއެވެ.
ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުން 2019 ވަނަ އަހަރު ބަޖެޓް ސަޕޯޓަށް ނެގި މި ދަރަނީގެ ތެރެއިން ފުރަތަމަ 50 މިލިއަން ޑޮލަރު ޖެނުއަރީ 2024 ގައި ދެވަނަ 50 މިލިއަން ޑޮލަރު 11 މެއި 2024 ގައި މި ސަރުކާރުން ދައްކާފައިވެއެވެ. މިއަދުގެ ފައިސާ ދެއްކުމާ އެކު އެ ފެސިލިޓީ މުޅީން ޚަލާޞްވީއެވެ.
މާލީ ވުޒާރާއިން ނެރުނު ބަޔާނުގައި ބުނެފައިވާ ގޮތުގައި ތެލާއި ކާޑާއި ބޭހުގެ އިތުރުން ޒަރޫރީ އެހެނިހެން މުދާ އެތެރެކުރުމަށް ބޭރު ފައިސާ ހޯދުމުގައި އެއްވެސް ހުރަހެއް ކުރިމައްޗެއް ނުވާނެއެވެ. ދަރަނި ދެއްކުމުގެ ސަބަބުން ފޮރިން ކަރެންސީ ދަތިވާނެ ކަމަށް ބުނެ ފެތުރެމުންދާ ވާހަކަތައް އެ ވުޒާރާއިން ދޮގުކޮށް އެއީ އެއްވެސް އަސާސެއް ނެތް ވާހަކަތަކެއް ކަމަށް ބުނެފައިވެއެވެ.
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސް ހިސާބުތައް ދައްކާ ގޮތުން އޮގަސްޓް 2026 ގެ ނިޔަލަށް ރާއްޖޭގެ ރަސްމީ ރިޒާވް ހުރީ ގާތްގަނޑަކަށް 644 މިލިއަން ޑޮލަރުގައެވެ. މާލީ ވުޒާރާއިން ފާހަގަކުރި ގޮތުގައި ދަރަނި އަދާކުރަންޖެހޭ ތާރީޚުތަކަށް ދުރާލައި ތައްޔާރަށް ތިބުމުގެ ސިޔާސަތެއް ގެންގުޅޭ ކަމަށާއި ސޮވެރިން ޑިވެލޮޕްމަންޓް ފަންޑަށް ގަވާއިދުން ފައިސާ ޖަމާކުރަމުންދާ ކަމަށް ވެސް ބުނެފައިވެއެވެ.
ބައިނަލްއަޤުވާމީ މާލީ އިދާރާތަކާއި ތަރައްޤީގެ ބައިވެރިންނާ އެކު ކާމިޔާބު މަޝްވަރާތަކެއް ކުރިއަށްދާ ކަމަށާއި އެ މަޝްވަރާތަކުން ރާއްޖޭގެ ބޭރު ފައިސާގެ ރިޒާވް އިތުރަށް ވަރުގަދަ ވާނެ ކަމަށް އެ ވުޒާރާއިން އުންމީދުކުރާ ކަމަށް ވެސް ބަޔާނުގައި ހާމަކޮށްފައިވެއެވެ.
Advertisement
This content is created and paid for by advertisers and does not involve Voice Journalists
