މާލޭ ބާޒާރުގައި ތަރުކާރީގެ އަގުތައް ވަރަށްބޮޑަށް ދަށަށް ހިނގައްޖެއެވެ.

ބާޒާރުމަތީ ފިހާރަތަކުގައި މިއަދު ތަރުކާރީ ވިއްކަންހުރި ތަންތަނަށް ބަލާއިރު، އެންމެބޮޑަށް އަގުތައް ހެޔޮވިކަމަށް ފާހަގަކުރެވިފައިވަނީ، ކެބެޖް، ކެރެޓް އަދި ފިޔާގެ އަގެވެ. ބާޒާރުމަތީ ފިހާރަތަކުން މީގެ ކުރިން ކެބެޖް ކިލޯއެއް 85 ރުފިޔާއަށް ވިއްކިއިރު، މިއަދު ކެބެޖް ކިލޯއެއްގެ އަގު ވަނީ 18 ރުފިޔާއަށް ތިރިވެފައެވެ.

މީގެ އިތުރުން ކެރެޓް ކިލޯއެއް 18 ރުފިޔާއަށް ހުރިއިރު، މީގެ ކުރިން ކެރެޓް ކިލޯއެއްގެ އަގު ހުރީ 35 ރުފިޔާގައެވެ. ލުބޯ ކިލޯއެއްގެ އަގު މިހާރު 25 ރުފިޔާގައި ހުރިއިރު، މީގެ ކުރިން ލުބޯ ކިލޯއެއްގެ އަގު އާއްމުކޮށް ހުރީ 30 ރުފިޔާއިން މަތީގައެވެ.

މީގެ ކުރިން ބާޒާރުގައި ވިއްކަންހުރި ކެބެޖްތަކެއް.... ފޮޓޯ: ވޮއިސް

ބާޒާރުގައި ވިއްކަންހުރި ކެރެޓް އަދި ލުނބޯތަކެއް.... ފޮޓޯ: ވޮއިސް

ތަރުކާރީގެ އިތުރުން މިފަހުން ރެކޯޑް މިންވަރަކަށް އަގުތައް އަރައިގެންދިޔަ އާފަލާއި، އޮރެންޖުގެ އަގުތައް މިހާރުވަނީ ވަރަށްބޮޑަށް ތިރިވެފައެވެ. އެގޮތުން ކުރިން 12 ރުފިޔާއަށް ވިއްކި އޮރެންޖު ކިލޯއެއްގެ އަގު 5 ރުފިޔާގައި މިހާރު ހުރިއިރު، ކުރިން ހަމަ އެއަގުގައި ހުރި އާފަލެއްގެ އަގު ވަނީ 6 ރުފިޔާއަށް ވެއްޓިފައެވެ. އަދި އެންމެ އަގުބޮޑުކޮށް ވިއްކާ ބާވަތުގެ އާފަލުވެސް މިހާރު 7 ރުފިޔާއަށް ލިބެންހުރިކަން ފާހަގަކޮށްލެވެއެވެ.

ހުޅުމާލޭ ސުޕަމާޓެއްގައި ވިއްކަންހުރި އާފަލްތަކެއް.... ފޮޓޯ: ވޮއިސް

ބާޒާރުގައި ދިވެހިން އާއްމުކޮށް ބޭނުންކޮށް އުޅޭ ތަރުކާރީއާއި މޭވާގެ އަގު އުފުލެން ފެށުމާއެކު ސަރުކާރުން ވަނީ އެސްޓީއޯ މެދުވެރިކޮށް އާއްމުކޮށް ބޭނުންކުރާ އެ ބާވަތްތައް އެތެރެކޮށް ވިއްކުމަށް ނިންމާފައެވެ. ރައީސް ޑރ. މުހައްމަދު މުއިއްޒު ވަނީ ދިވެހިން އާއްމުކޮށް ބޭނުންކުރާ ތަރުކާރީ އާއި މޭވާގެ ބާވަތްތަކުގެ އަގުތައް މީގެ ފަހުން ބާޒާރުގައި ބޮޑުވިޔަނުދޭނޭކަމަށް ވިދާޅުވެފައެވެ. އެގޮތުން ބާޒާރުގައި އެ ތަކެތީގެ އަގުތައް ވިޔަފާރިވެރިންނަށް ބޮޑުކުރުމުގެ ފުރުސަތު ނުދެއްވާނޭކަން ރައީސް ވަނީ ފާހަގަކުރައްވާފައެވެ.