ޗައިނާގެ އެއާލައިނެއްކަމަށްވާ ބެއިޖިންގ ކެޕިޓަލް އެއާލައިނުންވެސް ވެލާނާ އިންޓަރނޭޝަނަލް އެއާޕޯޓުގެ އައު ޓާމިނަލް ބޭނުންކުރަން ފަށައިފިއެވެ.
މިކަމާ ގުޅޭގޮތުން އެމްއޭސީއެލުން ބުނީ ބެއިޖިން ކެޕިޓަލް އެއާލައިނަކީ، ވީއައިއޭ ޓާމިނަލް 1 އިން ހިދުމަތް ދޭން ފެށި ޗައިނާގެ ފުރަތަމަ އެއާލައިން ކަމަށެވެ. އަދި ބެއިޖިންގ ކެޕިޓަލް އެއާލައިން ހިމެނެނީ ޓާމިނަލް އެކަކުން ހިދުމަތް ދޭން ފެށި ފަސްވަނަ އެއާލައިންކަމަށެވެ..
ޓާމިނަލް 1 އިން ބެއިޖިންގް ކެޕިޓަލް އެއާލައިންސް އަށް ހިދުމަތް ދޭން ފެށުން ފާހަގަކުރުމަށް މިއަދު ވަނީ ވީއައިއޭގައި ހާއްސަ ރަސްމިއްޔާތެއް ބާއްވައިފައެވެ. ރަސްމިއްޔާތު ޝަރަފުވެރިކޮށްދެއްވީ ޓްރީ ޓޮޕް ހޮސްޕިޓަލްގެ ސީއީއޯ އާދިލް މޫސާއެވެ.
ބެއިޖިން ކެޕިޓަލް އެއާލައިނުން އާ ޓާމިނަލް ބޭނުންކުރަން ފެށުމުގެ ތެރެއިން... ފޮޓޯ: އެމްއޭސީއެލް
ރަސްމިއްޔާތުގައި އެމްއޭސީއެލްގެ މެނޭޖިން ޑިރެކްޓަރު މުޖުތަބާ ލަތީފު އާއި ވޮޔޭޖަސް މޯލްޑިވްސްގެ ޑެޕިއުޓީ ޖެނެރަލް މެނޭޖަރު އިގްނާޒު މަންސޫރާއި އެމްއޭސީއެލްގެ ސީނިއާ މެނޭޖުމަންޓާއި އެމްއޭސީއެލްގެ އިސްވެރިން ބައިވެރިވެވަޑައިގެންނެވިއެވެ. މިއަދުގެ ރަސްމިއްޔާތުގައި ބެއިޖިންގް ކެޕިޓަލް އެއާލައިންސްގެ ޗެކިން ކައުންޓަރުތައް ރަސްމީކޮށް ހުޅުވައި، އެ އެއާލައިނުން ފުރި 248 ފަސިންޖަރުންނަށް ވަނީ ހަދިޔާ ދީފައެވެ.
ބެއިޖިން ކެޕިޓަލް އެއާލައިނުން އާ ޓާމިނަލް ބޭނުންކުރަން ފެށުމުގެ ތެރެއިން... ފޮޓޯ: އެމްއޭސީއެލް
އަދި ޓާމިނަލް 1 އަށް ކައިރި ކުރި ބެއިޖިންގް ކެޕިޓަލް އެއާލައިންސްގެ ފުރަތަމަ މަތިންދާބޯޓު، ޖޭޑީ455-6 އަށް ހާއްސަ ވޯޓާ ސެލިއުޓެއް އަރުވައި، އެ ފްލައިޓުން ރާއްޖެ އައި 276 ފަސިންޖަރުންނަށް ވަނީ ސަގާފީ ހަރަކާތްތަކާއެކު ހޫނު މަރުހަބާއެއް ކިޔައިފައެވެ.
ބެއިޖިން ކެޕިޓަލް އެއާލައިނަށް ވޯޓަރ ސެލިއުޓް އަރުވަނީ.. ފޮޓޯ: އެމްއޭސީއެލް
ބެއިޖިންގް ކެޕިޓަލް އެއާލައިންސްއަކީ ބެއިޖިން ޑެޒިންގް އިންޓަނޭޝަނަލް އެއާޕޯޓުގައި ގާއިމުވެފައި އޮންނަ ލޯ-ކޯސްޓް އެއާލައިންއެކެވެ.
އެމްއޭސީއެލުން ބުނީ ވީއައިއޭ ޓާމިނަލް 1 އިން މިހާރު ބޭނުންކުރަމުންދާ އެއާލައިންތަކުގެ ތެރޭގައި ރާއްޖޭގެ ގައުމީ އެއާލައިން، މޯލްޑިވިއަން, ޔުނައިޓެޑް އެރެބް އެމިރޭޓްސް (ޔޫއޭއީ)ގެ ލޯ-ކޯސްޓް އެއާލައިން, އެއާ އަރަބިއާ, ލަގްޒަރީ އެއާލައިން, ބިއޯންޑް, ސްރީ ލަންކާގެ ލޯ-ކޯސްޓް އެއާލައިން, ފިޓްސް އެއާއަށް ހިމެނޭކަމަށެވެ.. އަދި މި ހަފުތާގެ ތެރޭގައި އިތުރު ދެ އެއާލައިނެއް ބަދަލުކުރަން ވަނީ ނިންމާފައިވާކަމަށް އެމްއޭސީއެލުން ބުނެއެވެ.
Advertisement
This content is created and paid for by advertisers and does not involve Voice Journalists
