އިސްރާއީލްގެ އިސްތިއުމާރީ ސިފައިން މިދިޔަ ދެ އަހަރުތެރޭ ނުދޭހާ ވަރުގަދަ ހަމަލާތަކެއް ޣައްޒާއަށް ދޭން ފަށައިފިއެވެ.

އަލްޖަޒީރާއިން މިއަދު ބުނީ އިސްރާއީލް ސިފައިން މިދިޔަ ހުކުރުދުވަހު ޣައްޒާ ސިޓީއަށް ދިން ހަމަލާތަކަކީ މި ވޭތުވެދިޔަ ދެ އަހަރުދުވަހުގެ ތެރޭގައި ދިން އެންމެ ވަރުގަދަ ހަމަލާތައްކަމަށެވެ. އިސްރާއީލުން ވަނީ ޣައްޒާ ހިފުމުގެ އެންމެ ފަހުގެ އޮޕަރޭޝަން ކުރިއަށްދާަކަމަށް ބުނެފައެވެ. އެގޮތުން އިސްރާއީލް ސިފައިންގެ ގިނަ އަދަދެއްގެ ފްލީޓްތައް މިހާރުވެސް ދަނީ ޣައްޒާސިޓީގެ ތެރެއަށް ވަންނަމުންނެވެ.

އިސްރާއީލްގެ އިސްތިއުމާރީ ސިފައިން ޣައްޒާއަށް ވަދެ ހަމަލާތައް ދެމުންދާތީވެ، އެ ސިޓީގެ ބައެއް ރައްޔިތުން ވަނީ ރައްކާތެރި ސަރަހައްދުތަކަށް ހިޖުރަކުރަމުންނެވެ. އިސްރާއީލުން މިހާރު ހިންގަމުންގެންދާ ޖަރީމާތަކުގައި އާއްމު ރައްޔިތުންގެ ބިމާ ހަމަ ނުވެ ހުރި ގެތައް ދަނީ އެއްވެސް އިންޒާރެއް ދިނުމަކާ ނުލާ ބިމާ ހަމަކުރަމުންނެވެ. އިއްޔެ ދޭންފެށި ހަމަލާތަކުގައި އެކަނިވެސް ޣައްޒާސިޓީގެ 43 މީހަކު ވަނީ ޝަހީދުވެފައެވެ.

އިސްރާއީލް ސިފައިން 2023 ވަނަ އަހަރުގެ އޮކްޓޯބަރުމަހު ޣައްޒާއަށް ދޭންފެށި ހަމަލާތަކުގައި މިހާތަނަށް 65 ހާހަށްވުރެ ގިނަ މީހުން ޝަހީދުކޮށްލާފައިވާއިރު، 400 އަށްވުރެ ގިނަ މީހުންގެ ފުރާނަ ގޮސްފައިވަނީ ބަނޑުހައިހޫނުކަމުގެ ސަބަބުންނެވެ. މީގެ ތެރޭގައި 147 ކުޑަކުދިން ހިމެނެއވެެ.

އިސްރާއީލުން ޣައްޒާސިޓީ ބަންދުކޮށް އެ ސިޓީގެ ރައްޔިތުން ބަނޑަށް ޖައްސަމުންދާއިރު، ބައިނަލްއަޤްވާމީ މުޖުތަމައުއިން ވަނީ ޔަހޫދީ ސިފައިންގެ އެ އަމަލުތައް ހުއްޓާލައި އެ ސިޓީން ފޭބުމަށް ގޮވާލާފައެވެ. ނަމަވެސް އިސްރާއީލުން ބުނަމުންދަނީ ޣައްޒާ މުޅިން ހުސްކޮށްފައި ނޫނީ ދެން ނުފައިބާނޭކަމަށެވެ.