ތ. އޮމަދޫގައި ސަރުކާރުން ފަށާފައިވާ އަދި ފަށަން ނިންމާފައިވާ މަޝްރޫއުތަކުގެ މަސައްކަތްތައް ނުހުއްޓި އަދި މިހާރު ހުއްޓިފައިވާ މަޝްރޫޢުތަކަށް ޙައްލެއް ހޯއްދަވައިދެއްވާނެ ކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
އަތޮޅުތެރޭގެ ހަތަރު ރަށަކަށް ކުރައްވަމުންގެންދަވާ ދަތުރުފުޅުގެ ތެރެއިން ތ. އޮމަދޫއަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި މިއަދު ދެއްކެވި ވާހަކަފުޅުގައި ރައީސް ވިދާޅުވީ، އޮމަދޫގެ ތަރައްގީގެ މަޝްރޫއުތަކުގެ ތެރެއިން މިހާރު ހުއްޓިފައިވާ މަޝްރޫއުތަކުގެ އަދާހަމަ ރައީސް ވަނީ ދެއްވާފައެވެ.
އެގޮތުން އެރަަށުގެ ފެނާއި ނަރުދަމާގެ މަޝްރޫއަށް އިޝާރަތްކުރައްވަމުން ރައީސް ވިދާޅުވީ، އެ މަޝްރޫއުގެ މަސައްކަތްކުރާ ކޮންޓެރްކްޓަރަށް ދޭންޖެހޭ ހުރިހާ ފައިސާއެއް މިދިޔަ ދުވަސްތަކުގެ ތެރޭގައި ދީފައިވާ ކަމަށާއި، މިހާރު އެ މަޝްރޫއު ހުއްޓިފައި އޮންނަންޖެހޭ ސަބަބެއް ނޯންނާނެ ކަމަށެވެ.
އަދި އެމަނިކުފާނު މާލެ ވަޑައިގަތުމަށްފަހު އެ ރަށުގެ ނަރުދަމާގެ މަސައްކަތުގެ ކޮންޓްރެކްޓަރުންނާއި ވުޒާރާއިން ބައްދަލުކޮށް އެ މަސައްކަތް އަވަސްކުރުމަށް ބާރުއަޅައި، އެކަން ނުކުރާނަމަ އެހެން ކުންފުންޏަކާ ހަވާލުކޮށްގެން ނަމަވެސް އެ މަސައްކަތް ހަލުވި ގޮތެއްގައި ކުރިޔަށްގެންގޮސް ނިންމަވާނެ ކަމަށް ރައީސް ވިދާޅުވިއެވެ.
މިރަށުގެ ތަރައްގީއަށް ހުރި މަޝްރޫއުތަކުގައި އަވަސްމިނުގައި އެކަންކަން ކޮށްދިނުމަކީ ސަރުކާރުގެ އެކަމުގެ މަސްއޫލިއްޔަތު. އެންމެ ބޮޑުވެފައިވާ މައްސަލަ ޙައްލުކުރުމުގައި ވަރަށް ލަސްވެގެން ހިނގައްޖެ. ފެނާއި ނަރުދަަމާ މަޝްރޫއުއަކީ އަޅުގަނޑު ކުރިއިރުވެސް ހަމަ އެ ހިސާބުގައި އޮތް މައްސަލައެއް.
ރައީސް ޑރ. މުޙައްމަދު މުޢިއްޒު
ރައީސް ވިދާޅުވީ އެ ރަށުގެ ކައުންސިލުގެ ފަރާތުން ވެސް އެންމެ ބޮޑަށް ލިބޭ ޝަކުވާއަކީ އަދި ޢާންމުންނަށް އެންމެ ދަތިވާކަމަކީ ފެނާއި ނަރުދަމާގެ މަޝްރޫއު ނުނިމި އޮތުންކަން އެނގިވަޑައިގަންނަވާ ކަމަށެވެ. އަދި އެ މަޝްރޫއަށް ނުހަނު އިސްކަންދެއްވައި، އެކަން ވީހާ ވެސް އަވަހަކަށް ނިންމަވާނެ ކަމުގެ ޔަގީންކަން ރައީސް ވަނީ ދެއްވާފައެވެ.
އަޅުގަނޑަށް އެނގޭ ވަރަށް ވަރަށް ދަތިވާ މައްސަލައެއްކަން. ހަމަ އެންމެ، އެންމެ ގިނަ މީހުންނަށް އެންމެ ބޮޑަށް ދަތިވާ މައްސަލަ މިއީ. އެހެންވީމާ އެކަން އަދިވެސް އެކުންފުނި މެދުވެރިކޮށް ކުރުމަކީ މީގައި އަޅުގަނޑުމެން އިސްކަން މިދޭ ގޮތް. ޕެންޑިން އެއްވެސް ބިލެއް ނެތް. ސަރުކާރުން ފެސިލިޓޭޓްކޮށްދޭންޖެހޭ ކަމެއް ވެސް ނެތް. ހުރިހާކަމެއް އެ އޮތީ ހަމަޖައްސައިދީފައި. އެހެންވީމާ އަޅުގަނޑުމެން އިތުރަށް އަދިވެސް އެ ބޭފުޅުންނާއި ވާހަކަ ދައްކާނަން.
ރައީސް ޑރ. މުޙައްމަދު މުޢިއްޒު
ރައީސް ވިދާޅުވީ އެ ރަށުގެ ތަރައްގީއަށް އެންމެ މުހިންމު މަޝްރޫއަކީ ފެނާއި ނަރުދަމާގެ މަޝްރޫއުކަމުން ސަރުކާރުން އެންމެ ބޮޑު އިސްކަމެއް ދޭނީ އެ މަސައްކަތަށް ކަމަށެވެ. އަދި އެކަން ވަރަށް ގާތުން ބަލައި، އެކަން ޙައްލުކޮށްދެއްވާނެ ކަމުގެ ޔަގީންކަން އެމަނިކުފާނު ވަނީ ދެއްވާފައެވެ.
ރައީސްގެ ވާހަކަފުޅުގައި އެމަނިކުފާނު ވަނީ، އެ ރަށުގައ ކައުންސިލުން އެދުނު ބައެއް ކަންކަމަށް ވެސް އަލިއަޅުއްވާފައެވެ. އެގޮތުން އެރަށުގެ ހުޅަނގު ފަރާތުން ނެރެއް ކަނޑައިދިނުމަށް ކައުންސިލުން އެދިފައިވާކަން ފާހަގަކުރައްވަމުން ރައީސް ވަނީ އެކަމުގެ ދިރާސާތަކެއް ހެދުމަށްފަހު އެކަން ކޮށްދެއްވާނެކަން ފާހަގަކުރައްވާފައެވެ.
އަދި އެރަށުގެ ތަރައްގީގެ އިތުރު މަޝްރޫއުތައް ކަމުގައިވާ ސިއްޚީ މަރުކަޒާއި ސްކޫލަށް އިތުރުކުރެވޭ ބައިގެ މަސައްކަތާއި، ސިއްޚީ މަރުކަޒަށް ހޯދާ އެމްބިއުލާންސްގެ އިތުރުން އެ ރަށުގެ ދަނޑުގެ ޕިޗު ބަދަލުކުރުމުގެ މަސައްކަތް ވެސް ބަޖެޓުގެ ތެރެއިން ކޮށްދެއްވާނެކަމުގެ ޔަގީންކަން އެމަނިކުފާނު ވަނީ ދެއްވާފައެވެ.
Advertisement
This content is created and paid for by advertisers and does not involve Voice Journalists
