މި އަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1.6 މިލިއަނަށް އަރައިފިއެވެ.

ފަތުރުވެރިކަމާއި ބެހޭ ވުޒާރާގެ ތަފާސްހިސާބުތަކުން ދައްކާ ގޮތުން، ރާއްޖެއަށް ދުވާލެއްގެ މައްޗަށް އެވްރެޖްގޮތެއްގައި 6،017 ފަތުރުވެރިން އާދެއެވެ. އެހެން ނަމަވެސް މި ހިނގާ ސެޕްޓެމްބަރު މަހު ދުވާލެއްގެ މައްޗަށް އެވްރެޖް ގޮތެއްގައި އަންނަނީ 4،895 ފަތުރުވެރިންނެވެ.

އެ ހިސާބުން އެނގޭ ގޮތުން، މި މަހުގެ 22 ވަނަ ދުވަހުގެ ނިޔަލަށް 1،594،616 ފަތުރުވެރިން ވަނީ ރާއްޖެ އައިސްފައެވެ. އެހެންކަމުން މިމަހުގެ ދުވާލެއްގެ މައްޗަށް ރާއްޖެއަށް ޒިޔާރަތްކުރާ ފަތުރުވެރިންގެ ނިސްބަތުން ބަލާއިރު މިހާތަނަށް 1.6 މިލިއަނަށް ވުރެ ގިނަ ފަތުރުވެރިން އައިސްފައިވާކަމަށް އަންދާޒާކުރެވެއެވެ.

އެހެން ނަމަވެސް ފަތުރުވެރިކަމާއި ބެހޭ ވުޒާރާގެ ފަރާތުން އެންމެ ފަހުން ނެރެފައިވަނީ މި މަހުގެ 22 ވަނަ ދުވަހުގެ ނިޔަލަށް ރާއްޖެއަށް އައި ފަތުރުވެރިންގެ އަދަދުތައް ކަމުން، ޖުމްލަ އަދަދު ވަނީ ކަށަވަރުކުރެވޭ ގޮތެއް ނުވެފައެވެ.

އެގޮތުން އެ ހިސާބުތަކުން ދައްކާ ގޮތުން، މި މަހުގެ 22 ވަނަ ދުވަހުގެ ނިޔަލަށް ރާއްޖެއަށް އެންމެ ގިނައިން އައިސްފައިވަނީ ޗައިނާ މާކެޓުންނެވެ. އެގޮތުން ޗައިނާއިން 253،177 ފަތުރުވެރިން އައިސްފައިވާއިރު ދެވަނައަށް އެންމެ ގިނަ ފަތުރުވެރިން އައި ރަޝިޔާއިން ވަނީ 193،109 ފަތުރުވެރިން އައިސްފައެވެ.

ތިންވަނައަށް އެންމެ ގިނައިން ރާއްޖެއަށް އައިސްފައިވަނީ 142،270 ފަތުރުވެރިންނެވެ. 

ރާއްޖެއަށް މިހާތަނަށް ޒިޔާރަތްކުރި ފަތުރުވެރިންގެ އަދަދުން ބަލާއިރު، ސަރުކާރުން މި އަހަރަށް އަމާޒުހިފައިފައިވާ ލަނޑުދަނޑިކަމުގައިވާ 2.3 މިލިއަން ފަތުރުވެރިންގެ އަމާޒު ޙާސިލުނުވުން ވެސް ވަރަށް ގާތް ކަމަށް ފެނެއެވެ. އެއީ އަހަރުގެ މިހާތަނަށް މަހެއްގެ މައްޗަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދާއި ދުވާލެއްގެ މައްޗަށް ރާއްޖެއަށް ޒިޔާރަތްކުރި އަދަދަށް ބަލާއިރު، ކުރިޔަށް އޮތް ތިން މަހާއި ކުޑަ ދުވަސްކޮޅެއްގެ ތެރޭގައި 2.3 މިލިއަން ފަތުރުވެރިން ރާއްޖެއަށް އައުން ދުރުކަމަށް ފެންނާތީއެވެ.

އެހެން ނަމަވެސް މިދިޔަ އަހަރު ރާއްޖެއަށް ޒިޔާރަތްކުރި 2،046،615 ފަތުރުވެރިންނަށް ވުރެ ގިނަ ފަތުރުވެރިން މި އަހަރު ރާއްޖެއަށް އަންނާނެ ކަމަށް ލަފާކުރެވެއެވެ.

އެހެން ނަމަވެސް، ކުރިޔަށް ރާއްޖޭގެ ޕީކް ސީޒަން އޮތުމާއެކު ވެސް މި އަދަދުތަކަށް ކޮންމެވެސް ވަރެއްގެ ބަދަލެއް އައުން ވެސް އެކަށީގެންވެއެވެ. އެގޮތުން މި އަހަރުގެ ކުރީކޮޅު ވެސް ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަރަށް ބޮޑުތަނުން އިތުރުވެފައިވާކަން ހިސާބުތަކުން ދައްކައެވެ.

އެގޮތުން މި އަހަރުގެ ޖެނުއަރީން އޭޕްރީލްގެ ނިޔަލަށް ރާއްޖެއަށް ދުވާލެއްގެ މައްޗަށް 6،892 ފަތުރުވެރިއަކު އައިސްފައިވާއިރު، އެ އަދަދުން ކުރިޔަށް އޮތް ތިން މަހުގެ ތެރޭގައި ފަތުރުވެރިން އައިސްފިނަމަ ވެސް 2.3 މިލިއަންގެ އަމާޒު ޙާސިލުވުން ފެންނަނީ ކުޑަކޮށެވެ.